Itiruye 31
31
Yaweh Tsab Ande ti u Kyae Uwog ti Som Wu
(Itiruye 35:30-35; 36:1)
1Yaweh ri te Musa baa, 2“Nung! Ame tsab pu m Bezalel, umbae Uri, ti si umbae Hur, uwae rishi Yawuda. 3Ame kumunn pu m awu te kusung Rimam, ti itindetu, ti ben-ayib, ti itinungye na meme iken ti ti nde tu ajwo. 4Ame u nda wu itsab ti wu pu zinariya ti azurfa ti bronzi kyae tu iken te yi, 5ti wu pab tu atxom ti ku jae ayib ti a pu fxebfa kutupwa, u pab tu ituku, u nde tu iken ajwo meme. 6Cwucwo, ame tsab pu m Oholiyab, umbae Ahisamaki, uwae rishi Dan ti wu ndeya Bezalel. Meme ande ti site itsab, ame nda pu m aba ben-ayib itindetu iken ajwo, ti a u nde meme iken ti ame tso fu ti fu na nde, 7ti si kufug itifen-m, ti akpati unju ti yer, ti kubur-wu ti si uwog itiyata ikentitibi, ti meme isu ti a kyae yi tsi uwae kufug wu, 8ti tebur wu ti isu ti a pu tsitsa atang, ti iken ti a pu fitila tsitsa atang ti a kyae yi te zinariya ti meme isu-yi, ti kuta ti a ku twen iken ti ku nung kuyang atang, 9ti kuta rinyangwae na ibye ti twen ti isu-wu meme, ti kusan tiyang ti uwog ti tsi-wu, 10ti atupwa ti a ndxob yi nyinyang ti si atupwa ti ku cwucwe ti Aruna ti anyisu-wu u ku si kiye ti aba a ku nde wande na kukwen, 11ti kindob itiyerkob, ti iken ti twen ti ku nung kuyang ikyaen uwog ti sisaen wu. Aba u nde yi pangma ti ame ri te fu.”
Icwe Risu Usir Ikyinn
12Yaweh ri te Musa baa, 13“Ri te anyisu Isirela baa, ‘Ni ye su usir ikyinn nyinyang. Ikyaen ti, ayi ku tatso unju ti yer ti ta kutampwa-m te ni iken ti sa yaka ne ru fife yi uwe, ikyaen ti ani u nungye baa, ame Yaweh ti na jwosaen ni. 14Ni ye su usir ikyinn ikyaen ti, awu si usir ti sisaen uwog-ni. Unde ti a sor ndembeb usir wu, a u wen wu. Unde ti a nde wande usir wu, a u pwen wu fa-ba uwae ande-wu be. 15Uwae usir itsongnjo, ni nde tag wande-ni atang, amaa usir ti itsongfaen si usir ti ani u pu unyang. Awu si usir ti sisaen ana Yaweh. Unde titini ti a nde wande uwae usir wune, a u wen wu. 16Ikyaen yine, meme anyisu Isirela ā ye su kunn usir wu. Aba ā ku fen kob m usir wu. Usir wu si unju ti yer kutampwa-m te ni ru fife yi uwe. 17Usir wune si usir ti tatso unju ti yer kutampwa-m te anyisu Isirela baa, ame Yaweh mam apupwen ti riben uwae usir itsongnjo, amaa, usir ti itsongfaen, ame nde-m wande iki atang be, u pu unyang atang.’ ”
18Isim ti Yaweh ri tag ira yine te Musa yi utaen rikwen ti Sinai, awu nda Musa afxae atxom ifaen ti awu Rimam bae icwe unju ti yer si atang.
Currently Selected:
Itiruye 31: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
