Itiruye 30

Kuta Iken ti ku Nung Kuyang

(Itiruye 37:25-28)

1“Pu ituku akasiya ti kwer kuta ikentitwen ti ku nung kuyang atang na m. 2Rikob kuta wu ā si kufxen kinjo ti ripye, riyaen-wu ā si kufxen kinjo ti ripye. Riyaen-wu ti rikob-wu ā kpang atso. Rikob-wu ti tso ritsen ama ā si kutun kujwo ifaen. Kyae ishin tso meme ukub inje na kuta wu. 3Fxebkyi risu-wu, ti iyen kyab iyen kyab-wu ti sangkob ti zinariya ti tinyang, kwer ti ishin-wu meme. Pu zinariya mbye ukub sangkob kutong kuta wu. 4Kwén kunyang ti fu pu ifaen sang ukub yi iyen ikyab ne, ifaen ama u sang iyen kyab ti ifaen ikyaen ti a ku pu ikum sang atang ku su kuta wu. 5Kyae ikum yi ti kutuku akasiya, u shi yi ti zinariya. 6Sa kuta wu tsi fer kutupwa ti sikyi akpati unju ti yer wu, fer ti uwog ti ame u tu fu atang, risu kubur akpati wu. 7Kiye ti Aruna a sang ba ku bae fitila kiskinn kiskinn, awu ā twen na m iken ti ku nung kuyang ti tinyang risu kuta wu. 8Ko ureb titini ti awu a ku kyae fitila, awu ā twen na m iken ti ku nung kuyang yine. Ititwen na iken ti ku nung kuyang yine u be-yi be be, ru fife yi utso-ni ti ku ba isim. 9Twen-fu iken ti twen ti ajib iki risu kuta wu be, ko rinyangwae na iken ti twen, ko ana wuci, ko ana iken ti ngwa. 10Kipaen kinjo uwae kusang, Aruna u ku sa anying ca si ishin kuta wu ikyaen itiyata na ikentitibi. Ani ti anyisu-ni u ku nde yi ru fife yi uwe, ikyaen ti kuta wu si kuta ti sisaen ana Yaweh.”

Aser ti A Yer Ikyaen Uwog Ti som Yaweh

11Yaweh ri te Musa baa, 12“Kiye ti afu ā ku pwen ande Isirela, unde titini ā jab mbe unyang-wu ti aser kujwo Yaweh kiye itipwen-ba. Ikyaen ti itibi iki a tu-yi aba kiye itipwen-ba be. 13Unde titini ti a pwen pu ba wu, awu ā pae ukapam kitu kumyae na azurfa ti a ku myae iken atang kusog Rimam. Unde titini u pae kiser wune na Yaweh. 14Unde titini ti asang-wu a ka rikom tso yi uwe, awu ā pae kiser wune na Yaweh. 15Kiye ti aba a ku pae kiser wune na Yaweh ikyaen itiyata ikentitibi-ba, ko unde ti rifunn, ko unde ti rikaen ā pae pang atso. Unde iki u pae yib skeb-wu ukapam kitu kumyae be. 16Mbe aser itiyata ikentitibi yine kujwo anyisu Isirela ikyaen wande na kufug itifen Yaweh. Ayi u nda Yaweh u tangsom te anyisu Isirela, ama u jwo saen ba.”

Kusan Ajwo ti Jwo Kiser Tiyang

(Itiruye 38:8; 25:1-26; Matiyu 17:24)

17Yaweh ri te Musa baa, 18“Pu bronzi mbye kusan ajwo ti jwo. Pu kyi bronzi mbye afxen-wu atang. Ye wu ka tsi kutampwa ufug úfunn ti kuta na iken ti twen, ti fu txi ambyi si atang. 19Aruna ti anyisu-wu ā ku jwo ajwo-ba ti afxen-ba atang. 20Kiye ti a ku sang yi kufug itifen Yaweh, ko aba a ba ku fer kuta ti a ku twen ikentitwen na Yaweh, aba ā jwo afxen ti ajwo-ba, be a u cwu. 21Aba ā jwo afxen-ba ti ajwo-ba, be a u cwu. Ayine u si iken ti aba ti anyisu-ba u nde ru fife yi uwe.”

Kindob Itiyerkob

22Yaweh ri te Musa baa, 23“Naa ren iken ti ku nung kuyang ti tinyang yine. Ayi si akang murr kilo itsongnjo, ti umung sinamon ti ku nung kuyang, ti kindob irum kalamus ti ku nung kuyang, kilo ita ita, 24ti kasiya ti ku nung kuyang kilo itsongnjo, ti kindob olifi lita inje. Myae yi te kitu kumyae azurfa ti a ku myae iken atang kusog Rimam. 25Pangma ti a ku kyae kindob ti ku nung kuyang, ye iken yine ti fu kyae kindob ti sisaen ana itiyerkob te yi. 26Yerkob kufug itifen Yaweh ti akpati unju ti yer te yi, 27ti tebur ti meme isu-yi, ti fitila ti isu-yi, ti kuta ti a ku twen iken ti ku nung kuyang atang, 28ti kuta rinyangwae na ibye ti twen ti isu-yi meme, ti kusan-wanam ti afxen-wu, ti iken ti ta uwae-wu meme. 29Yerkob yi ti ayi ā si iken ti ku cwucwe. Meme iken ti a tekunn yi, u kafe iken ti ku cwucwe. 30Sa kindob yi si Aruna ti anyisu-wu ti arom risu, ti fu yerkob ba ti aba ā nde na m wande na akwen. 31Ama ri te anyisu Isirela baa, ‘Bag tine ru fife uwe, ayine ti u si kindob-m ti sisaen ti a ku yerkob ande atang. 32Ni sa yi yaensi-ni ijwe unde ti ukaen be. Kyae-fu iki ti rukwer-yi be. Ye su yi cwucwe, ama ayi u si iken ti ku cwucwe uwog-fu 33Unde ti a kyae kindob rukwer-yi, ko awu a sa yi yaensi unde ti si-wu kukwen be, ni pwen wu fa-ni uwae ande-wu cwucwo be.’ ”

Ikentitwen ti ku Nung Kuyang

34Yaweh ri te Musa baa, “Pu iken ti ku nung kuyang yine ti fu kyae iken ti ti twen ti ku cwucwe atang. Ayi si umung sitate, ti umung onika, ti akang galbanum ti wuwom. Pu iken ti ku nung kuyang ti ku cwucwu yine naafa te akang frankisi. Myae yi pang atso pang atso. 35Nde iken ti ku nung kuyang ti saen kyag yine pangma ti unde ti ku nde kindob ti ku nung kuyang ku nde. Pu rinwaen si atang ti ayi ā tsi cwucwe. 36Pwa ariki nininam ama ti pu yi si uwe akpati unju ti yer, uwog ti ame u tu fu atang uwae kufug itifen Yaweh. Sa yi tsi cwucwe. 37Ni naa-ni iken ti ku nung kuyang iki pangma ayine na ijwe-ni be. Sa yi tsi cwucwe ikyaen Yaweh. 38Unde ti a kyae kindob pangma ayine ikyaen wande ti ana-wu, ni pwen wu fa-ni uwae ande-wu cwucwo be.”

Currently Selected:

Itiruye 30: kubNT

Highlight

Copy

Compare