Galatiyawu 5

Wada Attauraye-a nankam kǝlaye-a

1Kambero walliyoro Almasiwu nankam kǝlaye sedo. Adǝ nangaro dunoaro danowo, bare koro yaye dui nankaɍeaye ngonuwwi! 2To, fannowo! Wu Bulus nayiro wulnjagakki, kolluwe kajanjaia, Almasiwu awimaro faidanjagaiwawo. 3Kam kolje kajajana fi yayero caye baworo wulgǝkki, dolenjuro wada Attauraye sammaa garo kǝlaro ngojǝna. 4Nayi wada galan jirewuro waldu manuwidǝ, nayi-a Almasiwu-a faiduwwa, ser Alaye fandoye jawal kolluwwa. 5Andidǝ, Ruhu Alaye sasakke kambǝrselan tǝma jirewuro walduye warniyena. 6Awoa na Isa Almasiwuyen kaja bi kajanambu awima gǝni, kambǝrse kǝrawon fǝledi bas faidaa wo. 7Ngǝlaro fuwu buwi duwon, wundu nayiro jire ga damnjaa? 8Jamba adǝ ti nayia bowonjanadǝyen gǝni kadio. 9Yis tǝngǝɍi rungo sammaa isafujiyi.#5.9 Yis tǝngǝɍi rungo sammaa isafujiyi - Alamdu kattuwuye jama ngaro tatardiyi. 10Nayidǝ, Kǝmande nangaro raayi gade gawwaworo mǝrsanjakkǝna. Amma kam hangalndo cǝsangidǝ wunduro walyeno yaye ajawu cai. 11Kǝramiya, wudǝ koro yaye kaja dio mawonǝkkia, awiro gǝle koro yaye wua basarsaidǝ? Adǝgaia, takkal kǝska karmoyedǝ baworo waljǝna. 12Ca am hangalndo casangidǝ tayi kǝlanja adimbo cado!

Mangar tiyiye-a hal Ruhu Alaye-a

13Kǝramiyani, nayia nankam kǝlaye fandoro bowongera. Adǝ yaye, bare nankam kǝlaye adǝlan faidaduwe niadiwi diwwi, amma wundu yaye kǝrawo fǝlejiyialan kamanjuro nanwolodi cǝddo. 14Akko maana Attaura sammaye curo mana fallen: «Kǝmaskinǝm yea kǝlanǝm gairo raye!»#Lew 19.18 15Amma kattendo calluwe njanjanguwia, hangal gǝnanowo, bare nayi kǝlando kǝlandoa sigǝwwi.

16Awo wullǝkkidǝ tima kollowo Ruhu Alaye simonja, daji mangar tiyiyedǝa galluwwawo. 17Mangar tiyiye-a Ruhu-a tadiwawo, koro Ruhu-a mangar tiyiye-a tadiwawo. Tayidǝ kattenjan duwunna, adǝ nangaro ranguwe awo raawwadǝa diwwawo. 18Amma Ruhudǝ nayia simonjaia, nayi fǝrdu wada Attaurayen bawo.

19Kǝndo tiyiyedǝ farak, tayima kǝnjǝna so, tayirnambu so, nanjane so, 20sǝnǝm ga so, kǝmbafi so, nankemi so, lawala so, nandǝɍi so, gǝrgadu so, kǝla rawo so, taawanambu so, yaktu so, 21mandǝna so, sagarandu so, kǝlaɍiwonambu so, awo gade tayi-a camunna. Burwon wullǝkkǝnadǝ gai, koro yaye wulnjagakki, am awo ania cadidǝ nodo bargaa Alayedǝa warasajaiwawo. 22Amma hal Ruhu Alayelan tuwandidǝ tayima kǝrawo so, karwukǝji so, nanlewa so, kanadi so, nanjaija so, nanngǝla so, aman roda so, 23rokuranambu so, kǝlaɍiwo so. Kǝla awo aniyen wada bawo. 24Am Isa Almasiwuyedǝ mangar so, niadiwi so tiyiyedǝa kǝskaro jajagane roro keyeso.

25Ruhu Alaye ro sadǝnadǝ, kolliyo Ruhu Alayedǝma andia simosa! 26Bare rokurawuro walliyende, koro bare kattendero hangalsango so, mandǝna so ngasaanni.

Currently Selected:

Galatiyawu 5: KBY

Highlight

Copy

Compare