Itiruye 8

1Tiri Yaweh ri te Musa baa, “Ru ka ri te ukwe ti awu ā ya ande-m ta ti a ka fen m. 2Asiti afu a pyir-fu, ame u tom arukum yaen kyi uwae uten-fu meme. 3Uyinn Nel u munnkyi ti arukum, u tso ba yaen kyife asog ti iwaen-fu ti asog afaen-fu ti ana ande-fu meme, kaa sang fife yi asog ti a ku nde wuci atang. Ayi u ka munnkyi kuseb ti a ku fxab buredi ti uwog ti a ku fxab yi. 4Arukum yi u mbyae tso fu ti ande-fu ti afaen-fu ijwe meme.”

5Ama Yaweh ri te kyi Musa baa, “Ri te Aruna ti awu ā sa ukum yang risu uyinn ti akya-ukab ti rimang ti arukum ā yaen kyife uwae uten Ejib meme.” 6Ama Aruna sa ukum-wu yang risu ambyi ti ta Ejib, ama arukum yaen shag kyife uwae uten Ejib. 7Amaa, ande ba ti ku caen upwen nde ti mbwe-yi yi fengo kumbog-ba, ama u nda arukum yaen shag kyife uwog meme uwae uten Ejib.

8Tiri Ukwe kunn Musa ti Aruna u ri baa, “Ni jwam Yaweh ti awu ā pu ru arukum yine uwog-m ti ande-m. Ame u ya anyisu Isirela ta ti a ru ka twen ikentitwen na Yaweh.”

9Musa ri te Ukwe baa, “Afu a cwe, nda m kiye ti ame u jwam Rimam na fu, ti afaen-fu, ti ande-fu, ikyaen ti arukum yi ā ya ni ta, ti ayi ā ta nyang uwae uyinn Nel amam.”

10Ukwe ri te Musa baa, “Nde yi ucwe.” Musa ri baa, “Ame u nde pangma ti afu ri ikyaen ti fu nung baa, apxin iki na ta-wu ti pangma Yaweh Rimam-ti be. 11Arukum yi u ya asog-fu ti ana afaen-fu ti ana ande-fu ta, u ta nyáng uwae Nel amam.” 12Ikyaen yine, Musa ti Aruna nwunn uwe Ukwe. Ama Musa ka jwub ira tu Yaweh risu arukum yi ti awu tom sang uten Ejib. 13Yaweh fxen ira ti jwub Musa u nda arukum yi ti ta uwae asog, ti ayi ti ta fenkyi ukwe, ti ayi ti ta tabmae meme, cwu tag. 14Ama aba pu funn yi kucwug kucwug. Ayi nda uwae uten atang ku nung kurwá si-yi ti ti ri be. 15Amaa ti Ukwe nung baa, ufunn na ter sang pu wu ijwe, awu yirkyi utob-wu u fxen-wu Musa ti Aruna cwucwo be, pangma ti Yaweh ri.

Sasó Sikyi Uten Ejib

16Ama Yaweh ri te Musa baa, “Ri te Aruna ti awu ā sa ukum-wu byinn riben ti sasó ā yaen shag kyife uten Ejib meme.” 17Ama aba nde yi. Aruna ndabta kujwo-wu, u sa ukum-wu byinn riben, ama sasó yaenkyi ande ti asinn meme. Meme uten Ejib yaenkyi ti sasó. 18Ande ti ici ti ta Ejib kwáb uwae fengo kumbog-ba ti a na u pu ru ye sasó yi, u ndenum. Sasó yi yaen kyi ande ti asinn meme. 19Ama ande ti ici ba ri te Ukwe baa, “Ayine si kujwo wande Rimam.” Amaa Ukwe yirkyi utob-wu u fxen-wu aba be, pangma ti Yaweh ri.

Akying Yaenkyi Ejib

20Tiri Yaweh ri te Musa baa, “Nwunn ti kiskinn fifae ka tu Ukwe kiye ti awu ku si yi unju ambyi, ti fu ri te wu baa, ‘Ira ti Yaweh ri ta re. Ya ande-m ta ti a ru ka fen m. 21Asiti afu a ya ande-m ta-fu ti a na ru be, ame u yaen akying si fu ti afaen-fu ti ande imbyi-fu, ti asog-ni meme. Ayi u shag kyife asog ande ti Ejib fa ti riben uwog ti aba ta atang meme. 22Amaa, yi usir wu, ame u kag ra Goshen, uwog ti som ande-m, tsi iyen, ti akying yi ā ka-yi atang be, ti fu nung baa, ame Yaweh na site kuko uwae uten wune. 23Ame u sa ice si kutampwa-fu ti ande-m. Ucwe, iken ti ku fur ayib yine u nde.’ ” 24Ama Yaweh nde pangma ti awu ri. Awu yaen akying si kununn Ukwe ti ana ande-wu meme. Uwae uten Ejib munnkyi ti akying.

25Tiri Ukwe kunn Musa ti Aruna u ri te ba baa, “Ni ru ti ni ka twen ikentitwen yi na Yaweh Rimam-ni ti uwae uten ike.”

26Amaa, Musa ri baa, “Ayi u nyang-yi ti ati u nde ahan be. Ikyaen ti, iken ti twen ti ati u twen na Yaweh Rimam-ti u si iken ti ku txiyib uwog ande ti Ejib. Asiti ati a twen ikentitwen ti ku txiyib ti ayib ande ti Ejib ba, aba u jwunn-ba ati atxom be a. 27Ati u kyang ikyin usir ita sang yi kutur kaa twen ikentitwen na Yaweh, Rimam-ti pangma ti awu ri te ti.”

28Ama Ukwe ri baa, “Ame u ya ni ta ti ani u ru kaa twen ikentitwen na Yaweh Rimam-ni, amaa, ani ru-ni rurwen be. Ni jwam na m itijwam.”

29Tiri Musa ri baa, “Nung, ame u ru ye ike kaa jwam Yaweh ti akying yi ā ya Ukwe ti afaen-wu ti ande-wu ta ucwe. Ama Ukwe, kyaefa-fu ati cwucwo be, ti afu u ba pyir ti ande ba na ka twen-ba iken ti twen na Yaweh be.”

30Musa nwunn uwe Ukwe, u ka jwam Yaweh ti wu na pu ru ye akying yi. 31Ama Yaweh nde iken ti Musa jwam, u pu ru ye akying yi uwog Ukwe ti afaen-wu ti ande-wu uwae Ejib. Ko ikying kinjo tsitsi-wu uwae uten atang be. 32Amaa Ukwe yirkyi utob-wu, u nda-wu ande ba ti a na ru be.

Currently Selected:

Itiruye 8: kubNT

Highlight

Copy

Compare