Zechariah 1
1
TOPA Lamah Kihei dinga Sapna
1Darius uk a kum nihna a kha giatna kha-in Iddo tapa Berekiah tapa kamsangpa Zechariah tungah TOPA thu tunga:#Ezr 4:24
2 "Na pu na pate uh tungah TOPA heh mahmah hi. 3 Tua ahi ciangin mite tungah gen in: Thahatpen TOPA gen hih ahi hi: ‘Kei lamah hong kihei un, Thahatpen TOPA in cikhia a, ‘tua teh no lamah kong kihei ding hi,’ Thahatpen TOPA in ci hi. 4 Na pu na pate uh bang kei un; kamsang masate in amaute tungah tangko uh a, Hih in Thahatpen TOPA gen ahi hi: ‘Na gitlohna uh le na gitloh gamtatna panin kihei un,’ ci hi. Ahi hangin amaute in a thu ngai loin, kei hong thusim lo uh hi, TOPA in cikhia hi. 5 Tu-in na pu na pate uh koi-ah om hiam? Kamsangte e leh, amaute nungta den uh ahi hiam? 6 Ahi hangin ka nasem kamsangte tunga ka thupiak thute le thukipte, na pute uh tungah tung lo ahi hiam?
"Tua ciangin amaute kisik uh a, ‘Hih dinga a geelsa bang tektekin i gamtatna tawh kizui-in eite tungah Thahatpen TOPA in hong sem ta hi,’ ci-in gen in," a ci hi.#Jer 12:14-17
Mui Singkung Lakah Mi
7 Darius in a uk a kum nihna sung, kha sawm le khatna Shebat kha ni sawmnih le li ni-in Iddo tapa, Berekiah tapa kamsangpa Zechariah tungah TOPA thu a tung hi.
8 Zan laitakin mang ka mu a - ka mai-ah mi khat sakol san tungah a tuang hi! Amah kuam thukpi sung khata mui singkung lakah a ding hi. A nungah sakol asan, apuang le akangte a om uh hi.#Zec 6:2-7; Kil 6:4
9 Keimah in, "Ka topa aw, hihte bang ahi hiam?" ci-in ka dong hi.
Ka kihopih vansawltak in, "Amaute bang hiam cih kong lak ding hi," ci-in hong dawng hi.#Zec 4:1
10 Tua ciangin mui singkung laka dingpa in hong hilhcian a, "Amaute leitung khempeuh ah a pai kawikawi dinga TOPA sawlte ahi uh hi," hong ci hi.#Zec 6:5-8
11 Tua ciangin mui singkung laka ding TOPA vansawltak kiangah amaute in thu zasak uh a, "Leitung khempeuh ah ka paisuak khin uh a, leitung buppi lungnuamtakin tawlnga uh hi," a ci uh hi.#Pc 16:7; Isa 14:7
12 Tua ciangin TOPA vansawltak in, "Thahatpen TOPA aw, Judah khuapite le Jerusalem tungah kum sawm sagih sung na heh ta hi. Amaute na lainatna bangtan vei ip lai ding na hi hiam?" a ci hi. 13 Tua ciangin TOPA in kei tawh kiho vansawltak kam khum le hehnepna kam tawh a hopih hi.
14 Tua ciangin kei hong hopih vansawltak in, "Hih thu tangko in: Thahatpen TOPA in hih hong ci hi, ‘Zion le Jerusalem ading ka aam lua mahmah hi, 15 ahi hangin a lungmuang minamte tungah ka heh mahmah hi. Ki-iip lai ka hi manin amaute in siatna a behlap uh hi,’ ci hi.#Isa 26:11
16 "Tua ahi ciangin TOPA thugen hih ahi hi, ‘Lainatna tawh Jerusalem ah ka pai kik dinga, tua lai-ah ka inn kilam kik ding hi. Tua ciangin Jerusalem tungah tehna khau a kizankhia ding hi,’ Thahatpen TOPA in cikhia hi.
17 "Tangko beh lai inla: Hih in Thahatpen TOPA gen ahi hi: ‘Ka khuapite nopsakna tawh kidimlet ding uh a, TOPA in Zion hehnem kikin Jerusalem a teel ding hi,’ ci in," a ci hi.#Isa 40:1
Ki Li le Khutsiam Li
18 Tua ciangin ka ento a - ka mai-ah ki li a na om hi! 19 Kei hong hopih vansawltak kiangah, "Hihte bang hiam?" ci-in ka dong hi.
Amah in "Hihte in Judah, Israel le Jerusalem a thehthang kite ahi hi," ci-in hong dawng hi.#Am 6:13
20 Tua ciangin TOPA in khutsiam mi li hong lak hi. 21 "Hihte bang hih dinga hong pai ahi hiam?" ci-in ka dong hi.
Amah in, "Hihte in, kuamah in a lutang a phot theih loh nadingin Judah a thehthang kite ahi hi. Ahi hangin khutsiamte in Judah gam langkhatah a ki uh liikto-in, a mite a thehthang amaute a lausak ding le minamte kite uh a lawnthal dinga hong pai uh ahi hi," hong ci hi.#1Ku 22:11; Ph 75:4
Currently Selected:
Zechariah 1: ZIV
Highlight
Share
Copy
Want to have your highlights saved across all your devices? Sign up or sign in
Copyright 1994 Myanmar Center for World Mission