Ruti 4
4
Ruti ti Bowazi Mbe Atso
1Ama Bowazi nwunn ru ka som rishen ufu ukoh ti pakob uten. Ti wu nunung, unde wu ti fer Elimeleki siskeb, ti Bowazi ri ira risu-wu, sang ba. Ama Bowazi kunn wu u ri te wu baa, “Ba som ike urwan-m.” Ama awu ru ba som riben atang. 2Ama Bowazi kunn ande rijwe uwae ande ndufu na uten, u ri te ba baa, “Ni ba som riben ike.” Ama aba ba som. 3Ama Bowazi ri te unde wu ti fer Elimeleki siskeb ne baa, “Nawomi kafe ru Mowab ba pu wu, u ku sha ti wu sa riben inja-ti Elimeleki jab ku ci ci. 4Ama ame kab baa, ame na u ri te fu ira risu-yi, u rang fu uwe andefu ba ti som ike ne, ko afu u jab mbe riben wu bara. Asiti afu a u jab mbe riben wu, jab mbe-fu. Asiti afu a u jab mbe-fu awu be, ri te m, ti m nung iken ti ame u nde, ikyaen ti, afu ti fer siskeb titawe ame putsa.” Unde wu ri baa, “Ame u jab mbe riben wu.”
5Ama Bowazi ri te wu baa, “Usir ti afu a jab mbe riben wu yi kujwo Nawomi, afu yaen pu fu Ruti, awu uwa icwu wu ti ru Mowab ba ama, ikyaen ti fu mbae anyisu te wu ti rinyi ubaen-wu ti kucang ā kunn atang.”
6Unde wu ti fer Elimeleki siskeb ne ri baa, “Ayi a si ahan, ame u jab mbe-m riben wu be, ikyaen ti, ayi u shir unju ukub sang risu rifunn ti ame site. Jab-fu riben wu, ame u jab-m be.”
7Fengo ti unde u yir cwunn ira kijab yi uten Isirela kiye wu ta re. Asiti afu a u jab mbe iken, ko afu a sa ku fifi, unde kinjo uwae ande ba u nwaen kupwafxen-wu, u nda unde ti ifaen. Ayine, aba ku nde yi ayib ujwunn ande, ku tso kubenti ufi ti fi yi uten Isirela. 8Ikyaen yine, unde wu ti fer Elimeleki siskeb ne, ri te Bowazi baa, “Jab mbe-fu riben wu,” ama u nwaen kupwa afxen-wu, u nda Bowazi.
9Ama Bowazi ri te andefu ti ande ti som atang baa, “Ani fxen, u sae pu ni te ayib-ni baa, ame na jab mbe pu m rifunn Elimeleki ti Kiliyon ti Malon, kujwo Nawomi. Ani ti u ri unju-m. 10Cwucwo, ame yaen pu m Ruti, unda Mowab, uwa Malon ti cwu u yata, ti awu u si uwa-m ikyaen ti rinyi-wu ā kunn atang. Yaka ne, ani fxen, u sae pu ni ti ayib-ni.”
11Ama, meme andefu ba, ti ande ti funn atang, cwe baa, “Ati fxen, u sae pu ti! Yaweh ā nda unda wu ti sang ku ba ishikununn-fu, ti awu ā si pangma Rahel ti Leyatu ti tag atso, u mbye kununn Isirela tsi. Rinyi fu ā pù iten uwae uten Efirati ti ande ā nung fu ko aka uwae Betilami. 12Yaweh ā nda anyisu jwunn ishikununn-fu pangma ana Perezi ti Tamar mbae na ubaen-wu Yawuda.”
Rishi Bowazi
13Ikyaen yine, Bowazi pu Ruti mbe, u nae te wu, ama Yaweh nda wu kyaen rishwu, u mbae umbae ti urom. 14Ama anda ti uten atang ri te Nawomi baa, “Itinyang ā si ana Yaweh! Awu nda pu wu afu umbae ti u nungkyi fu. Yaweh ā nda rinyi-wu pù iten kutampwa Isirela! 15Awu ti u si fenkyi uwae ishikunn-fu, u nungkyi fu kiye ti afu a kyaen pu fu. Uwabyib-fu ti ye ure te fu, ti skeb anyisu arom itsongfaen, awu ti mbae umbae wune na fu.”
16Ama Nawomi ye umbae wu sang runwan, u nungkyi wu nyinyang, u shi ser ben wu. 17Ikyaen yine, anda ti ice atang kunn umbae wu baa, “Obed,” ku ri baa, “A mbae umbae ti urom na pu ba Nawomi.” A fwa rinyi-wu baa, Obed. Awu ti si itse Jese, ti mbae Dawuda.
18Rinyi rishi Perezi ta re.
Perezi mbae Heziron,
19Heziron mbae Ram,
Ram mbae Aminadab,
20Aminadab mbae Nashon,
Nashon mbae Salimon.
21Salimon mbae Bowazi,
Bowazi mbae Obed,
22Obed mbae Jese,
Jese mbae Dawuda ama.
Currently Selected:
Ruti 4: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017