Jona 4
4
Jona Ndembeb Utob Ikyaen Ayibrisi Rimam
1Jona ndembeb utob timambe ikyaen ayibrisi Rimam yine, ama u tso rinae. 2Ikyaen yine, awu jwam Yaweh, u ri baa, “Yaweh, ayine si-yi ira ti ame ri kiye ti ame ta ti uten-m be a. Ame nung baa, afu na si Rimam na ayibrisi, ure-fu ko timambe. Afu ku tso-fu rinae ti kufe be, ku yata na ande riraen-ba ti kufe. Nee iken ti nde ame kwab ti m na u ter ru yi Tarshish. 3Tine, Yaweh, ame ku jwam fu, ye ra-fu unyang-m. Ame a cwu, ayi u nyang m skeb pu yi ti m u som ti unyang.” 4Yaweh rang Jona baa, “Ayi nyang ti afu ku tso rinae ikyaen iken yine a.” 5Ama Jona nwunn u ya uwae uten atang ta, u ru yi uwe usir ti kiskinn, u ka kyae kufug u som atang ti wu u nung iken ti u nde uwae uten atang. 6Ama Yaweh Rimam nda kimbae kutuku iki shab tsoye, u nda awum-wu nda Jona utob ti jim. Uwae Jona nyang si-yi ti ti ri be. 7Ti ucwe fam kiskinn, Yaweh nda acwucwug tsoye, u kub wen ra kutuku wu, ama awu wom cwu. 8Ti usir pur ku tso, Yaweh nda ufunn ti byagkwan ru usir ti kiskinn ba. Ayam usir byinn Jona ti risu. Awu kunn ku cwu, ama u ri baa, “Iticwu nyang m skeb pu yi ti ame u som user.” 9Yaweh rang Jona baa, “Ayi nyang ti afu ku tso rinae risu kutuku wune a.” Awu cwe baa, “Een. Rinae-m pang atang. Ayi pang pu yi ti m u cwu ikyaen-yi.” 10Yaweh ri baa, “Afu ku nung risi kutuku wune, ti ayi si-yi afu ti tso, u shi ser wu be. Ayi si kutuku ti shab ru ye uwae utitang kinjo, ama u wom cwu uwae utitang kinjo. 11Ama ame u nung-m risi Nineve be a? Nung! Awu si uten tiyang ti site ande skeb kumbub mae itsongnjo (120,000) atang ti nung-ba itikanta kubenti ti itikong be, fa ti asinn yang-yi ne.”
Currently Selected:
Jona 4: kubNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
