Коринф-1 7

Жилириканна хпирикан

1Учву узуз, жилириз хпирик зат кудручди гъузиш, ужу шул кӀури, гъибикӀунчва. 2Хъа му дюнʼяйиъ кьяппавал абхънайиган, гъит гьарсар жилир чан хпирин ва гьарсар хпир чан жилирин ахникк ишри. 3Жилири чан хпирихъди жилирвалин буржи тамам апӀри, хпирира гьаци апӀри.

4Чан жандин аьхюр хпир дар, хъа – жилир, гьаци жилирра чан бедендин аьхюр дар, хъа – чан хпир. 5Чиб-чпихъди сатӀи хьувал гъибтри мапӀанай. Йикьрар йитӀну, сацӀиб вахтназ, думу вахт Аллагьдиз ккарагуз бахш апӀузди жара гъахьну пну, баладар. Хъасин хъана сатӀи йихьай, даршиш иблисди, учвхьан аьгь апӀуз даршиш, гъирагъдихъинди хъчӀюхидичву. 6Яна узу му буйругъ вуди дупнайиб дариз, хъа ичв ихтиярнаъ гъубзра. 7Узуз вари адмийир узуси духьну ккундийзуз, хпир хътарди, аммаки гьарсариз Аллагьдихьан чан багъиш а: сариз саб, тмунуриз тмунуб.

8Хъа ачӀни хпаризна жилариз кӀураза: дурариз ялгъузди, гьаму узуси яшамиш шули гъузиш, ужу шул. 9Хъа аьгь апӀуз даршлудари, тямягьну гъадагъайиз, гъит, чпиз хизанар ккергъри, гьамци ужу хьибди.

10Хъа шив ва жилир хъайидариз узу ваъ, хъа Чав, Агъайи буйругъ тувра: хпири чан жилир гъитну ккундар, 11хъа эгер гатӀахьруси алабхъиш, сарун нюкгьин эйси даришри, шулуш, хъана чан жилирихъди албагри. Ва жилирра хпирихьан жара даришри.

12Хъа имбудариз, сарун Агъайи ваъ, хъа узу кӀураза: эгер сар фунур-вуш гъардшин хпир хъугърур дарш ва думу дугъахъди яшамиш хьуз рази вуш, гъит жара даришри. 13Хътругъру жилир хъайи дишагьлийизра кайиб гьадму ву: эгер думу дугъахъди яшамиш хьуз рази вуш, чан жилирихьан гьудудучӀври. 14Гьаз гъапиш, хътругъру жилир чан хъугъру хпирилантина, ва хътругъру хпир чан хъугъру жилирилантина гирами шулу. Жараси вуйиш, ичв веледарра марцци дару гьисаб хьидийи, хъа мици, дурарра гирами ву.

15Эгер хътругъру жилириз вая хпириз жара духьну ккундуш, гъит ишри. Му гьялариъ гъардаш, вая чи асиллуди гъузидар. Аллагьди ухьуз мясляаьтнаъди яшамиш хьуз дих дапӀнахьуз. 16Увуз, хпир, яв жилир увлантина дюрюхрувал фици аьгъявуз? Увузра, жилир, яв хпир увлантина дюрюхрувал фици аьгъявуз?

17Гъит гьарсар Агъайи улупнайиси яшамиш ишри, ва чаз Аллагьди дих дапӀнайиси гъузри. Му къайдйир варишвариъ айи хъугърудариз кӀурудар вуйиз. 18Чаз дих апӀайиз суннат дапӀнайириз думу жиниди уьбхюри гъибтуз гучӀ адар. Хъа суннат дапӀну адарди дих дапӀнайириз, сарун суннат дарапӀишра, гучӀ адар. 19Суннат дапӀнайивал, ясана адрувал – мурариъ гьич саб мяна адар, хъа мяна – Аллагьдин табшуругъар тамам апӀуб ву. 20Чаз дих апӀруган, фуж фици вуйиш, гъит чан гьаци гъузри. 21Эгер увуз лукӀди имиди Аллагьди дих дапӀнаш, увуз дидкан гьии дардиси дарибшри. Эгер увуз азад хьуз шлу мумкинвал аш, ужу шлуси апӀин. 22Фицики Агъайи дих дапӀнайи лукӀ Агъайиз азад вуйир ву. Гьаци, азад вуди дих дапӀнайирра, Месигьдин лукӀ шула. 23Учву, зурба кьимат тувну, гъадагънайидар вучва, гьаддиз, адмийирин лукӀар махьанай! 24Гъардшар, Аллагьди дих апӀруган, гьар кас фици айиш, Дугъан улихь гьаци гъузай!

Павели нюкгьин гьякьнаан вуйи суалариз жаваб тувра

25Швуваз дурушдариз ва швушв дархидариз Агъайи дурарин гьякьнаан саб буйругъра тувнадарзуз, аммаки Гьадгъухьан, узуз ужʼвал дурубкьнайивализ дилигну, йиз гафнахъ хъугъуз шулу. Узу гьамци пидиза: 26Узу, гъийин гьялариъ, адмийиз чпин айибси – швуваз дурушдар, дурушди ва швушв дархидар дархиди гъузиш ужу шул кӀури, гьисаб апӀураза. 27Эгер уву нюкгьиъ аш, жара махьан. Хъа эгер уву швушв хьайир дарш, махан. 28Хъа эгер гъахишра, думу гунагьвал дар. Эгер риш швуваз гъушиш, гунагь хьибдар. Аммаки чпин сатӀлан вуйи уьмриъ дурариз гизаф читинвалар ккилигура, хъа узуз учву гьадрариккан уьрхюз ккундийзуз.

29Жараси кӀури гъабшиш, гъардшар: вахтар цӀибтӀан гъузрадар, ва швушвар хьайидар, гъит швушвар хьтрударси ишри, 30хъа дердлудар – дерд ктрударси, шадлудар – шад дарударси, гъадагърудар – фукӀа хътрударси. 31Гъит гьаму дюнʼяйиъ яшамиш шулайидар, дидкан тӀяаьм ктадабгърударси, ишри. Гьаз гъапиш, ухьуз рябкъюрайи гьаму дюнʼя багарихьди жвартӀ хьибди.

32Узуз учву сабдиканра вижна ктарди ккундузуз. Хпир хътрур, учв Агъа Аллагьдиз ккун ишри кӀури, Аллагьдин ляхнариъ ичӀигну а. 33Хъа хпир хъайир, хпириз ккун ишри кӀури, му дюнʼяйин ляхнар апӀбахъ хъа. 34Дицир кас кьюбишваз пай духьна. Жилир хътру хпири вая швуваз душну адру шуру Агъайин ляхнарикан фикрар апӀуру. Думу чан бедендиинди ва рюгьниинди Дугъаз бахш хьуз шерик шулу, хъа швувахь хьайир, жилириз учв ккун ишри кӀури, му дюнʼяйин ляхнар апӀбахъ хъа. 35Му вари узу учвуз ужʼвал бадали кӀурайиб вуйиз, хъа учву фтихьан-вуш гьадатӀуз кӀури ваъ. Узуз ккундайиб: учву варитӀан ужуйи, гьич сабдира учвуз машат дарапӀди, Аллагьдин гъуллугънаъ хьуб вуйиз.

36Эгер учвкан шлиз, сумчир дарапӀди чан лишан кипнайирин йисар гъяра кӀури гьии даруси аш, ва гьамус сумчир дапӀну ккуниси фикир апӀураш, гъит дугъу чан дюз гъюрубси апӀри. Дугъхьан швушв хуз шулу, думу гунагь дар. 37Эгер адмийи швушв дархуз ижмиди гьял дапӀнаш, эгер швушв хувал думукьан чарасуз ляхинси фикир апӀурадаш ва эгер учв чан хилиъ дидисну гъузуз шлур вуш, дугъу чаз хъирснайи риш марцциди гъитуз кӀваъ дибиснаш, ужуйи апӀура. 38Гьаци вуйиган, хъирснайи риш швушвди хрури ужуйи апӀура, хъа дархрури хъана ужуйи апӀура.

39Хпир чан вари уьмриъ жилирик китӀнайир ву, хъа жилир гъачӀиган, думу азад шула ва дугъхьан чаз ккунириз швуваз гъягъюз шулу, анжагъ – хъугъруриз. 40Хъа эгер, фуж, узуъра Аллагьдин Рюгь азуъ, кӀури, швуваз дурушди гъузиш, думу бахтлуди хьиди.

Currently Selected:

Коринф-1 7: ТабГК

Highlight

Copy