Ezekiel 9
9
Milim Biate Kithat
1Tua ciangin amah in nakpi in sama, "Khuapi cingte hih lai-ah hiam khat ciat tawisa-in hong paisak in," a cih ka za hi. 2 Tua ciangin leilu lam a nga kongpi tungnung lam panin mi guk pai uh a, a khut-uah sih theihna hiam khat ciat a tawi uh hi. Amaute tawh saihadial puan silh a, a pangah lai gelhna bawm a nei mi khat a om hi. Hong tum uh a, sumngo biakna-tau gei-ah a ding uh hi.
3 Tua laitakin Israel’ Pasian’ minthanna a omnasa cherub-te omna tungsan ah kikhaangto a, biakinnpi kongah a kikhin hi. Tua ciangin TOPA in saihadial puansilh, a panga laigelhna bawm neipa sama, 4 ama kiangah, "Jerusalem khuapi va siksuak inla a sunga a kizem na kihhuaite hanga kapa taamlote a taltang ah ciamteh in," a ci hi.#Sp 16:4
5 Ka ngaih leh adangte kiangah, "Khuapi sung khempeuh ah amah zui unla khuatuah het loin cikzia het loin that un. 6 A kiciamteh peuhmah lawngkha loin khangmoi, khangham, nupi nungak le naupangte golum khin un. Ka munsiangtho panin pan un," a ci hi. Tua ciangin amaute in biakinnpi mai-a upate panin a pan uh hi.#Pn 4:15; Jer 13:14
7 Tua ciangin amaute kiangah, "Biakinnpi ninsakin a tual teng misiluang tawh dimsak un. Pai un!" a ci hi.Tua ciangin amaute paikhia uh a, khuapi sung khempeuh ah mi thah ding a kipan uh hi. 8 Amaute in a mithah hun sung uh kei guak hong nusia uh a khupbawk sukin, "Ah, Thupipen TOPA! Jerusalem tungah na thangpaihna na buakna tawh Israel mi a baanglaite siasak khin ding na hi hiam? ci-in ka awngkhia hi.#Jos 7:6; Eze 6:7
9 Amah in, "Judah le Israel innkuante mawhna lian lua mahmah hi; gam sungah sisan kiluansakna dima, khuapi sung aman lo-a thukhenna tawh kidim hi. Amaute in, ‘TOPA in i gam phawk nawn lo hi; TOPA in hong mu lo hi,’ ci uh hi. 10 Tua ahi ciangin amaute hehpih lo, zah tuan loin a sepsate uh amau lu tungah ka tusak ding hi," hong ci hi.#Ph 58:2; Jer 13:14
11 Tua ciangin saihadial puansilh, a panga laigelhna bawm neipa in thu puak kik a, "Nong thupiak bangin ka sem khin hi," hong ci hi.#Pc 6:22
Currently Selected:
Ezekiel 9: ZIV
Highlight
Copy
Compare
Share
Want to have your highlights saved across all your devices? Sign up or sign in
Copyright 1994 Myanmar Center for World Mission
