Daniyel 5
5
Iken ti A Bae Ru Kupwe
1Usir iki ukwe Belishazar nde ukwab tiyang ama yae ande-wu ti rurob kumbub kinjo, ama te ba ngwa ambyi anam tetso. 2Kiye ti Belishazar ngwa kyaen ambyi anam-wu, awu nda unju ti a na ka pu ruye isu zinariya ti azurfa ti itse-wu Nebukanezar pu kusog Rimam tiyang yi Urushelima ba, ti awu ukwe na ti ande-wu ti rurob, ti awa-wu ti kununn, ti isā-wu na u ngwa ambyi atang. 3Tiri a ka pu isu zinariya yi ba, ama ukwe, ti ande-wu ti rurob aba, ti awa-wu ti kununn, ti isā-wu ngwa ambyi anam atang. 4Aba ngwa ambyi anam yi ama teb rinyi apxin yi ti a kwén yi te zinariya, ti azurfa, ti bronzi, ti ikyabser, ti ayi ti a pab yi te kutuku ti kutxom.
5Ti a u nunung, kukyikyin kujwo unde tsoye ku bae iken ru kupwe yi fikyi ukwe atang ru kwer uwog ti fitila tsi atang. Ama ukwe sae kujwo wu kiye ti kujwo wu ku bae iken yi. 6Tiri kutxuwe ukwe kafe utso iki txi, ikyenricwu ye wu, afxen-wu ku se ise ku gigigag, tijing-wu nam mbeb.
7Ukwe nda unju ti kpakang ti a na kunn funn tag ande ti ipwen, ti ande ti ku ri imbyi ira, ti ande ti ku sae ayib. Ukwe ri te ande ti ben ayib ba ti ta uwae Babila baa, “Unde ti a nung putswa tu iken ti bae yine u ri tu imbyi-yi te m, a u pu kutupwa ti ru itibyaen si wu, u tā wu asuwa zinariya ukwae, ama u nda wu kafe unde ti kotub ukwe ti ita uwae kujwokwe wune.”
8Kiye ti ande ti ben ayib ba sang ba fe, aba nung putsa tu-ba iken ti bae yi be, ama nda tu-ba imbyi ira yi be. 9Tiri ikyenricwu ye ukwe Belishazar, kutxuwe-wu kafe itso iki txi cwucwo ti nda ande-wu ti rurob uwog ukwab atang kyirunn.
10Ti iya ukwe fxen ufxenjwin ukwe ti ande-wu ti rurob ba, awu sang ba uwog ukwab atang u ri baa, “Ukwe, unyang-fu ā ko ra ru yi uwe! Ndembeb-fu utob be. Yirkyi-fu kutxuwe-fu kyi be. 11Unde iki ta atang yi kujwokwe-fu ti site kusung apxin ti sisaen kiye ti itse-fu si ukwe. Unde wu site itinungye ti itsab pangma ayi na ru uwog Rimam ba. Ama itse-fu ukwe Nebukanezar nda wu ta risu meme ande ti ipwen, ti ande ti ben ayib. 12Awu site kusung iki ti nyang timambe, ti itinungye, ti itsab ti ku ri tu imbyi kurwa, ti ira ti rang ti rimang meme. Ande ku tu imbyi ira-ba uwog Daniyel wune ti ukwe fwa wu rinyi baa, Beteshazar. Kunn wu ba, awu u ri te fu imbyi ira yi.”
13Ama a ka pu Daniyel ba uwe ukwe, ama ukwe rang Daniyel baa, “Afu ti si Daniyel kinjo uwae Mbayawuda ti itse-m ukwe ye ba apyi ru Yawuda ba a. 14Ame fxen iten ira-fu baa, afu na site kusung Rimam, ti itinungye, ti itsab, ama u ben ayib timambe. 15A pu ande ti ben ayib ti ande ti ipwen ba uwe-m ti a na nung putsa ira yi ti a bae ne, ti a na ri te m imbyi-yi, amaa, aba ri tu-ba imbyi-yi be. 16Amaa, ame fxen ti afu na ku ri tu imbyi ira, ama ande na ku tu imbyi ira uwog-fu. Nung! Afu a nung putsa ira yine u ri tu imbyi-yi na m, a u sī na fu kutupwa ti ru itibyaen, u pu asuwa zinariya tā fu ukwae, ama u sa fu kafe kotub ukwe ti ita uwae kujwokwe wune.”
17Daniyel ri te ukwe baa, “Ame ku sha-m rinyangwae-fu be. Pu yi na-fu unde iki. Amaa, ame u nung putsa ira yi ti a bae ne na fu ukwe, u ri te fu imbyi-yi.
18“Fxen, ukwe, Rimam ti Skeb ti tag nda itse-fu Nebukanezar nae ukwe u site kpakang, ti rurob, ti riyinn. 19Ikyaen rurob ti Rimam nda wu, meme ande, ti ambukwen ande, ti unju uten uten ku kyen ikyenricwu-wu. Awu ku wen unde ti awu ku sha, ku ya unde ti awu ku sha ti wu na tsi user ta ti unyang. Awu ku ye tso unde ti awu ku sha, u ku ko si unde ti awu ku sha ama. 20Amaa, kiye ti ijwe ti ndub sang ba yirkyi utob-wu, a waen wu ukwe, awu si-wu te riyinn cwucwo be. 21A rwae wu ruye kutampwa ande ama nda ira ti kab-wu kafe ana ibye. Awu ka som te ikyinnsu ti kutur, ku kub irum pangma indag. Ijwe-wu sib tag te imenn ti ku sur, se kiye ti awu nungye baa, Rimam ti Skeb ti tag ti na nae ukwe risu meme kujwokwe ti ta uwae utense, ama na ku sa yi na unde ti awu ku sha.
22“Afu umbae-wu Belishazar ama nung tag ira yine u sa risu-fu si-fu riben be, 23ama ku myae risu-fu te Rimam ti ta apupwen, u ka pu isu ti si ana kusog Rimam ba ngwa ambyi anam atang, afu, ti afaen-fu, ti awa-fu ti kununn ti ti isā-fu meme. Afu teb apxin ti a kwén yi te zinariya, ti azurfa, ti bronzi, ti ikyabser, ti apxin ti a pab yi te kutuku fa ti kutxom ti ku sae-yi uwog be, ku fxen-yi ira be, ku nung-yi ira iki be. Amaa, awu Rimam ti unyang-fu ti wande-fu meme ta kujwo-wu, afu nda-fu awu rurob be. 24Ikyaen yine, Rimam nda kujwo ru ba bae iken yine.
25“Iken yi ti a bae si ta re:
MENE, MENE, TEKEL, PARSIN 26Imbyi ira yine ta re:
MENE ku tso baa, Rimam na pwen tag pu wu usir kujwokwe-fu ama sa wu ba pu wu ricwunnkyi.
27TEKEL ku tso baa, a na myae pu ba afu yi kitu kumyae, ama afu munn-fu be.
28PERES ku tso baa, kujwokwe-fu na kata pu wu ifaen, kujwokyab kinjo a nda Mede, kujwokyab ti ifaen ama si ana Pasiya.”
29Ama Belishazar nda unju, a pu kutupwa ti ru itibyaen ba si Daniyel, u tā wu asuwa ana zinariya ukwae, ama ya iskin baa, Daniyel na kafe pu wu kotub ukwe ti ita uwae kujwokwe wune.
30Ti utitang usir wu, a yerwen Belishazar ukwe ande ti Babila. 31Ama Dariyusi unde ti Mede tsokyi ukwe kiye ti awu site asang mae ita mbe ifaen.
Currently Selected:
Daniyel 5: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
