Amos 7
7
Ira ti Kitam Risu Icwag
1Ayine si ira ti Yaweh Itsekuru tso m#7:1 Iken ti awu sae ne, awu sae yi uwae kubyung.. Ame sae wu, awu ku shi imbae icwag ti wu tom sang uwae uten. Iken yine nde kiye ti a bunn mam pu ba wuci ukwe ti tawe ama wuci tijwae ser ku tso. 2Yi uwae iken ti ame sae ne, icwag yi pu wuci ti irim kub tag uwae uten Isirela. Ama ame ri baa,
“Itsekuru Yaweh,
ame ku jwam fu, yata na ti,
bē rishi Yakubu u nde rimang?
Aba ko-ba be!”
3Yaweh fxae iken ti wu myae
ti wu nde te ba,
ama u ri baa,
“Iken yi ti afu sae ne
u nde-yi cwucwo be.”
Yaweh ti ri.
Ira ti Kitam Risu Urwa
4Ayine si ira ti Yaweh Itsekuru tatso kyi m. Ame sae awu ku sha ti wu pwen ande-wu rikwén, u yaen urwa si ba. Ama urwa wu twen mbub uyinn ti ukaense meme.
5Tiri ame ri baa,
“Itsekuru Yaweh,
ame ku jwam fu, yata,
bē rishi Yakubu u nde rimang?
Aba ko-ba be!”
6Yaweh fxae iken ti awu
myae tsi ti wu nde te ba,
ama u ri baa,
“Ayine ama u nde-yi cwucwo be.”
Yaweh, Itsekuru, ti ri.
Ira ti Kitam Risu Uji Kumyae
7Awu tso m, ame sae Itsekuru tsi fer kupwe kusog ti a myae wu myae ti iji kumyae kute. Awu ye su iji kumyae kujwo-wu. 8Ama Yaweh rang m baa, “Amos, imi ti afu sae?” Ama ame ri baa, “Iji kumyae!” Tiri Itsekuru ri baa,
“Nung, ame u myae ande-m Isirela ti iji kumyae wune. Ame u ya ba ta-m be. Ame u byinn kang ba kimbab.
9Asog apxin abitse-ni, anyisu Ishaku,
u mbub si riben,
uwog ti sisaen na Isirela
u kafe acwupwe,
ame u putsa ishikununn
Jerobowam te isu rika.”
Amaziya Ri Ira te Amos
10Tiri Amaziya, kukwen na Betel, tsa kutsan ka uwog Jerobowam, ukwe Isirela baa, “Amos myae ira titibi risu-fu yi uwae uten ti Isirela ike. Awu ri ira risu-fu ko timambe. Ira-wu ayi ku ndembeb uten. 11Amos ku ri baa,
‘Jerobowam u cwu uwog rika,
ande ti Isirela ama,
a u ye ba ru kang upyi
yi fengo ti rwen!’ ”
12Tiri Amaziya ri te Amos baa, “Afu unde ti ku ya iskin, nwunn ike ti ru uten ti Yawuda ti ka ya iskin yi atang ti a sha na fu wuci. 13Ya-fu iskin yi Betel ike cwucwo be, ikyaen ti, ike si uwog ti sisaen na ukwe, u si uwog ti meme ande ku ba fen Rimam atang.”
14Tiri Amos ri te Amaziya baa, “Ame si-m unde ti ku ya iskin ira Rimam be, ko umbae unde ti ku ya iskin ira Rimam be. Ana-m, ame si unde ti ku shi iken u ku kyae fwa ituku sikamo. 15Ama Yaweh ye ra m nwunn uwog iken ti shi-m, u ri te-m baa, ‘Ru ka ya iskin ira-m te ande-m, ande ti Isirela!’
16Tine, fxen ira Yaweh.
‘Afu ri baa, ame na ya-m
iskin titibi risu Isirela be.
Ame na ri-m ira ti byag kwan
risu ishikununn Ishaku be!’
17Ikyaen ayine Yaweh ku ri te fu baa,
‘Uwa-fu u kafe iyaen uwae uten.
Anyisu-fu ti arom ti ti anda,
a u pyer wen ba te kisum wen.
Ande u sa uten-fu kan fa atso.
Afu ti risu-fu u cwu
uwae uten ande ti apxin,
ama a u ye Isirela ru kang upyi
yi fengo ti rwen!’ ”
Currently Selected:
Amos 7: kubNT
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and
© The Nigeria Bible Translation Trust 1995, 2017
