Ibrani 5
5
1Koakye agbang atsi Adakunom ne a tu kasa kaye̱e̱r ánerawe áfudang nong a tà fe̱ kanu rice ba natoon ike̱re̱ Adakunom ne a nye asidaka kamok rine̱n. 2A kyem a nye tatan be áya a ta taam ne áya a ta dun kuren ike̱ng, kamok wu be rice wu ta be kuraar kuri kufe̱ rinerawe gip. 3Iyong ne isak wu nye asidaka kamok rine̱n wu be rife ánerawe. 4Akak tà kyem a tin te rice wu baꞌ, ma ke Adakunom ne a tú yis kyo̱ndi a tá yis aHaruna. 5Anong ne, aKiristi gip, a se̱ kuyiik kusor agbang atsi be rice wu baꞌ. Amma Adakunom ne a fe̱ be wu ye,
“Wan ne i nye Igon mi,
katuur mi n te Ada wan.”
6A bun a fe̱ naro̱ kakak ye,
“Wan nye agbang atsi ma izen izen,
kyo̱ndi aMakizadek.”
7Nizen aYeso tá se aze nazatse, a tá kuto̱ naza a tá nye aduwa ne a nye izong be nanyisi nufe Adakunom aya a tana kyem a ku shesh kaye̱e̱r riku. Adakunom tú fok kamok a nye aner a tá mees rice. 8aYeso nye Igon Adakunom gye̱rtatan, amma a ti barang kukuus kuto̱ Adakunom kaye̱e̱r risam a tá so̱. 9Nizen iya a tá ma shining gye̱r, ne a ma sor iren kutser kufe izen izen nufe koangan aya a ta kuus ike̱ng iya a ta fe̱. 10Adakunom ne a tú ku kasa a ta sor agbang atsi kyo̱ndi aMakizadek.
Itabak natoon ku bun kama
11Yir be yir ike̱re̱ whe̱re̱ tana fe̱ yir natoon iyong, amma i ro̱ ta ka tonong yin kamok yin ren yin ike̱ng zizirik baꞌ. 12Katsak'e, a fa gye̱ ke yin ma sen bo̱so̱p yin ákak'e kyo̱o̱rna, gip be anong yin ru shim yin ákak afe a tana ka bo̱so̱p yin ike̱re̱ izhizhe̱k'e kaye̱e̱r rife̱ Adakunom. Yin tse̱r yin nabasang, sang akpakarak naya baꞌ. 13Aner aya nabasang ne na ta nye naya wu ru nye izo̱k igon, an me̱ be kubo̱so̱p natoon kuse azhe̱l nasho̱o̱n Adakunom baꞌ. 14Naya na ta se kpakarak nye nafe áner aya a tan te anerawe, áner kuri ayong ne á ninye itomong be kuto̱ro̱ng ba nong á ta kyem á ren ike̱ng iya i ta nye itek be imaan'e.
Currently Selected:
Ibrani 5: izrNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc