Esita 9
9
Rika ti Mbayawuda Ci Risu Ande ti Rika-ba
1Uwae ushaen ti rijwe asu ifaen ti si ushaen Adar, uwae usir ti rijwe asu ita na ushaen wu, kiye nde pu yi ti a u nde wande te kutsa ukwe ti kutsingken icwe yi, usir wu ti ande rika Mbayawuda sa uwae-ba tsi ti a na u ta risu Mbayawuda, ama ayi ba kafe-yi Mbayawuda ti ba ta risu-ba. 2Mbayawuda kunnbyir atso ko aka ti aba ta atang uwae uten uten ti Ahasuweru nae ukwe risu-yi, u som ti ujwin ku sae unde ti u ba tekunn ba. Unde iki ta-wu ti tsi tu te ba be ikyaen ti meme ande ba kyen ikyenricwu Mbayawuda. 3Meme ande ti ta risu unju uten unju uten, ti ande ti uwe ti uwe, ti Gomna Gomna, ti ande ti ku nde wande te ukwe, ikyaen ti a ku kyen ikyenricwu Mordekai. 4Ikyaen ti, awu Mordekai site rurob uwae kununn ukwe, rinyi-wu pu iten kyife uwae uten uten meme. Mordekai kpag pu ku fufa ku fufa.
5Tiri, Mbayawuda pu isu ande rika-ba ti kisum wen, ama yerwen ba u twenji ba ku ru. Aba nde iken ti nyangwae-ba te ande ti rika-ba. 6Uwae Susa, uten tiyang ti risu-wu, Mbayawuda wen arom ka ukob itsong. 7Cwucwo, a wen kwer ti Parshandata, ti Dalfon, ti Asipata 8ti Porata ti Adaliya ti Aridata, 9ti Parmashita ti Arisayi ti Aridayi ti Vayizata, 10ti si anyisu ti arom rijwe na Haman umbae Hamedata, unde ti rika Mbayawuda, amaa, a tekunn-ba isu iki be.
11Ti usir wu, aba ri te ukwe ujwunn ande ti a wen uwae Susa, uten tiyang. 12Ukwe ri te Esita, uwa ukwe baa, “Uwae Susa uten tiyang wu amam, Mbayawuda wen arom ukob itsong fa ti anyisu Haman ti arom rijwe. A ri-ba iken ti a nde uwae uten uten ukwe ti tsitsi be. Tine, imi ti afu ku jwam kyi? A u nda fu. Imi ti afu ku sha cwucwo, ame u nde yi na fu.”
13Ama Esita ri baa, “Asiti ayi a nyang uwae ukwe, a cwe na Mbayawuda ti ta uwae Susa ti a nde kyi iken ti a nde yaka ne pangma ti icwe ukwe ri, ucwe, a ye rikom anyisu Haman ti arom rijwe bane kyensi kutuku.”
14Tiri ukwe cwe, a ya iski uwae Susa u ye rikom anyisu Haman ti arom rijwe ba ka kyensi kutuku 15Mbayawuda ti ta Susa byir kyi atso cwucwo uwae usir ti rijwe asu inje na ushaen Adar, ama wen arom ukob ita, amaa, a tekunn-ba isu-ba iki be.
16Kiye wu, Mbayawuda ti tsitsi ti ta uwae uten uten ti ukwe ta risu-yi byir atso ti a u nwangru risu-ba uwog ande rika-ba. Aba wen ande kumbub mae ita mbe rijwe asu itsong, ama unyang tso ba ruwen, amaa, a tekunn-ba isu ande rika-ba iki be. 17Iken yine nde uwae usir ti rijwe asu ita na ushaen Adar. Usir ti rijwe asu inje, a pu unyang atang, u sa usir wu tsi ti a naa ku nde ukwab fa ti ushwu ti shwu.
Ukwab na Purim
18Ama Mbayawuda ti ta uwae Susa byir atso uwae usir ti rijwe asu ita, ti usir ti rijwe asu inje, ama pu unyang usir ti rijwe asu itsong, u sa usir wu tsi ti a naa ku nde ukwab, ti ushwu ti shwu.
19Ikyaen yine Mbayawuda ti som umbae uten uten sa usir ti rijwe asu inje na ushaen Adar tsi ti awu u si usir ukwab ti nde, ti ushwu ti shwu, ti unyang ti pu, ama u ka wuci na atso.
20Tiri Mordekai bae iken yine tsi, u bae kutsingken na Mbayawuda ti ta uten uten ti Ahasuweru nae ukwe risu-yi, uten ti ta fifer, ti uten ti ta rurwen, 21ti a na ye su usir ti rijwe asu inje ti usir ti rijwe asu itsong uwae kusang kusang, 22ikyaen ti ayi si usir ti unyang tso Mbayawuda ruwen uwog ande rika-ba, awu si ushaen ti utob tibyir-ba kafe ushwu ti shwu, ricwu ti kwo-ba, kafe usir unyang ti pu, aba na pu usir yine na tsi ti a naa ku nde ukwab ti ushwu ti shwu, ama na u ka wuci na atso, ama ka rinyangwae na ande ti rikaen.
23Tiri Mbayawuda cwe ti a na ku nde iken ti a bag ku nde kucang pangma ti Mordekai bae na ba. 24Ikyaen ti Haman unde ti Agagi, umbae Hamedata, unde rika Mbayawuda, myae ira titibi ti awu u twenji ba. A nde pur ti si fengo ititsab yi icwe-ba ikyaen ti a u wenji u twenji Mbayawuda. 25Kiye ti Esita ba uwog ukwe, ukwe nda ba, a bae kutsingken icwe ruye ti kumyae titibi Haman risu Mbayawuda na kafe tso ti risu-wu, ti a na ye wu ti anyisu-wu ti arom kyensi ituku. 26Ikyaen yine, a ku kunn usir yi baa, Purim, ikyaen ti a tu rinyi purim ru ye pur. Ikyaen iken yi ti a bae uwae kutsingken wune, ti iken ti a sae, ti ira ti tu ba, 27ama Mbayawuda sa yi kafe icwe na ijwe-ba ti rishi-ba ti meme ande ti sangfa ba baa, a na ye su usir ifaen yine yi kiye ti a sa tsi uwae kusang ti ana u be-ba yi be be pangma ti a bae, 28baa, aba na ti utso-ba naa ku ye su, ku tangsom te usir yi uwae ishikununn titini, ti ukwe ta risu-wu, ti a na be-ba itinde ukwab purim uwae usom ti som Mbayawuda, ko ti rishi-ba u munnji usir yine be.
29Tiri Esita, uwa ukwe, unda Abihayil, ti Mordekai urae Mbayawuda bae kyi kutsingken ti ribom nae riben ti a yirbom ira risu itinde na purim. 30A ka atsingken yine na meme Mbayawuda ti ta uwae uten uten ukob kinjo ti rikom asu itsongfaen ti Ahasuweru ta risu-yi, ama a tu atsingken yi uwae kujimshwur ti kubenti, 31baa, a na u ye su usir ifaen na purim yine yi kiye kiye yi ti a sa tsi pangma ti Mordekai, urae Mbayawuda, ti Esita, uwa ukwe nda Mbayawuda unju ti a na nde, ama Mbayawuda sa yi kafe icwe na ijwe-ba, ti rishi-ba ti a naa ku cwe unju u ku byir utob. 32Ira ti Esita ri risu purim, a sa yi kafe icwe ti aba ku tsikunn ti ti nde yi. A bae yi bae.
Currently Selected:
Esita 9: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
