Коринф-1 14
14
Рюгьнан багъишар хъугърударин хайирназ ишлетмиш апӀинай
1Масанвалихъ хъачӀарккай. Рюгьнан багъишарин гъайгъушнаъ йихьай, гизафна гизафси – пайгъамбарвалин багъишнан.
2Таниш дару чӀалниинди гафар апӀурайир адмийирихъди ваъ, хъа Аллагьдихъди улхура. Фицики дугъан фужкӀа гъавриъ ахъдар, амма Рюгьниинди дугъу сирарикан кӀура. 3Хъа пайгъамбарвалин гафар кӀурайири адмийириз насигьят вуди, юкӀв капӀри ва ккарцури кӀура. 4Таниш дару чӀалариинди улхурайир, чаз насигьят вуди улхура, хъа пайгъамбарвалин гафар кӀурайири, хъугънайидариз насигьят вуди кӀура. 5Узуз учвкан гьарсар чӀалариинди улхури ккундийзуз, аммаки пайгъамбарвал апӀуб ужу ву. Пайгъамбарвал апӀурайир, чӀалариинди улхруртӀан зиина ву. Аммаки чӀалариинди улхрури, хъугънайидариз насигьят вуди, гьадму чӀаларин гъавриъ ауйиш, думу зина вуйи.
6Гъардшар, узу учвухьна дуфну, таниш дару чӀалариинди, фукӀа ачмиш дарапӀди, аьгъювалар тутрувди, пайгъамбарвалин гафар дарпиди, насигьят тутрувди улхуйиш, узкан учвуз фу хайир хьибдийи? 7Ил алдру мукьмарин алатар гъадагъай, мисалназ, швутӀрам вая кьумуз. Эгер сесер жара апӀуз шулдарш, дурарин мукьмар фици аьгъю апӀидичва? 8Эгер зурнайи гъавриъ адрахъру дих деебтиш, дявдиз фуж гъедергидийи? 9Гьаци учвура шулачва. Эгер гъавриъ адрахъру гафар кӀураш, учву кӀурайибдин адмийир фици гъавриъ хьиди? Учву гьавайи гафар деетурачва. 10Дюнʼяйиъ фукьан гизаф чӀалар а, амма чӀалар аьгъюдари дурарин мяна бисура. 11Эгер узуз кӀурубдин узу гъавриъ ахъдарш, кӀурайириз узу жара уьлкейин адми ву, ва думура узуз жара уьлкейин адми шула. 12Гьаци учвура шулачва. Учвуз Рюгьнан багъишар ккунди анчвуз? Ккуниган, хъугънайидарин хайирназ бегьемди ккун апӀинай.
13Гьаддиз, аьгъдру чӀал апӀрури, дидин гъавриъ ауз шлу багъишра туври кӀури, ккарагри. 14Аьгъдру чӀалниинди узу ккарагруган, йиз рюгь ккарагура, хъа йиз фикир иштирак шуладар. 15ГьапӀза? Узу рюгьниинди ккарагидиза, йиз фикрииндира ккарагидиза. Рюгьниинди Аллагьдиз мяълийир апӀидиза, йиз фикрииндира мяълийир апӀидиза. 16Эгер уву рюгьниинди Аллагьдиз баркаллагь кӀураш, гъаври адру адмийи фици «амин» пиди? Дугъаз уву фу кӀураш аьгъдар! 17Увхьан Аллагьдиз ужуйи баркаллагь пуз шулвухьан, хъа тинди хъайир диди мюгькам апӀидар.
18Учвуз варидаризтӀан чӀалариинди улхуз узуз ужуйи аьгъязуз, гьаддиз Аллагьдиз чухсагъул вуйиз, 19амма хъугънайидарин арайиъ, жарадариз насигьят вуди, йиз фикриинди гъавриъ ахъру хьуб гаф кӀарза, агъзрариинди аьгъдру чӀалнан гафар кӀайиз!
20Гъардшар, фикир ади, бицӀидарси махьанай. Писвализ тахсир ктру бицӀидарси йихьай, хъа фикриинди – гьуркӀу адмийир! 21Къанундиъ дибикӀна:
«Жара чӀалариинди ва жара мелзариинди Узу гьаму халкьдиз пидиза, я гьадмуганкьан дурар Узухъ хъпехъидар, – кӀура Агъайи».
22Гьаци вуйиган, жара чӀалар хъугърудариз вуйи лишан дар, хъа хътругърудариз. Пайгъамбарвалин гафар – хътругърудариз дар, хъа – хъугърудариз. 23Хъугънайидар вари уч духьну, чӀалариинди улхуради, дурарихьна аьгъдрудар ваяки хътругърудар гъафиш, дурари учвук жинар кучӀвна даркӀурин? 24Хъа варидари пайгъамбарвалин гафар кӀуради, душвазди хътругърур, ясана жарар учӀвиш, улхурайи гьарсарикан дугъаз учв гунагькар ва тахсиркар вуйиб рябкъиди. 25Дугъан кӀван жини ниятар ачухъ хьиди, ва гьадмуган, кьамкьарихъди ис алахъну, Аллагьдиз дугъу икрам апӀиди ва пиди: «Дугъриданна, Аллагь учухъди хъа!»
Хъугърудар мюгькам апӀури йихьай
26Фу вухъа, гъардшар? Учву уч шлуган, гьарсарин фу-вуш кӀуруб шуличв: Аллагьдиз мяъли, насигьятнан гаф, Аллагьди ачмиш гъапӀуб, чӀалариинди улхуб, ясана думу чӀаларин гъавриъ ауб – гъит варидиз му вари мюгькамвализ ибшри. 27Эгер чӀалариинди улхрудар аш, гъит кьюри йипри, заан кӀул – шубури, нубатнахъди, хъа сар касди дурари кӀурайиб кидибтри. 28Хъа чӀаларин мяна ктибтуз шлур адарш, чӀалариинди улхрур хъугънайидарин арайиъ ккебехъну гъузри – чазна АллагьдизтӀан дарипри.
29Пайгъамбрариканра кьюри вая шубури йипри, хъа имбудари гъапибдикан фикир апӀри. 30Эгер дуфнайидарикан сариз Аллагьдихьан фукӀа ачмиш гъабхьиш, улхурайир ккебехъну, мунури йипри. 31Учвхьан вардарихьан, вардариз насигьят тувбан ва вардарик юкӀв капӀбан бадали, нубатнахъди пайгъамбарвал апӀуз шулучвхьан. 32Пайгъамбрари чпин рюгьнан эйсивал дапӀну ккунду, 33гьаз гъапиш, Аллагь – къайда хътру Аллагь дар, хъа мясляаьтнан Аллагь ву.
Аллагьдин гирами халкь уч шлу варишвариъси, 34душвариъ дишагьлийир ккебехъну ккунду. Дурариз гафар апӀуз ихтияр туврадар. Къанунди тӀалаб апӀурайиси, дурарин пише мютӀюгъди гъузуб ву. 35Эгер дурариз фукӀа аьгъю апӀуз ккунди аш, гъит дурари хулаъ чпин жиларихьан гьерхри, фицики дишагьлийиз уч духьнайишваъ улхуб аьйиб ву.
36Аллагьдин гаф сифте учвхьан удубчӀвуб, ясана учвухьнатӀан дурубкьну адруб ву кӀури, гьисаб апӀуранчва? 37Учв пайгъамбарди вая рюгьнан адмиди гьисаб апӀурайири узу бикӀурайиб, Чав Агъайин дебккнайиб вуди, кьабул апӀри. 38Хъа кьабул дарапӀрур, учвура кьабул мапӀанай.
39Гьаци вуйиган, гъардшар, пайгъамбарвалихъ хъачӀаккай, чӀалариинди улхузра машат мапӀанай. 40Аммаки вари лайикьлуди ва къайдалуди дубхьну ккунду.
Currently Selected:
Коринф-1 14: ТабГК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010, 2013, 2016, 2018, 2023
