Itiruye 7
7
Ira ti Tibi Tu Ande ti Ejib
1Ama Yaweh ri te Musa baa, “Sae! Ame nda pu m afu ti fu si pangma Rimam uwog Ukwe. Aruna, inja-fu ama u si atom-fu. 2Afu u ri te Aruna meme ira ti ame ri te fu. Awu ama u ri yi te Ukwe ti Ejib ti awu ā ya anyisu Isirela ta ti a na ruye uwae uten-wu. 3Amaa, ame u yirkyi utob Ukwe, awu u fxen-wu ani be. Ko ti ame u tatso wu iken ti ku fur ayib ti itsotso uwae uten Ejib, 4awu u fxen-wu ani be. Ama rinae-m u si ba risu Ejib beb beb. Ame u pwen ba rikwen ti ribom. Ame u pu ande-m anyisu Isirela ru ye ti kumbub kumbub-ba. 5Ama ande ti Ejib u nung baa, ame na si Yaweh kiye ti ame a ndabta kujwo-m, u tsi ukub te ba, u pu ruye anyisu Isirela kutampwa-ba.” 6Ama Musa ti Aruna nde ti mbwe-yi iken ti Yaweh ri te ba. 7Musa site asang mae inje, Aruna ama site asang mae-inje mbe ita kiye ti aba ri ira te Ukwe.
Ukum Aruna Kafe Ikentibi
8Ama Yaweh ri te Musa ti Aruna baa, 9“Kiye ti Ukwe a ri te ni baa, ‘Ni tso m iken ti ku fur ayib ti u tso kuko Yaweh-ni awu,’ ri te Aruna ti awu ā sa ukum-wu jwunnsi riben uwe Ukwe. Ukum wu u kafe ikentibi.” 10Ikyaen yine, Musa ti Aruna nwunn u ru uwog ukwe, u ka nde pangma ti Yaweh ri te ba. Aruna sa ukum-wu jwunnsi riben uwe Ukwe ti afaen-wu, ama ukum wu kafe ikentibi. 11Ukwe ama kunn byir ande-wu ti ben-ayib, ti aba ti ku caen upwen ti ta uwae Ejib. Aba nde ti mbwe-yi uwae kumbog-ba. 12Unde titini sa ukum-wu jwunnsi riben, ama meme ikum-ba yi kafe ikentibi. Amaa ukum Aruna ye pu ana-ba yi meme mennsi tag. 13Ko ti ayi nde ahan, Ukwe yirkyi utob-wu, u fxen-wu aba be, pangma ti Yaweh ri.
Uyinn ti Nel Kafe Anying
14Ama Yaweh ri te Musa baa, “Utob Ukwe yirkyi pu wu, awu cwé-wu ti ande ba na ru be. 15Kiskinn fifae, ukwe u si unju uyinn. Sa ukum wu ti kafe ikentibi ne, ka tsi ji wu unju uyinn Nel atang. 16Ama ti fu ri te wu baa, ‘Yaweh, Rimam na Mbaibrane, tom m atom ba uwog-fu baa, “Ya ande-m ta ti aba ā ru ka fen m uwae kutur kuka. Ba ku kwer ne, afu nae-fu risu riben be.” 17Yaweh ri kyi baa, “Ame u tso fu baa, ame na si Yaweh. Nung! Ame u sa ukum ti ta kujwo-m ne byinn risu ambyi ti Nel wune, ama ayi u kafe anying. 18Iwag ti ta uwae uyinn Nel wu u cwu. Ama ambyi Nel wu u nùng itso kurwá ti ande ti Ejib u ngwa tu-ba yi be.” ’ ”
19Yaweh ri te Musa baa, “Ri te Aruna ti awu ā sa ukum-wu ndab naetsa risu ambyi ti ta Ejib. Ayi ti ta uyinn-ba, ti ukab-ba ti aba taen, ti ukwae ambyi ti aba mum, ti uwog ti ambyi nae atang, ti ayi ā kafe anying, ti anying ā shag kyife uten Ejib meme fa ti ayi ti ta kupám, ti kúm ricwo meme.”
20Musa ti Aruna nde pangma ti Yaweh ri te ba yi uwe Ukwe ti afaen-wu. Awu sa ukum byinn ambyi ti ta uyinn Nel ama meme ambyi yi kafe anying. 21Ama iwag ti ta uwae uyinn Nel cwu tag. Ambyi wu ama nùng kurwá gbunng ti ande ti Ejib ngwa tu-ba yi be. Anying ama takyi fe uwog meme uwae uten Ejib. 22Amaa, ande ti kumbog na Ejib nde ti mbwe-yi uwae kumbog-ba, ama Ukwe yirkyi utob-wu u fxen-wu Musa ti Aruna be, pangma ti Yaweh ri. 23Ukwe kafe ru yi kununn-wu u sa-wu uwae iki atang be. 24Ama meme ande ti Ejib mum ukwae kyife unju uyinn Nel ku sha ambyi ti ngwa, ikyaen ti, aba ngwa tu-ba ambyi Nel wu be.
Arukum Munn Kyife Uwog Meme
25Usir itsongfaen wur ru, isim ti Yaweh nda uyinn Nel kafe anying.
Currently Selected:
Itiruye 7: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
