Ibrani 6
6
1Kamok anong, tu bun i beseng yir izen yir natoon ike̱re̱ izhizhe̱k'e natoon aYeso baꞌ, nong ta ya yir kasho̱o̱n, ta te yir ánerawe. Sang tu bun i kubun yir kama ta nye yir kubo̱so̱p itak kushishing kuse natoon ike̱re̱ i tana be̱e̱n riku be itak ku nino̱o̱k katsak na Adakunom baꞌ, 2itak abatisma be ku nisaas ibo̱k ritek natoon ánerawe, ne kudorok ikom be amok afe izen izen. 3Ke Adakunom shim yir tà te yir anong.
4Áya á ta tsang á ren akanang'e, á tan fok kunang Adakunom, áya a ta gung rice be Kabik Kazhe̱l'e, 5ne áya a tá kun fok ritek rife̱ Adakunom ne kukyem kufe kasho̱o̱n. 6Gip be anong á tú ku bun kama kaye̱e̱r kuno̱o̱k katsak ba. Á ta ba kyem á be̱ ba nong á ta shishing kuse ba baꞌ, kamok ba tá bun á tigak Igon Adakunom ne á ku te isum kaye̱e̱r ánerawe.
7Kaben kaya ka ta so̱ ashi nizen iya iza tin kpas ye̱r ye̱r ne naya te dide̱ng, ne ka se̱ ritek Adakunom. 8Amma kaya amaan agam be ikiritsan tin tang nye ka kpe̱de̱ng'e. Adakunom tà fiming karo̱ kayong, ne a shosh nigang'e.
9Ároneng, yir fe̱ yir anong gye̱rtatan, amma yir no̱o̱k yir katsak ye yin ta se yin anong baꞌ, yin ta se̱ yin ritek ike̱re̱ iya i ta nye ife kuse̱ kashesh. 10Adakunom won dar a nye gye̱r baꞌ. A tà tiburum be itomong ne kushim yin tú ku tonong yin kuya yin tá tobok yin ánerawe wu baꞌ. Ne i ya yin kasho̱o̱n be kunye anong. 11Yir shim yir koangan kaye̱e̱r yin tu ya kasho̱o̱n be ifeng anong ma nigang'e, nong ta ren yin ye yin tà se̱ yin ike̱ng iya yin ta min te yin riye̱. 12Yir shim yin tu yo̱mo̱ng yin baꞌ, amma sor yin kyo̱ndi áya a tin no̱o̱k katsak ne á naka tsesek ma á ya kutse ike̱ng iya Adakunom ta tsang a fe̱.
Adakunom fe̱ rife̱ wu a shishing dim
13Nizen iya Adakunom tá no̱o̱k kuto̱ be Ibrahim, a nye be kushu. A shu be riyerek wu kamok akak tu nar yiik nong a tin nye kushu be wu baꞌ. 14Adakunom fe̱ ye, “Katsak'e mi ta ka te ritek. Mi ta sak kuri wan tà te whe̱re̱.” 15Ibrahim tá fa mees riye̱ wu, yong a se̱ ike̱ng iya Adakunom tá fe̱ ye a tu ku nye'me. 16Ánerawe shu be aner aya a ta ka nar ba yiik, kushu'ong nye agbang ike̱ng ku gang nanan. 17Adakunom shim a ta tonong aner aya a tana di ike̱ng iya wu tá fe̱ ye wu shishing baꞌ, yong a shu. 18Adakunom nye anong kaye̱e̱r ike̱ng ifa a tana shishing'e baꞌ, iya Adakunom tanin bo̱ abo̱o̱s baꞌ. Yir áfe i ta te yir gbashak i ta shan yir ike̱ng iya i tá min te yir riye̱ ta tsesek yir. In yiir yir ike̱ng iya i tá min te yir riye̱ be agap ma aye̱ yir n kpa nafa. 19Kute riye̱ yir ta be yir na ne ku sak yir ta nyesek yir ana dar inyim ka be agak riye̱ baꞌ, ri no̱ tsik ma nama alaple kaye̱e̱r kaza, karo̱ Adakunom tu ku sor. 20aYeso tsang an tseng azong nasho̱o̱n yir kamok yir. An te agbang atsi ma izen izen kyo̱ndi aMakizadek.
Currently Selected:
Ibrani 6: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc