Romanwu 9

SER ALAYE WADUNJU BOWURO KALAKCI WA? JAAWU BULUSSE

Kadara Alaye Israyilawuro

1Almasiwulan jire wullǝkki, kattuwu gǝni, halni ye Ruhu Alayen shedasi, 2karwukutta kura-a jǝktu ceriwawo-a curo karwuniyen fakki. 3Ca yojia, kǝramiyani jama tilon tambiyena nangaro#9.3 jama tilon tambiyena nangaro - Tayi ye njǝkkawo cawandoro. wu kǝlani baskuwada ye, Almasiwu-a faiyada yero raakko. 4Tayidǝ Israyilawu, koro Ala tayia dapce tadawanjuro cǝde daraja ce aman ndǝpcane Attaura so, kida ambǝttuwuye so tayiro waduwa ngoyeyeno. 5Kaariyadǝ kaanja, Almasiwudǝ ye kǝla naptunju adamgǝnayen tayiyeman kadio, tima Ala sawisoro bargaa same awo fiyen yaye kǝrgadǝ wo! Amin.

6Mana Alaye faida baworo waljǝna wa? A'a. Awoa kaduwu Israyilaye samma gǝni Israyiladǝ wo, 7koro tadawa Nawi Ibrahimbe samma gǝni kaduwunju wo. Alaye: «Am Isakuyen tasambidǝmaa kaduwunǝmlan bowojai,»#Bad 21.12 cǝnna. 8Maana adǝyedǝ tima tadawa tiyiye gǝni tadawa Alayedǝ, amma tadawa waduyedǝmaa kaduwuro ngojai wo. 9Akko mana waduyedǝ: «Baɍiminna kua gai isǝkki, Saratu tada cambi.»#Bad 18.10, 14 10Adǝ runju gǝni, Rabeka ye kam fal kaarinde Nawi Isakuyen curo ngoyenniya, 11kawu kawuwadǝ tasambe ngǝla bi diwi cadiro, fasal Alaye kadarjǝnadǝ tabbaccuworo, 12Rabekadǝro: «Karudǝ kaɍea kannadǝyero walji,»#Bad 25.23 yeno. Ngaiman fasal Alayedǝ kǝla kidayen gǝni, kǝla ti bowojidǝyen kǝrga. 13Kitawulan ruwuwadadǝ gai: «Yakubaa raakko, Yesawua wayekko.»#Mal 1.2-3

14To, awi gǝle wulliye? Na Alayen jirenambua wa? A'a, tǝmmaro ngai gǝni! 15Tiye Nawi Musaro: «Kam tiro kanjimaɍi fǝlegǝkkidǝro kanjimaɍi fǝlegǝkki, koro kam tia njunokkidǝa njunokki,»#NL 33.19 cǝnna. 16Adǝ nangaro rawo bi kowoɍi kamben gǝni, Ala kanjimaɍi fǝlejiyidǝman kǝrga. 17Kitawulan Alaye Fira'aunaro: «Dalil nia galanjǝkkǝnadǝ, tima kǝnduwoni nilan fǝlegǝkko, koro cuni dunia ngan culuworo,»#NL 9.16 cǝnna. 18Adǝma nangaro kam kǝrejǝnaro kanjimaɍi fǝlejiyi, koro kam kǝrejǝnaye kǝlanju kibbajiyi.

Wowom-a kanjimaɍi-a Alaye

19Daji niye wuro: «To, ngairo walyenoa, awiro kua yaye ayau gǝnajidǝ? Wundu gǝle rakce rawonju wajidǝ?» nǝme suworǝmi. 20Amma ni kam, ni wundu duwon Alaro mana kalakkǝmidǝ? Awo tǝdandǝnadǝye ti tia cǝdandǝnadǝro: «Awiro wua ngai sǝdǝm?» cǝni wa? 21Duwuramma kǝnduwo kǝla tulo kamatkadayen kalwo laa darajaa-a laa ye daraja bawoa-a tandoye cǝdanni wa? 22To, Ala gǝrgadunju fǝledu-a dunonju isanoduwu-a cǝraye tayi gǝrgadunjuye duwon siduwuro dabbargadadǝa jauro kanadilan mǝrjǝnaa, nda? 23Adǝa dionjudǝ, darajanju tǝrǝm tayi kanjimaɍiye duwon darajaro dabbargadadǝro isanoduwu cǝraanaa, nda?

24Andimaa curo yaudiya runjayen gǝni, curo kǝrdiyayen bowosana, 25curo kitawu Nawi Hosiyayen wuljǝnadǝ gai: «Tayi duwon jamani gǝnidǝa jamanilan bowokki, ti duwon tǝraannidǝ yea tǝraanalan bowokki.»#Hos 2.23 26Koro: «Na duwon tayiro: “Nayi jamani gǝni,” wuljanadǝman tayia tadawa Ala Kǝndǝgaimayelan bowojai.»#Hos 1.10 27Nawi Ishayaye kǝla Israyilawuyen kowo sapce: «Tadawa Israyilaye nanngǝwunja cidi kesa ci tekuyea cadǝna yaye, amnjaye ganama njǝkkawo cawandi, 28tussiwawo Kǝmande dunia ngaro sharanju cotto kamjiyi,»#Ish 10.22-23 cǝnna. 29Nawi Ishaya calan kawu wakkajidǝro wuljǝnadǝ gai: «Ala Kǝmande Martawama kaduwu laaa kolsaganniro walyenoa, andi bǝrni Sodombe gairo walliye, bǝrni Gomorre-a camuniyena.»#Ish 1.9

Kambǝrsenambu Israyilawuye

30To, awi gǝle wulliye? Kǝrdiya nanjire majannimasodǝ nanjire cawandǝna, wotte nanjire kambǝrseyen isidǝ, 31amma jama Israyilaye wada nanjireye majaidǝa cawandǝnni. 32Awiro? Kambǝrselan gǝni, kida diolan gai tia majana nangaro. Tayidǝ kǝla kau talduyedǝn taljana, 33kitawulan ruwuwadadǝ gai: «Akko Siyonnin#9.33 Siyonnin - Jerujalemnin, wotte dawu jama Israyilayen. kau talduye ye, takkalduma ye gǝnanǝkki, kam tia#9.33 tia - Almasiwu. mǝrsajǝnamadǝ, nangu tia cǝdaiwawo.»#Ish 28.16

Currently Selected:

Romanwu 9: KBY

Highlight

Copy

Compare