Daniyel 2
2
Nebukanezar Sunn Kurwa
1Uwae kusang ti ifaen ti Nebukanezar nae ukwe, Nebukanezar sunn kurwa ti nda utob-wu nae-wu riben be, kicwag ama sang-yi awu ayib be. 2Ikyaen yine, ukwe nda unju ti a kunn byir ande ti ipwen, ti ande ti ben ayib, ti ande ti ku sae ayib, ti ande ti ku ri imbyi ira meme yi fikyi-wu. 3Awu ri te ba baa, “Ame sunn kurwa iki ti nda utob-m nae-wu riben be. Ame ku sha ti m nung imbyi kurwa yi.”
4Tiri, ande ti ku ri imbyi ira cwe wu unju ti unju Aram baa, “Ukwe, unyang-fu ā ko ra ru yi uwe. Tsag kurwa yi te ti apyi-fu, ati ama u ri te fu imbyi-yi.”
5Ukwe ri te ande ti ku ri imbyi ira ba baa, “Ame sa tsi pu m baa, asiti ani a ri te-ni ame kurwa yi be, u ri te-ni ame imbyi-yi be ama, ame u nda a u kum tag ajwo-ni ti afxen-ni, ama u mbub kusog-ni meme si riben. 6Amaa, asiti ani a ri te m kurwa yi ti imbyi-yi, ame u nda ni rinyangwae, ti kujwojang, ti rurob ti ko timambe. Ikyaen yine, ni ri te m kurwa yi ti imbyi-yi.”
7Aba ri kyi baa, “Ukwe ā tsag kurwa yi te apyi-wu. Ati ama u ri te wu imbyi-yi.”
8Ukwe ri te ba baa, “Ame nungye pu m ti ani ku sha ti m na nda kyi ni kiye ba iki, ikyaen ti, ani nung baa, ira ti ame ri tsi pu m, u kafe-yi fe be. 9Asiti ani a fxir na-ni ame kurwa yi be, ame u nde ni ira. Ani sa tsi ti ni u kyaefa m te ira ti tikong ku kab baa, ame na u kafe ira ti ri-m. Ikyaen yine, ni tsag te m kurwa yi, ayine ama u tatso m baa, ani na u ri tu imbyi-yi na te m.”
10Ande ba ti ku ri imbyi ira ba ri te ukwe baa, “Unde iki ta-wu uwae utense ti u nde tu iken ti ukwe ku sha be, ikyaen ti, ukwe tiyang iki, ko ti rurob iki rang ji-wu ande ti ipwen, ko ande ti ben ayib, ko ande ti ku ri imbyi ira, ira yine be. 11Ira ti ukwe ku rang ne caeb timambe, unde iki ta-wu ti u ri tu kurwa yi be, nyáng apxin ti ku som si-ba kutampwa ande be ti u ri tu.”
12Ikyaen yine, ukwe ndembeb utob timambe, ama u nda unju ti a na wen tag ande ti ben ayib ti ta uwae uten Babila. 13Ama a ya iski ira yi baa, a na wen ande ti ben ayib ba. A tom ande ka sha rifab Daniyel ti arwan-wu ti a na u wen ba.
14Ama kiye ti Ariyoki, unde ti uwe ande ti ku nungkyi ukwe, ru ye ti wu na kaa wen ande ti ben ayib ba ti ta Babila, Daniyel ri ira uwae ben ayib skuu te wu. 15Awu rang Ariyoki wu baa, “Imi ti nde Ukwe sa itso icwe ti kpakang yine ru ye?” Ama Ariyoki ri te wu iken yi ti nde. 16Ama Daniyel ru ka jwam ukwe ti ukwe na nda wu kiye ti wu na u ba ri imbyi kurwa yi na te ukwe.
17Daniyel kafe ru yi kununn-wu u ka pwen ira yi te Hananiya, ti Mishayel ti Azariya arwan-wu. 18Awu ri te ba ti a na jwam Rimam ti apupwen ti wu na sae ba te ayibrisi ti wu na ri te ba imbyi kurwa ukwe, ti a na twenji-ba fa ti ande ti ben ayib na Babila ti tsitsi be. 19Yi utitang wu Rimam tatso Daniyel imbyi kurwa yi, ama Daniyel teb Rimam ti apupwen. 20Awu ri baa,
“Ititeb ā si yi rinyi Rimam
ru fife yi uwe uwe
ikyaen ti,
ben-ayib ti kpakang si ana-wu.
21Awu ti ku nda ushaen fam
ti ushaensen.
Awu ti ku waen ariki ukwe
ama ku nae ariki ukwe.
Awu ti ku nda itaen ti ben ayib
itsab-ba,
ama ku nda itaen ti iyi itinungye-ba.
22Awu ku tatso unde ira ti rurong,
ti iken ti titam.
Awu nung iken ti ta uwae kufub,
ikyaen ti awu ti risu-wu
kukyi te itisaen.
23Rimam na abitse-m,
ame ku tso na fu fxaefa, ku teb fu,
ikyaen ti afu nda pu fu ame
itsab ti kpakang,
ama tatso pu fu ame
iken ti ati jwam,
ikyaen ti,
afu tatso pu fu ati
kurwa ukwe.”
24Ikyaen yine, Daniyel ka tu Ariyoki, unde ti ukwe tsab ti wu na wenji ande ti ben ayib na Babila, u ri te wu baa, “Wen-fu ande ti ben ayib Babila be. Pu m ru uwog ukwe ti m kaa ri te wu imbyi kurwa yi.”
25Ariyoki ci-wu kiye be, u pu ra Daniyel ka tu ukwe u ri te wu baa, “Ame tu pu m unde iki uwae ande ti a ye ba apyi ru uten Yawuda ba, ti awu u ri imbyi kurwa yi te fu ukwe.”
26Ama ukwe rang Daniyel, ti a ku kunn wu baa, Beteshazar, baa, “Afu u ri te tu m kurwa ti ame sunn, ti imbyi-yi a.”
27Daniyel cwe baa, “Unde ti ben ayib, ko unde ti ipwen, ko unde ti ku sae ayib, ko unde ti ku ri imbyi ira ti kitam iki ta-wu ti u ri tu imbyi ira ti kitam na kurwa ti ukwe sunn be. 28Amaa, Rimam iki ta atang apupwen ti ku tatso iken ti kitam. Awu tatso pu wu ukwe Nebukanezar iken ti u ba nde uwe. Kurwa ti afu sunn kiye ti afu nae iwaen-fu ta re.
29“Kiye ti afu ukwe nae ku kab ira risu iken ti u ba uwe, unde ti ku tatso ira ti kitam tatso fu iken ti u ba nde. 30Ti awu tatso m imbyi kurwa yine si-yi ikyaen ti ame na site itsab skeb meme ande be, amaa, ikyaen ti afu ukwe na tu imbyi kurwa yi, ti imbyi ira ti afu ku kab risu-yi.
31“Ukwe, afu sae iken iki ti a kwen wu pangma unde tsi ti riyang-wu akwen uwe-fu u ku jae ayib ama ku nde ikyenricwu. 32Risu iken wu, a kwen wu te riyib zinariya. Kukog-wu ti ajwo-wu, a nde yi te azurfa. Rishwu-wu ti kusa-wu, a kyae yi te bronzi. 33Afxen-wu si ikyabser, pataa afxen-wu, akyab iki si ikyabser, akyab iki ama si ariben. 34Ti afu ku sae wu, kutxom iki si ba jwagmbub afxen-wu ayi ti a kyae yi te ikyabser ti ariben jwag jwag jwag. 35Tiri ikyabser, ti ariben, ti bronzi, ti azurfa, ti zinariya ti si akyab iken wu, mbubtsen jwag jwag jwag ama ufunn kae pu yi ru ti a nung-ba nung ira iki risu-ba cwucwo be, pangma ufwèn yi utae. Amaa, kutxom wu ti byinn mbub iken wu ba kafe rikwen tiyang ti takyi utense meme.
36“Ne ti si kurwa yi. Tine ati u ri te ukwe imbyi-yi. Ayi ta re. 37Afu ukwe ti si ukwe na abikwe ti Rimam ti ta apupwen nda pu wu afu kujwokwe, ti rurob, ti kpakang, ti riyinn. 38Afu ti awu sa ta risu ande ti utense, ti ibye kutur, ti inung ti ku yang apupwen. Awu nda fu nae ukwe risu-ba meme. Afu ti si risu wu ti a kwen te zinariya.
39“Kujwokwe iki ti kpag-wu pangma afu be u ba nwunn isim-fu. Isim-yi, kujwokwe iki ti ita ti si bronzi u ba nae ukwe risu utense meme. 40Isim-yi, kujwokwe ti inje u ba nwunn, ti kpag pangma ikyabser ti ku mbub iken jwag jwag. Pangma ti ikyabser ku byinn mbub meme iken, awu u byinn mbub, u pwa ajwokwe ita yine nininam. 41Pangma ti afu sae afxen-wu ti akyikyin afxen-wu, ikyab iki si ikyabser, ikyab iki ama si ariben né, ayine ku tso baa, kujwokwe wu na u ba kata, amaa, awu u site ra kpakang ikyaen ikyabser pangma ti afu sae ikyabser naafa te ariben. 42Pangma ti kukyikyin afxen-wu ikyab iki si ikyabser, ikyab iki si ariben, ayi ku tso baa, ikyab kujwokwe wu iki u kpakang, ikyab iki ama u namtur. 43Pangma ti afu sae ikyabser renfa te ariben, ayi ku tso baa, ande ba na u naa ren atso uwae ribaen ti baen, amaa, aba u bae ren-ba atso be pangma ti ikyabser te ariben bae ren-yi atso be.
44“Uwae kiye abikwe ba, Rimam ti apupwen u ye nwunn kujwokwe iki ti u twenji-wu ji be, unde iki ama u tsokyi-wu kujwokwe wu be. Kujwokwe wu u twenji tag ajwokwe yine, amaa, awu ti risu-wu u tsi ru fife yi uwe. 45Pangma ti afu sae kutxom wu yer ru ye ti ajwo-wu yi rikwen ba jwag mbub ikyabser wu, ti bronzi wu, ti ariben wu, ti azurfa wu, ti zinariya wu, ayi ku tso baa, Rimam ti site kuko na tso pu wu ukwe iken ti u ba nde uwe ike. Kurwa yi u ba nde kang, imbyi-yi si kubenti.”
46Tiri, ukwe Nebukanezar si kú riben uwe Daniyel u nda wu rurob. Awu nda unju ti a na pu na Daniyel rinyangwae ti iken ti ku nung kuyang. 47Ukwe ri te Daniyel baa, “Kubenti, Rimam-fu skeb pu wu apxin, u si Itsekuru ana abikwe. Awu ti ku tatso ande iken ti kitam ikyaen ti, afu fxir tu pu fu imbyi kurwa yine.”
48Ukwe ko ra Daniyel tso, ama u nda wu rinyangwae yang-yi. Awu nda Daniyel ta risu meme uten uten ti Babila, ama u si kyi unde ti ta risu ande ti ku myae na ukwe kumyae yi Babila. 49Ama Daniyel jwam ukwe ti awu na pu Shadirag, ti Meshag ti Abenego wande yi uten ti Babila. Amaa, Daniyel ta ti fikyi ukwe.
Currently Selected:
Daniyel 2: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
