Itiruye 14
14
Anyisu Isirela Yen Uyinn Tibyaen
1Tiri Yaweh ri te Musa baa, 2“Ri te anyisu Isirela ti a kafe ti isim ka sim afug u nae uwe uten ti Pi-Hahiroti, kutampwa Migidol ti uyinn, uwe Baal Zefon. 3Ikyaen ti, Ukwe u kab baa, ‘Anyisu Isirela sang pu ba uwae rikaen ti skeb risu-ba uwae kutur, u shanum pu ba fengo ti aba u ruye.’ 4Ame u yirkyi utob Ukwe, awu u rwae tsa ba, ama ame u tu kuko risu Ukwe ti meme akyirten-wu. Tiri ande ti Ejib u ba nung baa, ame na si Yaweh.” Ama anyisu Isirela nde ti mbwe-yi ti awu ri.
Ukwe ti Akyirten-wu Rwaetsa Anyisu Isirela
5Ti Ukwe ti Ejib fxen baa, anyisu Isirela na ter ru pu ba, awu ti ande imbyi-wu kafe utob risu anyisu Isirela. Aba ri baa, “Ayine si imi ti ati nde, nee ati ya apyi-ti anyisu Isirela ta ti a na ru.” 6Ama Ukwe sa kuskus ti kya fa kakum-wu ti ritsen ka kunn byir akyirten-wu. 7Awu tsab kike kakum ukob itsongnjo ti ku ter nyae timambe, ti meme kuskus ti kya fa kakum ti ta uwae Ejib, ti ande ti ku tso yi. 8Ama Yaweh yirkyi utob Ukwe ti Ejib, awu rwae putsa anyisu Isirela ti ru ku ye uten-wu ti ipam ti pam. 9Ande ti Ejib ti meme kakum rika-ba, ti kuskus ti kya fa kakum-ba, ti ande ti tso kakum, ti akyirten ana ukwe, rwae ye anyisu Isirela yi unju uyinn uwog ti a sim afug-ba fer ti uten Pi-Hahiroti, uwe Baal zefon.
Ikyenricwu Ye Anyisu Isirela
10Kiye ti Ukwe ba ku fer, anyisu Isirela kafe ayib u sae ande ti Ejib txong putsa ba, ama ikyenricwu ye ba, aba jwub ira tu Yaweh. 11Aba rang Musa baa, “Askab ti ku nji ande ta-yi Ejib be nee afu pu ti ba ku twenji uwae kutur ike a. Ayine si imi ti afu nde, ti afu pu ti ruye uwae Ejib? 12Ayine si-yi ira ti ati ku ri te fu ti kiye ti ati ta ti Ejib akwen baa, afu na ya ti ta ti ti na si apyi ande ti Ejib be a. Ikyaen ti, ayi nyangskeb ti ati u si apyi ande ti Ejib tí ti ati u ba cwuji uwae kutur ike.”
13Ama Musa ri te anyisu Isirela baa, “Ni kyen-ni ikyenricwu be. Ni tsi skirr ti ni sae itinwangru ti Yaweh u sa ba yaka ne. Ande ti Ejib ba ti ani ku sae ba ne, ani u nungkyi-ni aba cwucwo be. 14Ni tsi skirr. Yaweh u ta rika ikyaen-ni.”
15Yaweh rang Musa baa, “Imi ti nde afu jwub ira ba ku tu m? Ri te anyisu Isirela ti a na ru yi uwe. 16Sa ukum-fu ti ndabta wu naetsa risu uyinn ti awu ā kata ifaen, ti anyisu Isirela ā yen putsa riben ti wom ru. 17Ame u yirkyi utob ande ti Ejib ikyaen ti a u putsa anyisu Isirela isim sang uwae uyinn wu. Ama ame u tu kuko risu Ukwe ti meme akyirten-wu ti kuskus ti kya fa kakum-wu ti ande ba ti ku tso yi. 18Kiye ti ame a tu pu m kuko risu Ukwe ti kuskus ti kya fa kakum-wu, ti ande ti ku tso yi, ande ti Ejib u nung baa, ame na si Yaweh.”
19Tiri atom Rimam ti ta uwe anyisu Isirela ku tae ba, nwunn kafe ba tsi isim-ba. Kubyi wu ti ta uwe-ba kafe ba tsi isim-ba. 20Kubyi wune tsi kutampwa akyirten ande ti Ejib ti ana anyisu Isirela, ku nda anyisu Isirela uwog ti sisaen, ku sa kufub sikyi ande ti Ejib. Ama aba ti ande ti Isirela sae-ba atso be pu ucwefam.
21Musa ndabta kujwo naetsa risu uyinn wu, ama Yaweh tom ufunn ti kpakang ru usir ti kiskinn ba tur ambyi kafe ti isim. Uyinn wu kata ifaen, ama riben uyinn wu kafe ti wom. 22Isirela kyang putsa riben ti wom. Kupwe ambyi ama tso kujwo rici ti kujwo ife-ba meme. 23Ande ti Ejib ti meme kuskus ti kya fa kakum-ba, ti akyirten-ba, rwae putsa anyisu Isirela si fife yi uwae uyinn wu. 24Ti ucwefam ku si, Yaweh sae ayib ruye uwae kubyi ti urwa u sae akyirten Ejib, ama u ye ba kyirunn. 25Awu nda afxen kuskus ti kya fa kakum-ba rob ting, ama ku kyang tu-yi ikyin cwucwo be. Ande ti Ejib ri baa, “Ti ter ru ti ti ya ba ta, be Yaweh ti ku ta ti rika yine ikyaen-ba.”
26Ama Yaweh ri te Musa baa, “Ndabta kujwo-fu naetsa risu uyinn ti ambyi ā kafe ba yaenkyi ande ti Ejib ti kuskus ti kya fa kakum-ba ti ande ti ku tso yi meme.” 27Musa ndabta kujwo-wu naetsa risu uyinn wu, ama ti ucwefam ku si, ambyi uyinn wu kafe ba munnkyi ti mbwe-yi. Ande ti Ejib kwab ti a na u ter ruye uwae uyinn wu, amaa, Yaweh nda ba ngwa cwu uwae uyinn atang. 28Ambyi tum ba kukyi kuskus ti kya fa kakum-ba, ti ande ti tso kakum yi, ti meme akyirten Ukwe ba ti rwae putsa anyisu Isirela sī uwae uyinn. Ko unde kinjo uwae ba nwangru-wu be. 29Amaa anyisu Isirela kyang yen uyinn wu yi riben ti wom. Kupwe ambyi yi ama tso kujwo rici ti kujwo ife-ba.
30Yi fengo wune, Yaweh nwangru anyisu Isirela kujwo ande ti Ejib. Anyisu Isirela sae akom ande ti Ejib shag kyife unju uyinn atang. 31Ti Isirela nung kuko Yaweh ti awu tso risu ande ti Ejib, aba kyen ikyenricwu Yaweh, u ru kubenti uwog Yaweh ti upyi-wu Musa.
Currently Selected:
Itiruye 14: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
