Daniyel 1
1
Daniyel ti Arwan-wu yi Babila
1Uwae kusang ti ita ti Jehoyakim nae ukwe risu Yawuda, Nebukanezar ukwe uten Babila pu rika ba sangkob Urushelima, 2ama Itsekuru nda wu ci Ukwe Jehoyakim, Ukwe na Yawuda rika, u kwae pu isu kusog Rimam tiyang ru yi Babila#1:2 Babila Unju Mbayawuda a ku kunn wu baa, Shinar., u su yi ka tsi kusog apxin-wu yi kusog uwog ti awu pu rifunn apxin-wu kyatsi atang.
3Ama ukwe nda unju na Ashipenazi, unde ti ta risu ande ti ku nde wande imbyi ukwe baa, awu na tsab anyisu Isirela iki ruye ishikununn ukwe Yawuda, ti ishikununn ande ti rurob, na ba fenkyi ukwe Babila. 4Aba ā si anyisu itaen ti si-ba te kicaeb be, u saen arom ama u site meme itsab itindetu, u munn te itinungye, ku ye iken ti kwen ti ritsen, ku nde tu wande yi fenkyi ukwe. Awu Ashipenazi ā kwen na ba unju uten Babila ti fengo ti a ku bae iken-ba. 5Ukwe nda unju ti a na pu na ba wuci ti ambyi anam-ba uwae usirsir, itso wuci ti awu ukwe ku ci, ti a na kwen na ba iken ka asang ita. Isim-yi aba na u ba nde wande te ukwe.
6Daniyel, ti Hananiya, ti Mishayel, ti Azariya ti ru ye uten Yawuda fa uwae ande ba ti a tsab. 7Unde wu ti ta risu ande ti ku nde wande te ukwe fwa ba rinyi tishe. Awu fwa Daniyel baa, Beteshazar, u fwa Hananiya baa, Shadirag, u fwa Mishayel baa, Meshag, ama fwa yaen Azariya baa, Abenego.
8Amaa, Daniyel sa tsi utob-wu baa, awu na u sor ndembeb-wu ijwe-wu te wuci ti ambyi anam ukwe be. Ikyaen yine, awu jwam unde ti ta risu ande ti ku nde wande imbyi ukwe baa, awu na u sor ndembeb-wu ijwe-wu yi fengo yine be. 9Ama Rimam nda Daniyel tu kutxuwe tinyang uwog unde wu. Unde wu sae Daniyel te ayibrisi. 10Ama unde ti uwe wu ri te Daniyel baa, “Ame ku kyen ikyenricwu itsekuru-m ukwe ti nda unju risu itso wuci ti ani u ci ti itso iken ti ani u ngwa. Awu a ba sae u nungye baa, ani na siskam, na u jae-ni pangma iraencwu-ni be, ukwe u wen m ikyaen-ni.”
11Tiri Daniyel ri te unde wu ti Ashipenazi tsab ti wu na nungkyi Hananiya ti Mishayel ti Azariya baa, 12“Ame ku jwam fu, mam ti uwae usir rijwe. Sha na ti atsing afub ti ambyi ukaen ti ati u ci u ngwa ka usir rijwe, 13Tiri isim yine, afu u ba sae ti, ti anyisu itaen ti tsitsi ti ku ci wuci ukwe ti tinyang yi, ikyaen ti fu sae baa, aye ti kem u jae siskeb bara, ti fu nde iken ti nyang uwae-fu te ti.” 14Tiri unde wu cwe u mam ba ka usir rijwe.
15Isim usir rijwe yi, awu sae, aba kem u jae skeb anyisu ba ti ku ci wuci ukwe yi. 16Ikyaen ayine, unde wu pu ra kutunn wuci-ba ti iken ti ngwa-ba uwae iken ukwe yi, ama u nda ba atsing afub ti ambyi ukaen amam.
17Ana anyisu itaen inje bane, Rimam nda ba itsab ti iyi iken ti bae, ti itinungye ana iken meme. Ama Daniyel site itinungye imbyi kurwa ti iken ti Rimam ku tatso yi fengo txi txi txi.
18Isim asang ita yi, ukwe nda unju ti a na pu ba sang ba, ama unde ti ta risu ande ti ku nde wande imbyi ukwe wu pu ba sang ba uwe Nebukanezar. 19Ama ukwe te ba tsag akaen u nungye baa, umbae iki na ta-wu uwae-ba ti na pangma Daniyel, ti Hananiya, ti Mishayel, ti Azariya be. Ikyaen yine, a pu ba sang wande ti nde yi kusog ukwe. 20Uwae meme ira ti rang na itsab ti itinungye ti ukwe rang ba, awu nungye baa, a na skeb pu ba ande ti ipwen ti meme ande ti ben ayib ti ta kujwokwe-wu atsepu rijwe.
21Ama Daniyel som atang ba sang ti kusang ti tawe ti Saerus nae ukwe.
Currently Selected:
Daniyel 1: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
