Itiruye 12
12
Itiyafe Yaweh
1Yaweh ri ira te Musa ti Aruna kiye ti aba ta ti uwae uten Ejib baa, 2“Ushaen wune u si ushaen titawe na usang ti tawe uwog-ni. 3Ri te meme kumbub Isirela baa, usir ti fa ti rijwe na ushaen wune, ko unde ti tine ā ye imbae iwentam kinjo ikyaen ishikununn itse-wu. 4Asiti ishikununn iki a yib sha-wu ti a u kub tag mbawen kinjo, unde wu ā te unde ice-wu ren atso ren risu imbawen kinjo, ikyaen ti ko aye ishikununn-ba ā tu kutunn ibye-wu ti wu kub. 5Ni ye mbawen tam ko mbawen ten tishir ti site kusang kinjo, ti si-wu te kicaeb ijwe-wu be.
6“Ni kya mbawen yi tsi, se usir ushaen wune a ka pu wu rijwe asu inje. Ureb usir wu, ko aye uwae Isirela u yer wen ana-wu, 7u pu anying yi shin firem kusog uwog ti a u som atang u kub ibye yi. 8Utitang wu, a u fxab ibye yi u kub yi fa tí atsing áten ti nunngag tí buredi ti a pu yisiti si-ba atang be. 9Ni kub-ni ibye yi ti itikong ko ni to yi to be. Amaa ni fxab ibye yi fxab fa ti akpir-yi ti asham ti uwae-yi meme. 10Ani u kub tag yi ti ureb usir wu. Ni ya iki ta-ni kiskinn be. Asiti ibye yi iki a tsitsi ba kwer kiskinn, ni twen mbub yi mbub. 11Fengo ti ani u kub ibye yi ta re: Ni cwun benti nyinyang ti ni tso apwafxen-ni, ti ni pu ukum-ni fa ajwo. Ani u kub yi ti kufe. Ayine si Ukwab Itiyafe na Yaweh.
12“Utitang wu ame u yafe uten Ejib, u wenji patag umbae titawe ande ti asinn meme ti ta uten Ejib. Ame u pwen meme apxin Ejib rikwen. Ame ti si Yaweh. 13Anying ti ta ufu kusog-ni u tatso m uwog ti ani nae atang. Kiye ti ame a nung anying yine, ame u yafe kununn-ni. Itibi ti ame u sa si unde ti Ejib u tu-yi ani be. 14Ani ti anyisu-ni ā tsikunn ku tangsom te usir wune, ti ni nde ukwab u fen m Yaweh atang ru fife yi uwe. 15Uwae usir itsongfaen, ani u ci buredi ti a pu yisiti si-ba atang be. Usir ti tawe, ani u pu ru tag yisiti meme uwae asog-ni. Unde ti a ci iken iki ti yisiti si atang uwae usir itsongfaen na ukwab yi, a u pwen unde wu fa-ba uwae ande-m Isirela cwucwo be. 16Yi usir ti tawe, ani u kunn úfunn ti sisaen. Unde iki ā nde-wu wande usir wu be, se wuci ti ani u nde amam. 17Ani u nde ukwab wune ti ni tangsom te usir ti ame pu ruye meme anyisu Isirela uwae uten Ejib. Ani u ku ci ukwab wune uwae kusang kusang, ko kiye titini uwae usom ti som-ni. 18Bag ti ureb na usir ti rijwe asu inje na ushaen titawe ka sang usir ti rikom asu kinjo na ushaen wu, ani u ci buredi ti a pu yisiti si-ba atang be. 19Ikyaen yine, uwae usir itsongfaen yine, ni ya yisiti ta-ni uwae kusog-ni be. Asiti unde iki a ci wuci ti a pu yisiti si atang, a u pwen wu fa-ba uwae anyisu Isirela be, ko unde wu a si rikyen ko urae Isirela. 20Uwae usom ti som-ni ko aka, ani u ci-ni buredi ti yisiti be.”
21Tiri Musa kunn funn ande ndufu Isirela meme u ri te ba baa, “Ni ka tsab mbawen ti ani u kub wu yi ishikununn-ni, ti ni wen ikyaen Ukwab na itiyafe. 22Ni sa sosó skib sī uwae anying yi ti ta uwae kitu, ti ni sa shi firem kusog-ni. Unde iki ā ruye-wu ise be, se kiskinn. 23Ikyaen ti, Yaweh u yafe uwae uten wu, u wen ande ti Ejib. Amaa, awu a nung anying ti shi ufu kusog, awu u yafe u nda-wu ti iticwu na sang ishikununn-ni be. 24Ayine u si icwe uwog-ni, ti anyisu-ni ti ani u ye su ru fife yi uwe. 25Kiye ti ani a sang ka som pu ni uwae uten ti Yaweh yer unju ti wu nda ni, ani ti anyisu-ni u nde ukwab wune ti kusang kusang. 26Asiti anyisu-ni a rang ni baa, ‘Imbyi ukwab wune si imi?’ 27Ani u ri te ba baa, ‘Ayi si iken ti twen ti ati ku tangsom ti itiyafe na Yaweh ti awu yafe anyisu Isirela u ka wen ande ti Ejib. Amaa, awu nde-wu ati iken iki be.’ ” Ama anyisu Isirela fur risu riben u fen Rimam. 28Ama anyisu Isirela ka nde ti mbwe-yi ti Yaweh ri te Musa ti Aruna ti a na nde.
Iticwu Anyisu ti Tawe na Ande ti Ejib
29Uwae kukatitang wu, Yaweh wen tag meme anyisu ti tawe ande ti Ejib, bag ti umbae ti tawe na Ukwe wu ti somtsa kutxomkwe, ka sang ti aba ti ta pursuna, fa ti asinn meme. 30Ukwe ti afaen-wu ti ande ti Ejib nwunn utitang wu, ku jwub ricwu. Ukunn ricwu kyife uwog uwae Ejib, ikyaen ti, meme ishikununn ti Ejib, unde cwu atang. 31Ti utitang wu, Ukwe kunn Musa ti Aruna u ri baa, “Nwunn ti ni ruye kutampwa ande-m, ani ti anyisu Isirela, ti ni ru ka fen-ni Yaweh-ni pangma ti ani ri. 32Ni pu meme iwen-ni ti indag-ni ti ni ru. Amaa, ni wae na m ira titawe.”
Itiruye Anyisu Isirela Uwae Uten ti Ejib
33Ama ande ti Ejib ku tur anyisu Isirela tur ti a na ruye ti kufe uwae uten atang, be aba na cwu ku tag-ba. 34Ikyaen yine, Isirela sa kiraen buredi ti a tsinn u pu yisiti si-ba atang be, sī uwae kitu ti a ku tsinn iken atang, u yirkyi, ama u ye byinn ukwae-ba. 35Anyisu Isirela nde meme iken ti Musa ri te ba ti a na nde. Aba jwam azurfa ti zinariya ti atupwa kujwo ande ti Ejib. 36Yaweh nda anyisu Isirela tu kutxuwe ti tinyang uwog ande ti Ejib, ikyaen ti, meme iken ti aba jwam, a pu na ba. Yi fengo wune, anyisu Isirela su pu rifunn ande ti Ejib ru te yi.
37Ama anyisu Isirela nwunn Ramesi, u kyang afxen ku ru yi Sukoti. Ujwunn ba ka kumbub ande ukob itsongnjo, a pwen anda ti anyisu fa-ba atang be. 38Ande yang-ba sang fa anyisu Isirela fa ti asinn yang-yi akwen, indag ti iwentam ti iwenten. 39Aba sa kiraen buredi ti a nwunn te yi yi Ejib fxab, u nde buredi ti site-yi yisiti be, ikyaen ti, a rwae ba ru ye Ejib, ama aba nwunn uwae ukunn, u nde-ba wuci iki ti a u ci fengo be.
40Anyisu Isirela som yi uten Ejib ka asang ukob inje ti rijweta. 41Uwae usir ti ricwunnkyi na asang ukob inje ti rijweta yine, meme ujwunn ande Yaweh nwunn ruye uwae uten Ejib. 42Utitang wu si utitang ti Yaweh nyinn kicwag ti wu pu anyisu Isirela ruye yi uten Ejib. Isirela yerkob utitang wune ikyaen ti a na u nyinn kicwag atang u fen Yaweh ko kiye titini uwae usom ti som-ba.
Icwe Ukwab Itiyafe
43Ama Yaweh ri te Musa ti Aruna baa, “Icwe na Ukwab Itiyafe ta re. Unde ti rikyen u ci-wu ukwab yine ama be. 44Amaa, upyi ti ani jab ti aser, u tsen pu ni awu kutxin, awu u nde tu ti wu ci ama. 45Unde ti rikyen ti ande ti ani yiyae ā ci-ba ama be. 46Ani u ci tag wuci yi tí uwae kusog wu ti ani nde yi atang. Ni sa ibye iki ruye-ni ise be, ti ni kub mbub-ni akub-yi mbub be. 47Meme anyisu Isirela ā ku nde kunn ukwab na itiyafe wune. 48Asiti unde ti rikyen ti som te ni a ku sha ti wu na u nde Ukwab Itiyafe na Yaweh ama, meme arom ti ta ishikununn-wu ā tsen kang kutxin titawe awu u sang u ci Ukwab na Itiyafe ne te ni. Ama ani u sa wu pangma umbae ti uten. Unde ti a tsen-wu kutxin be, awu u ci-wu ukwab ne be. 49Awune ti si icwe kinjo ti ani ti ande ti rikyen-ni meme u putsa.”
50Meme anyisu Isirela nae risu riben u nde iken ti Yaweh ri te Musa ti Aruna. 51Usir wu, Yaweh pu ruye anyisu Isirela uwae Ejib ti kumbub kumbub-ba.
Currently Selected:
Itiruye 12: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
