Коринф-1 4

Месигьдин вакилар

1Гьаци вуйиган, Аллагьдин сир учʼина ихтибарлу дапӀнайи Месигьдин гъуллугъчйирси учу гьисаб апӀинай. 2Гьамциб хъугъвал илипнайидар аьгьтлу духьну ккунду. 3Учву вая сар жарари узкан фици кӀураш, саб жюрейинна вижна ктарзуз. Узхьан узканкьан фукӀа гьациб пуз шулдарзухьан. 4Йиз намус марцциди вуйиз, вушра, му, узук тахсир ктар, кӀуру гаф дар. Йиз судья – Агъа вуйиз. 5Гьаддиз, Агъа хъадакну гъюру вахт шайизра, улихьмиди тахсрар агури мюхъюгъянай. Дугъу вари жиниб ачухъ апӀиди, инсанарин юкӀвариъ гьитӀибкӀнайиб арайиз адабгъиди ва гьадмуган Дугъу гьардин тяриф апӀиди.

6Узу мици, гъардшар, узканна Аполлосдикан учвуз ужʼвал бадали кӀураза. Учу мисал духьну, учхъан, артухъуб жвувкан ктадабгъди, дибикӀнайиб дубгъай, имбунуртӀан артухъ за апӀури, сар шлиинди-вуш фурс мапӀанай.

7ИмбудартӀан артухъ за шли апӀураву? Аллагьдихьан даруб фу авуз? Увуз вари пешкеш дапӀнайиган, увуз тутрувганси яв тярифар гьаз апӀурава?

8Сарун учуз вари ачуз, девлетлу вуча, учу хътарди паччгьар гъахьунча кӀури, фикир апӀурайчва! Ай аман, узуз ккундайинхъа учву аьхювал апӀури, учура учвухъди аьхювал апӀурахьидийча! 9Хъа йиз фикриан, Аллагьди учу, Месигьдин вакилар, аьжал тувуз жаза гьадабтӀнайи адмийирси, варидарин кьяляхъ дерккна. Вари дюнʼяйиз, малайикариз ва адмийириз учкан тамашачйир духьна. 10Месигь бадали абдлар духьначу, хъа Месигьдихъ хъугърударин арайиъ учву – фагьумлуйир! Учу – зяиф, хъа учву – кьувватлу! Учву – адлу апӀура, хъа учу – беябур! 11Гъийин йигъазкьан учу гашлу ва мукърам вуча, гъяргъяртӀан алдарди лицурача, учу урччвури шулу, ич хал-йишв адарич, 12учу ич хилариинди, унтӀаз амкӀ идипури, учуз уьлин кьацӀ гъазанмиш апӀурача. Учʼин агь уьлюбхюру, хъа учу ужʼвал ибшричвуз кӀурача, хъергру – аьгь апӀурача. 13Учкан варитӀан писубтӀан кӀури шулдар, хъа учу гъянивалиинди жаваб туври шулча. Гъийин йигъазкьан, му дюнʼяйиз чӀюрхярди, гьарсаб хъархъвасси, имичу.

14Му узу учвуз нач хьуз кӀури бикӀурайиб дариз, ваъ, хъа, йиз ккуни веледарси, учву гъавриъ ауз ккундузуз. 15Учвуз агъзраркьан Месигьдин рякъюъди гъягъру мялимар ашра, хъа адшар сакьюдартӀан адарчвуз. Иса Месигьдикан вуйи Ужувлан хабарнахъ учву хъугъган, узкан рюгьниинди вуйи ичв адаш гъахьну. 16Учвкан миннат вуйиз: узхъан мисал гъадабгъай! 17Гьаддиз багьа ва гъапиб кӀулиз адабгъру, Агъайихъ ихь сатӀлан вуйи хъугъувалиъ айи йиз бай Тимофей гьаъразачвухьна. Узу хъугърударин арайиъ варишвариъ улупурайиси, узу йиз уьмриъ фици Месигь Исайин рякъди гъягъюри шулуш, дугъу кӀваин апӀидичвуз.

18Сарун узу учвухьна гъидар кӀури, ичв арайиъ сакьюдари хъюхъ гъазабгну. 19Хъа узу, эгер Агъайин амур гъабшиш, гъидиза, ва гьадмуган думу кӀулʼан удучӀвнайидарин гафарин ваъ, хъа дурарин кьувватнан кьимат фициб вуш, аьгъю хьибдизуз. 20Гьаз гъапиш Аллагьдин Паччагьлугъ, гафнаъ ваъ, хъа кьувватнаъ ачмиш шулайиб ву. 21Учву кадабгъай: маргъ хьади гъюза, даршишсана – масанвална умунвал?

Currently Selected:

Коринф-1 4: ТабГК

Highlight

Copy