Коринф-1 3

Адмийирихъ хътӀерццуб гунагь ву

1Гъардшар, узхьан учвухъди рюгь айи адмийирихъдиси улхуз гъабхьундарзухьан, хъа му дюнʼяйин адмийрихъдиси ва Месигьдихъ хъугъну имбу бицӀи нинйирихъдиси гъулхунза. 2Узу учвуз «никк» туври гъахьунза, хъа аьхюдариз вуйи «хураг» туври гъахьундарзачвуз, тувнийишра, учвхьан гьял апӀуз хьибдайчвухьан ва гьамусра шулайиси адар. 3Учву сабан му дюнʼяйин адмийирди имичва. Ичв арайиъ бахилвална гъярхьувалар имбукьан гагьди, учву му дюнʼяйин адмийирди гъуздичва ва ичв хасиятра аьдати адмийиринсиб вуйичв. 4«Узу Павелин терефкар вуза», ясана: «Узу Аполлосдинур вуза» кӀуруган, му дюнʼяйин адмийирстар дарнучвахъа?

5Я кас, Аполлос фуж ву? Хъа – Павел? Гьадрарилантина учву Месигьдихъ хъугъу гъуллугъчйиртӀан дар дурар. Ва учуз гьарсариз Агъайи саб ляхин улупунчуз. 6Узу кивунза, Аполлосди хъубзну, аьхю гъапӀур Аллагь ву! 7Гьаддиз, фужкӀара гьисабнаъ адар: я кивур, я хъубзур, хъа анжагъ – арайиз адабгъу Аллагь! 8Кивуринна хъубзурин айиб саб метлеб ву, ва гьардиз чан пай ляхнинуб рубкьиди. 9Учу Аллагьдин гъуллугънаъ айидар вуча, хъа учву – Дугъан хутӀил, Дугъан диврайи дарамат вучва.

10Узу, Аллагьди узуз тувнайи ужувлиинди, фагьумлу устайиси, шибритӀ ккивур вуза, хъа жарари душвʼин хулар дивра. Аммаки гьарсар, чав фици дивраш, дикъатниинди лигри. 11Сарихьанра, ккивнайибдилан гъайри, жара шибритӀ ккивуз шлуб дар, ари гьадму шибритӀ – Иса Месигь ву. 12Гьаму шибритӀиин адмийихьан гъизиликан, арсракан, багьа гъвандикан, гакӀвликан, гъеебццу укӀкан вая нахъвракан хулар дивуз шулу. 13Хъа шли фици дивнуш, улупру Йигъ гъибди. Думу Йигъан вари цӀиинди ахтармиш апӀиди ва гьарсарин ляхниз цӀи кьимат тувди. 14Шлиндар цӀихьан ургуз дархьиш, гьадгъаз чан пешкеш хьибди, 15хъа гъургиш – зарал. Аммаки думу учв, цӀигъян гужназ гъядягъю касси, дюрхну хьиди.

16СатӀлан учву – Аллагьдин хал вуйиб ва учвуъ Аллагьдин Рюгь яшамиш шулайиб аьгъданчвуз дарш? 17Аллагьдин хал дабгърур Аллагьди даргъиди. Гьаз гъапиш, Аллагьдин хал гирамиб ву, ари гьадму Хал – учву вучва.

18Учву учвуз кучӀлар апӀруси дарибшри. Эгер учвкан шлиз учв, гьаму дюнʼяйи гьисаб апӀурайиси, фагьумлу касси гьугъужвураш, дицир, учв дугъридан фагьумлу хьузди, «ахмакь» духьну ккунду. 19Фицики, гьаму дюнʼяйин фагьумлувал Аллагьдин улихь ахмакьвал ву. ДибикӀна:

«Дугъу фагьумлуйир

чпин кью-кьюб маш гъяйивалихьди дисура».

20Ва хъана:

«Фагьумлуйин фикрар – гьавайидар вуйиб

Агъайиз аьгъя».

21Гьаддиз адмийиинди тярифар мапӀанай. Вариб – ичвуб ву: 22Павелра, Аполлосра, Кифра, гьаму дюнʼяра, уьмурра вая аьжалра, гьамустинубра вая гъюз ккимбубра – вари ичвдар ву, 23хъа учву Месигьдиндар вучва, Месигь – Аллагьдин.

Currently Selected:

Коринф-1 3: ТабГК

Highlight

Copy