Kucangtsi 48

Yakubu Wae Ira na Efiremu ti Manase Anyisu Yusufu

1Isim yine, Yusufu tu kutsa baa, “Nung, ijwe itse-fu ku cicaeb.” Ama awu pu anyisu-wu ifaen, Manase ti Efiremu ru uwog itse-wu. 2Ti aba ri te Yakubu baa, “Umbae-fu Yusufu ba uwog-fu,” Isirela ndub sunwunn u som ritsen.

3Ama Yakubu ri te Yusufu baa, “Rimam ti kuko ba tu m yi Luzi uwae uten ti Kanana u wae ira na m baa, 4‘Ame u nda fu, afu u mbae jwunn timambe. Ame u nda fu kafe mbukwen ande. Ama ame u sa riben wune na anyisu anyisu-fu ti ayi ā si ana ba ru fife yi uwe.’

5“Tine, anyisu-fu ifaen ba ne, Manase ti Efiremu, ti a mbae na fu yi uten Ejib, titawe ti ame ba tu fu ike, aba si anyisu-m, pangma ti Roben ti Simeyon si anyisu-m. 6Asiti afu a mbae kyi anyisu uwe ike, aba u si ana-fu tiri. A u tu rifunn-ba ru ye kutunn ameinja-ba Efiremu ti Manase. 7Kiye ti ame nwunn Padan ku ba, uwa-m Rahel cwu yi Kanana, kiye ti ati yaen-ti ti ati u ka Efirati khika be. Ama ame byir utob u sa wu nji ti iyen fengo atang. (Efirati wu, a ku kunn wu baa, Betilami tine.)”

8Kiye ti Isirela sae anyisu Yusufu ti arom, awu rang baa, “Abane si-ba arikam?” 9Yusufu ri te itse-wu baa, “Aba si anyisu ti Rimam nda m ike.” Isirela ri baa, “Pu ba ko ba ike ti m wae ira na ba.”

10Uwae kiye wu, ayib Isirela ku sae nyang-yi uwog cwucwo be, ikyaen ti, awu kyáen pu wu. Yusufu pu anyisu-wu ko ba fer itse-wu, ama awu ye ba bur utob.

11Ama Isirela ri te Yusufu baa, “Ame kab-m ti m na u nung kyi uwe-fu be, amaa Rimam nde ame ba nung anyisu-fu ama.”

12Yusufu pu ra ba ruye afxen itse-wu, u ku riben, ama u sa uwe-wu bur riben.

13Yusufu ye pu ba meme ifaen-ba ba fer itse-wu. Awu sa Efiremu tsi kujwo rici-wu rukwer kujwo ife Isirela, Manase ama awu sa tsi kujwo ife-wu rukwer kujwo rici Isirela. 14Isirela kafe ajwo-wu, u sa kujwo rici-wu nae tsa Efiremu ti si umbae tinying risu, u sa kujwo ife-wu nae tsa risu Manase, ti si umbae titawe. 15Ama awu wae ira na Yusufu u ri baa,

“Rimam ti abitse-m fen

Ibrahim ti Ishaku,

Rimam wu ti ku shi m

ba ku kwar yaka ne,

16awu ti atom-wu ti apupwen

nwangru m uwae ira titibi meme,

awu ā nde anyisu bane titinyang.

Ikyaen-ba, rinyi-m ā kunn atang,

ti ana abitse-m Ibrahim ti Ishaku.

Aba ā mbae jwunn uwae utense.”

17Ti Yusufu sae itse-wu sa kujwo rici-wu nae tsa Efiremu risu, ayi nyang-yi utob-wu be. Ama awu ye ra kujwo itse-wu ti awu u sa nwunn risu Efiremu ru yi ana Manase. 18Yusufu ri te itse-wu baa, “Iyee, itse-m, awune ti si umbae tawe, sa kujwo rici-fu nae tsa wu risu.”

19Ama itse-wu shaen-wu, u ri baa, “Ame nung pu m, umbae-m, ame nung. Awu ama u mbae jwunn u tu rurob. Amaa inja-wu titinying u tu rurob skeb ana wu, rishi-wu ama u ba si ambukwen ande.”

20Tiri awu wae ira na ba usir wu u ri baa, “Uwe ike, ande ti Isirela u wae na atso ira yi rinyi-ni baa, ‘Rimam ā nde fu titinyang pangma Efiremu ti Manase.’ ” Né iken ti nde awu sa Efiremu ta uwe Manase.

21Tiri Isirela ri te Yusufu baa, “Nung, kiye pang ku pu yi ti ame u cwu, amaa Rimam u te fu ta tetso, u pu fu kafe ba ti riben abitse-fu. 22Ame ku nda fu riben Shekem ti ame rwae mbe kujwo ande ti uten Amor ti kisum wen ti kokutá. Riben wu skeb ra ana ameinja-fu.”

Currently Selected:

Kucangtsi 48: kubNT

Highlight

Copy

Compare