Afisawu 5

Tadawa nurre gairo dǝgaiwo!

1Adǝ nangaro nayi tadawa tǝraanadǝ, hal Alayea ngonowo. 2Kǝndǝgai kǝrawoye dewo, jiɍi Almasiwu andia saraye sadaa-a bu fida-a na Alayen kawudi kala kǝjiaro walje andi nangaro kǝlanju cinadǝ gai. 3Amma bare kǝnjǝna, bi tayirnambu fi yaye, bi mangar diwi curondon wuldǝnni, muminnaro jussǝnni. 4Koro mana kuttu, bi mana hangalnambuye, bi batti wuldu nayiro jussǝnni, cuju adǝyero Alaa wusenowo. 5Adǝa ngǝlaro nonowo: Kǝnjǝnama-a tayirnambuma-a mangarduma wotte sǝnǝm gamadǝ-a samma nodo bargaa Almasiwu-a Ala-ayen warasa fima cawandiwawo.

6Bare wunduma mana bowuyen jambanjanni, awo ani nangaro gǝrgadu Alaye ganambuwua cuwandi. 7Adǝ nangaro bare tayiro kǝldǝgǝwwi. 8Calan nayi curo duwuyen, amma kǝrma Kǝmandedǝro nayi curo nurren. Tadawa nurre gairo dǝgaiwo, 9awoa nema nurredǝ awo ngǝla-a kalkal-a jire-a sammalan kǝrga. 10Rijammowo, awo Kǝmande ardijǝnadǝa asunowo. 11Bare kida faida bawoa duwuyero mukko yakkuwwi, cuju adǝyero fisaddowo! 12Awo gǝraadan cadisodǝa manadumaro nangua. 13Amma awo fi yayea nur fǝlejǝgǝnadǝ federo culuwi, 14koro awo fi yaye federo culuwunadǝ nurro walji. Adǝma nangaro ngai wuldi: «Ni kǝnǝm dimimadǝ, fanne, karmolan cine, Almasiwu nia wasnji.»

15Jiɍi dǝgawiro hangal gǝnanowo, am hangal bawoa gǝni, rashidu gairo wallowo. 16Dama fanduwwa fin yaye awo ngǝla dewo, jaman diwin dǝgaiyena nangaro. 17Bare hangal kuttuaro walluwwi, amma rawo Kǝmandeyedǝa asunowo. 18Bare diben yawe sagaranduwwi, halkuttaro cadi, amma Ruhu Alayen tǝmbǝɍuwwaro wallowo. 19Kattendon jawura so, aiya so, njungoro Ruhuye so dewo, Kǝmande yero aiya njungoroye karwundo samman yegǝnowo. 20Ala Bawaa sawi yaye awin yaye cu Kǝmande Isa Almasiwuyen wusenowo.

Kwawa-a kamuwa-a

21Wundu yaye kamanjua ridu Almasiwuye nangaro jǝga. 22Kamuwa, kwawandoa gaiwo, Kǝmandea gawwadǝ gai. 23Kwadǝ tima fuwuma kamunjuye wo, Almasiwu ye fuwuma jama Alayedǝ gai, jamadǝ tiyinju, koro tima Njǝkkayimanju wo. 24Jama Alaye Almasiwua jagaidǝ gai, kamuwa ye awin yaye kwawanjaa jaa.

25Kwawa, kamuwandoa rawowo, Almasiwu jama Alayea cǝraye tayi nangaro kǝlanju cinadǝ gai, 26ngainin jamadǝro mana Alayen kasala cǝdde tayirro walyera. 27Adǝa dionjudǝ, jamadǝ balo so, murjoktu so, awo aniye camunonju soa gǝni, nantayir-a awo waada bawoa-aro waljo, tia darajaalan kǝlanjuro saduwuro. 28Jiɍi adǝgainin kwaso kamuwanjaa carawo, tiyinjaa caraanadǝ gai. Kam kamunjua cǝraanamadǝ kǝlanjua cǝrawo. 29Awoa wunduma ngalte tiyinju wajǝnni, amma tia ambaje kissiyi, Almasiwu jama Alayero cǝddidǝ gai, 30awoa andi nashawa tiyi Almasiwuyedǝma. 31«Dalil adǝyero kwa bawanju-a yanju-aa kolje kamunjuro kǝrdiye tayi yindiso tiyi fallo waljai.»#Bad 2.24 32Tabbatto adǝ asǝr kura, mana adǝ kǝla Almasiwu-a jamanju-ayen cǝdiro wullǝkki. 33Adǝ yaye wundundo yaye kamunjua kǝlanju gairo cǝrawo, koro kamudǝ ye kwanjuro daraja co.

Currently Selected:

Afisawu 5: KBY

Highlight

Copy

Compare