Kucangtsi 47
47
Yusufu Pu Itse-wu ti Ameinja-wu Ka Uwog Ukwe ti Ejib
1Yusufu nwunn ru ka ri te Ukwe baa, “Itse-m ti ameinja-m ti asinn-ba ti meme iken ti aba site, nwunn uten ti Kanana ba pu ba. Aba ta Goshen tine.” 2Kiye ti awu ku ru yi uwog Ukwe, awu tsab ameinja-wu itsong fa imbyi ka tso Ukwe. 3Ukwe rang ameinja-wu aba baa, “Kujwo wande-ni si imi?” Aba ri te Ukwe baa, “Unyang-fu ā ko ra ru yi uwe ukwe. Ati si ande ti ku shi asinn pangma ti abitse-ti ku shi.” 4Aba ri te kyi Ukwe baa, “Ati ba ti ti ba som ra ike ikyaen ti, rimenn pu uten-ti Kanana, irum ta-yi ti asinn-ti u kub cwucwo be. Ikyaen yine, ati ku jwam fu, afu a cwe, nda ti ti ti som Goshen.” 5Ukwe ri te Yusufu baa, “Ti itse-fu ti ameinja-fu ba pu ba uwog-fu ne, 6riben ti Ejib ta kujwo-fu. Pu ba som uwog ti nyang siskeb na riben wu. Aba ā som Goshen. Asiti afu ā nung ariki uwae-ba ti ā shi tu asinn, pu ba ba ti a shi na m asinn-m.”
7Ama Yusufu pu itse-wu Yakubu ba tatso ukwe, ama Yakubu wae ira na ukwe. 8Ama Ukwe rang Yakubu baa, “Asang-fu si imwa?” 9Yakubu ri te Ukwe baa, “Uwae usom ti som-m utense, ame ku kyang pu kyang pu. Asang-m ko-yi ko be, ama u munn ti rikaen ti nde. Asang-m si nyang mae itsongnjo mbe rijwe. Asang abitse-m ko skeb pu yi ana-m.” 10Ama Yakubu wae na kyi Ukwe ira, ama u ruye-wu iken-wu. 11Ama Yusufu pu itse-wu ti ameinja-wu som uten Ejib u yer riben titinyang titinyang ti ta Ramesi na ba pangma ti Ukwe ri. 12Ama Yusufu sha wuci na itse-wu, ti ameinja-wu, ti ishikununn itse-wu pang ti ujwunn-ba.
Rimenn Pu Uten Ejib
13Uwae kiye wu, wuci ta-yi meme uten atang be, ikyaen ti, rimenn wu ti pu uten Ejib ti Kanana bom timambe u nda iken meme ru-yi risu cwucwo be. 14Ama Yusufu byir tag aser ti a tu yi Ejib ti Kanana kiye ti a ku jab wuci, u pu ba yi fikyi Ukwe ti Ejib. 15Kiye ti aser na ande ti Ejib ti Kanana mamtag pu yi, meme ande ti Ejib ba tu Yusufu u ri te wu baa, “Nda ti wuci, be ati ku cwu-ti. Aser-ti mam pu yi.”
16Yusufu ri te ba baa, “Asiti aser-ni a mam pu yi, ni pu asinn-ni ba fin wuci atang.”
17Ikyaen yine, aba pu asinn-ba ba fin wuci kujwo Yusufu. Asinn-ba yi si kakum ti iwen ti indag ti ikyinnsu meme. Kusang wu, aba pu asinn-ba patag ba fi wuci atang kujwo Yusufu.
18Ti kusang wu mamtag pu wu, kusang ti putsa aba ba tu kyi Yusufu u ri te wu baa, “Itsekuru, ati u tam-ti afu ira iki be. Aser-ti mamtag pu yi, asinn-ti ama ta pu yi kujwo-fu. Iken ti tsitsi kujwo-ti si nyáng risu-ti ti riben-ti amam. 19Ya ti ta-fu ti ti cwu tag be. Jab mbe ti, ti riben-ti, ti ti si apyi Ukwe, ti fu pu na ti wuci ti ti cwu-ti be. Nda ti itso ti ati u tom, bē, riben-ti u tsi ukaen.”
20Ikyaen yine Yusufu jab mbe tag riben ti ta Ejib u pu na Ukwe ti Ejib. Ikyaen ti, meme ande ti Ejib pu riben-ba meme jabci ikyaen ti rimenn ti pu uten atang beb timambe. Ama riben yi kafe ana ukwe. 21Yusufu pu meme ande ti Ejib pab kafe apyi. 22Awu jab mbe-wu riben akwen#47:22 Akwen bane si akwen ande ti Ejib. ama be, ikyaen ti, aba akwen site kutunn-ba ti Ukwe ku nda ba ko kiye titini. Aba shanum-ba wuci be. Nee iken ti nde aba jabci-ba riben-ba ama be. 23Tiri Yusufu ri te ande ba baa, “Tine ame jab mbe pu m ani ti riben-ni na pu m Ukwe. Itso ta re. Ni mbe ka tom. 24Kiye ti wuci yi a ben pu yi, ni kata yi kuru itsong, ti ni sa kuru kinjo ka na ukwe, ti ni pu inje ti tsitsi tsi ikyaen itso, ti ikyaen itici-ni, ani ti kusog-ni ti anyisu-ni titinying.”
25Ama aba ri baa, “Afu nwangru pu fu ati. Asiti afu a cwe ira, itsekuru-ti, ati kafe apyi Ukwe.” 26Ikyaen yine, Yusufu sa yi kafe icwe yi uten Ejib. Ba ku sang ti yaka ne, kuru kinjo uwae kuru itsong na iken ti a tu uwae risaen afang si ana ukwe. Si nyáng riben akwen amam ti si-yi ana Ukwe be.
Itijwam ti Ricwunnkyi na Yakubu
27Ama anyisu Isirela som uwae Goshen yi uten Ejib. Atang aba tu rifunn fufa ama u mbae jwunn timambe. 28Yakubu som Ejib asang rijwe asu itsongfaen. Meme asang-wu ka ukob kinjo ti mae ifaen mbe itsongfaen. 29Ti kiye ko ku fer pu wu ti Isirela u cwu, awu kunn umbae-wu Yusufu u ri te wu baa, “Asiti ame a tu kutxuwe titinyang uwe-fu, sa kujwo-fu sang runwan-m ti fu yer unju te m baa, afu na u nae risu riben ama u nde kubenti te m. Nji-fu ame yi uten Ejib ike be, 30amaa, sa m ruye ka nji ti uwog ti a nji abitse-m atang.” Yusufu cwe baa, “Ame u nde pangma ti afu ri.”
31Ama itse-wu ri baa, “Ben uben baa, afu na u nde yi.” Ama Yusufu ben uben, tiri Isirela fur risu-wu si riben risu uwaen-wu.
Currently Selected:
Kucangtsi 47: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
