Nehemiya 1
1
Nehemiya Sa Uwae Tsi Risu Urushelima
1Ayine si ira Nehemiya umbae Hakaliya.
Yi ishaen na Kisileb yi kusang ti rikom ti Aritaserke si ukwe na Pasiya, ame Nehemiya ta Susa uten tiyang na uten wu. 2Hanani, kinjo uwae ameinja-m ti ta Yawuda, ba te kumbub na ameinja iki. Ame rang ba ira risu ameinja-ti Mbaibrane ti a ye ba apyi ba ike, ama aba kafe ru pu ba ti yi Urushelima, ti ira risu kujimshwur Urushelima. 3Aba ri te m baa, “Ande ti ter nwang ti unyang ti kafe ba yi uwae uten, ta uwae rikaen ti rikwae ti wae ti skeb risu-ba. Cwucwo ati mbye tso-ti ukoh Urushelima ti kyaensi riben khika be. Meme ifu ukoh yi ti a twen mbub si riben, kú rubwen bwe.” 4Ti ame fxen tag ira yine, ame som riben u jwub ira.
Ame jwub ira yi uwae usir yang-yi, u tsikunn ti ku cwe unju ku jwam Rimam ti apupwen. 5Ame tong unju uwog Rimam baa, “Yaweh Rimam ti ta apupwen, afu ta te kuko, ama ku nda ande ikyenricwu. Afu tsi kukunn ti ku kumunn unju ti yer-fu te ande ti ye ure te fu u ku nae risu riben na fu. 6Pu ayib sae m Yaweh. Naa atong ti fxen itijwam ti ame ku jwam usirtaen ti utitang, ikyaen apyi-fu anyisu Isirela. Ame ku ri tso baa, ati anyisu Isirela na nde pu ti ikentitibi. Ame ti kununn itse-m meme nde pu ti ikentitibi. 7Ati nde ikentitibi ti beb timambe uwog-fu. Ati ye su-ti kusen ti fwa ti icwe, ti iken ti kwen ti afu nda Musa be. 8Tine, tangsom te ira ti afu ri te upyi-fu Musa baa, ‘Asiti ani anyisu Isirela a ye su-ni unju ti yer-ni te m be, ame u byinn ni yaenshag kyife uwae uten na ande ti tsitsi meme. 9Amaa, asiti ani a kafe uwe ba tu m, u nae risu riben te icwe-m ama nde yi, ame u byir ni kafe ba ti yi uten ti ame tsab tsi ti a na fen m atang, ko ti ani a shag kyife ka furu yi fuyen utense meme.’
10“Aba si apyi-fu, u si ande-fu. Afu ti nwangru ba yi uwae kuko ti ribom ti ana-fu ti ko timambe. 11Tine, naa atong ti fxen itijwam-m, ti itijwam na meme apyi-fu ti tsitsi ti ku tsen utob kiye ti aba a ku teb rinyi-fu. Nda m ti m u tu kutxuwe tinyang uwog ukwe yaka ne ti ukwe ā sae m ti ayibrisi.”
Yi uwae kiye wune, ame ti si unde ti ku ye iken ti ngwa na ukwe.
Currently Selected:
Nehemiya 1: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
