Jona 3
3
Jona Nae Risu Riben te Ira Rimam
1Kiye wune, ira Yaweh ba kyi uwog Jona ti apu-ifaen baa, 2“Nwunn ru yi Nineve, uten tiyang wune, ka tsa na ba kutsa ti ame nda fu ti fu na ka tsa na ba.” 3Jona nae risu riben ti ira na Yaweh, u nwunn u ru Nineve. Kiye wu, Nineve si uten tiyang, ti ko timambe. Ayi u sa ikyin na usir ita titawe ti unde u kyang kae ricwunnkyi wu. 4Usir ti tawe ti Jona bag itisang uwae uten atang, awu ya iskin baa, “Isim usir mae ifaen, Nineve u mbub si riben!” 5Ande ti Nineve ru kubenti uwog Yaweh. Aba ya iskin, u sa usir ita tsi, u cwe unju meme ba. Aba pu atupwa tibyir si, ti ku tso utob tibyir-ba. Patag-ba, ko andefu ko umbae ti kitinying. 6Ti ukwe Nineve fxen iten ira ayine, awu nwunn tagbug-wu, u tunn arun-wu, u pu atupwa tibyir si ijwe-wu, u som si uwae atong. 7Ukwe nda ba ya iskin, u bae ira yine ko aka meme uwae Nineve baa, “Ni fxen icwe yine ti ru uwog ukwe ti andufu-wu ba: Ni nda-ni unde iki ti awu ā ci iken iki ko ti awu ā ngwa iken iki be. Asinn-ni ama ā ci-yi iken be, u ngwa-yi iken be, ko iwen ko indag. 8Ko aye, ande ko asinn meme, ā sī kang atupwa tibyir, unde titini ā kafe isim ta ikentitibi-wu, u jwub ira ti kpakang-wu meme uwog Yaweh. 9Aye ti nung, iki be, Yaweh u kafe, u nung risi ti, u sa ruye rinae-wu, ama u twenji-wu ati be.” 10Ti Yaweh nung iken ti aba nde, u kafe isim ta ira titibi-ba yine, awu sae ba ti ayibrisi, u nde-wu iken ti awu sa tsi ti wu na u nde te ba cwucwo be.
Currently Selected:
Jona 3: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
