2 Korintiwu 3

Kidawu aman bǝɍinne

1Koro yaye kǝlande jajaktu badiniye wa? Ra, am laa gai wotiyawa shedaye mukkondon ruwuwada bi nayiro ruwuwaadalan mǝradundea wa? 2Nayima wotiyandedǝ wo, karwunden ruwuwada, na am sammayen nowada ye, kǝraada ye. 3Nayidǝ farakko wotiya Almasiwuye kidandeyen isǝna, tadduwalan gǝni, Ruhu Ala Kǝndǝgaimayen ruwuwada, allowa kauyen gǝni, karwu kamben ruwuwada. 4Fuwu Alayen kǝla Isa Almasiwuyen adǝma mǝrsadunde wo. 5Andi kǝlande rangiye awo laa raktunden tǝdǝnaro wulliyewawo, raktundedǝ na Alayen isi, 6ti duwon andiro raktu kida aman bǝɍin dioye sadǝnadǝ. Amandǝ arawuye gǝni, Ruhuye, awoa arawudǝ karmo cuwudi, amma Ruhudǝ ro cuwudi. 7Wada karmo kudoma#3.7 wada karmo kudoma - Wada Attaura Nawi Musaye andia sasakke mǝradunde njǝkkawoye asuniye. arawulan kǝla allo kauyen ruwuwadadǝ darajaaro walje har Israyilawu fǝkka Nawi Musaye yiyiljidǝa rakcane cappo caruiwaworo waljǝnadǝ, yiyildudǝ koji yaye, 8ndayin gǝle kida Ruhu Alayedǝ#3.8 kida Ruhu Alayedǝ - Kida aman bǝɍinne. tia kojǝnaro darajaaro waljiwawo? 9Wada wowom gǝnadumadǝ darajaaro walyenoa, kida nanjire kudomadǝ tǝrgane tia darajalan jauro koji. 10Adǝgaima kǝla daraja dama bawo adǝyen daraja calan yiyiljidǝ awima gǝni. 11Awo kodumadǝ darajaaa, awo dǝgaidǝ tia darajalan koji.

12Tǝma adǝ gai taiyenadǝ, ridu falma taiyende, 13Nawi Musa gai gǝni, ti duwon bare Israyilawu njeroram awo kodumayedǝa carunniro fǝkkanju battalan jakcǝnadǝ. 14Amma hangalnjadǝ kibbajǝna, har kuro sa aman caye kǝrajaiya, batta adǝma dǝga, kadiwawo, Almasiwu baslan baworo walji nangaro. 15Aaa, har kuro Attaura Nawi Musayea kǝrajaiya, batta laa karwunja jakci. 16Amma kam tǝmje Kǝmandero waldiyiya, battadǝ kadi. 17Kǝmandedǝ tima Ruhudǝ wo, koro na Ruhu Kǝmandeye dǝganadǝn nankam kǝlaye kǝrga. 18Andi samma fǝkka kaadaa kudǝram gai daraja Kǝmandeye fǝleniye, darajalan daraja tǝrgaiaro faldiye camunonjuro walliye. Kǝmande ti Ruhudǝ cakke awo adǝ tǝdi.

Currently Selected:

2 Korintiwu 3: KBY

Highlight

Copy

Compare