Itiruye 10
10
Icwag Yaen Kyi Ejib
1Tiri Yaweh ri te Musa baa, “Kafe ru uwog Ukwe, ikyaen ti, ame yirkyi pu m utob-wu, ti ana afaen-wu. Ame u nde iken ti ku fur ayib-m kutampwa-ba, 2ikyaen ti ni pwen te anyisu-ni, ti anyisu na anyisu-ni, kuci iken ti ame nde te ande ti Ejib, ikyaen ti ni na nung baa, ame na si Yaweh.”
3Ama Musa ti Aruna ru ka ri te Ukwe baa, “Yaweh, Rimam na Mbaibrane ri baa, ‘Ayi u ba kwer isinn titawe afu u nae risu riben na m? Ya ande-m ta ti a ru ka fen m. 4Asiti afu a ya ande-m ta-fu ti aba na ru be, nung, ucwe ame u tom icwag sang uwae uten-fu. 5Ayi u kukyi riben ti unde u sae ayib ka-wu isa riben be. Ayi u ci tag iken ti akóng upwen ndembeb tsitsi, kwer ti atsing ituku ti ku shishab meme. 6Icwag yi u ba munnkyi kusog-fu ti ana meme afaen-fu fa ti ana ande ti Ejib meme. Itso icwag yine, a nungji-ba ayi usir iki khika be, ti kiye ti a mbae abitse na abitse-ni.’ ” Isim-yi Musa nwunn u ya Ukwe ta.
7Afaen Ukwe rang wu baa, “Ayi u ba kwer isinn ti unde wune u tsikunn ti ku shir ira si ti? Ya ande ba ta ti a ka fen Yaweh, Rimam-ba. Afu nung-fu ti Ejib ndembeb tag pu wu be a.”
8Ikyaen yine, Ukwe kunn Musa ti Aruna kafe ba, u ri te ba baa, “Ni ru ka fen-ni Yaweh, Rimam-ni. Amaa, arimi ti ku ru?”
9Musa ri te wu baa, “Ati meme-ti, ande ndufu ti anyisu, arom ti anda, ti asinn-ti patag ku ru. Ikyaen imi ati kaa nde kang ukwab na Yaweh.” 10Ama Ukwe ri baa, “Ame u cwe-m ti m ya ni, ti awa-ni, ti anyisu-ni ta ti ni na ru be, se Yaweh wu a ndeya ni. Kubenti, ame nung baa, ira titibi munn uwae-ni. 11Iyee! Arom amam ti u ru ká fen Yaweh uwae-ni, ikyaen ti, ayi si iken ti ani ku sha.” Ama a rwae Musa ti Aruna ruye uwog Ukwe atang.
12Tiri Yaweh ri te Musa baa, “Ndabta kujwo-fu ru yi uten Ejib ti icwag ā ba yaen shag uwae uten Ejib meme, ti ayi ā kub tag atsing iken ti ku shishab ti iken ti akóng upwen nde tsitsi riben.” 13Ama Musa sa ukum-wu ndabta ru yi Ejib, ama Yaweh nda ufunn ti kpakang ru uwe usir ti kiskinn ba kae kyife uwae uten Ejib usir wu utitang ti usirtaen meme. Ti ucwefam kiskinn, ufunn ti kae ru uwe usir ti kiskinn su icwag ba pu yi. 14Icwag yine sang ba byikyi tag uwog uwae Ejib. Itso ujwunn icwag yine sang ji-yi uwae Ejib usir iki be. Ayi u sang kyi-yi cwucwo be. 15Ayi takyi tag riben meme, u fxeb nyinn atang. Icwag kub tag atsing ituku tirisub ti awaen ituku ti akóng upwen nde tsitsi, ti atsing iken tirisub. Ko afub ti ituku iki tsitsi-yi uwae uten Ejib be.
16Tiri Ukwe kunn Musa ti Aruna ti kufe u ri te ba baa, “Ame nde pu m Yaweh Rimam-ni ikentitibi fa ti ani meme. 17Ikyaen yine, ame ku jwam ni ti ricwunnkyi, ni yata na m, ti ni jwam Yaweh Rimam-ni ti awu ā ye ra iticwu ne nwunn uwe-m.” 18Musa nwunn uwog Ukwe u ruye ka jwam Yaweh. 19Ama Yaweh tom ufunn ti kpag timambe tso usir ti ureb ba kae pu icwag yine meme ka si Uyinn Tibyaen. Ko icwag iki tsitsi-wu uwae uten Ejib cwucwo be. 20Amaa Yaweh yirkyi utob Ukwe, awu nda-wu anyisu Isirela ti a na ru ye be.
Kufub Sikyi Ejib
21Ama Yaweh ri te Musa baa, “Ndabta kujwo-fu tso yi apupwen ti kufub ā sikyi uten Ejib, itso kufub ti u nda uten wu byitang tang.” 22Musa ndabta kujwo-wu tso, ama kufub ti byi tangtang sikyi uten Ejib ka usir ita. 23Ande sae tu-ba atso be. Unde iki yi Ejib ruye-wu ise be. Amaa, yi uwog anyisu Isirela, kufub wu si-wu atang ama be.
24Ukwe kunn Musa u ri te wu baa, “Ni ru ka fen Yaweh. Awa-ni ti anyisu-ni ā te ni ru tetso ama. Amaa, ni ya asinn-ni ta ti ike.” 25Amaa, Musa ri te wu baa, “Iyee, ayi si keng ti afu u ya ti ti asinn-ti ta ti ti ka pu iki twen ikentitwen atang na Yaweh, Rimam-ti. 26Asinn-ti u ru kang te ti. Ko kinjo u ta-wu ti isim be. Ati u pu iki uwae-yi twen ikentitwen na Yaweh, Rimam-ti. Tine ati nung-ti itso asinn ti ati u twen ikentitwen atang na Yaweh be, se ati a ka pu ti atang titawe.”
27Amaa, Yaweh yirkyi utob Ukwe, awu cwe na-wu aba ti a na ruye be. 28Tiri Ukwe ri te Musa baa, “Nwunn uwe-m ike. Ba-fu uwe-m cwucwo be. Usir ti afu a ba kyi uwe-m, afu u cwu.”
29Musa ri baa, “Een, afu ri pu fu, ame u ba-m uwe-fu cwucwo be.”
Currently Selected:
Itiruye 10: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
