Marc 15
15
1Loshénè loshénè ke sindò tokou ndjè kòrdjé ke tokou dooudjé ke ndjè da maketourou ndedjidjé ke dooudjé toï ke ndjè gange sariadjé, dèdè mbòna ta ndedjina. Dèdè nto Jésus, dao sa ta karè Pilate.
2Pilate doudjè, I to Mbaibé lo Juifdjé wa? Jésus tél ke tar pa arè, I pa ban.
3Tokou ndjè kòrdjé ao toula dè ke tar dang dang.
4Pilate tél doudjè pana, I tél ke tar kada ang wa? Wo dèdè ntoula dòi ke tar baya.
5Jésus tél mare tar kada ang, tokou ban mè Pilate edji.
6Ndò ke to ndò ke bo, Pilate òrou ndjè kei koula kada aredè, doou kada ke dèdè ndikè.
7Doou kada éh horo dooudjé té mè kei koula té, dèdè ke ntòl mare dooudjé ndò ke dèdè dï ta mbeté tar lo ndjè ko béhdjé, ri doou nèn na Barabbas.
8Dooudjé ke tokou baya bayan lé dé rò Pilate té, ndoudjè ta da tokou nè nda leo.
9Pilate tél ke tar pa aredè, Sésè ndikidjé ta karem mòrou Mbaibé lo Juifdjé maresè wa?
10Mbata nè ngeré tòkou ndjè kòrdjé da mè mbata tar lo Jésus, mbata yèn dèdè dwaa Jésus darè.
11Tòkou ndjè kòrdjé ndedji dooudjé ke baya bayan lé ta kare òrou Barabbas aredè tourou Jésus té.
12Pilate tél ke tar mare pa aredè, Tokou ban sésè ndikimdjé ta karem da di ke nè ke ebarèdjé Mbaibé lo Juifdjé wa?
13Dèdè ntél mpa ke tarr, Etòlè dò kake dèse té.
14Pilate pa aredè, Mbata di wa, madjang di a nda wa? Dèdè mpa ke tarr wota, Etòlè dò kake dèse té.
15Tokou ban Pilate ndiki ta da baa kare mèdè woul. Nè nòrou Barabbas naredè, gè té a nè nounda Jésus ke djoula, nè nwèè naredè ta kare ntòlè dò kake dèse té.
16Ndjè pouroudjé ao sa ke mè ndooko té ke kare kei té, loou ke to kei gange saria, ke dèdè mbòn ndjè pouroudjé lodè toï.
17Dèdè doulè koubou ndörè, ke dèdè doudjou djòkedò konn doula dè té.
18Dèdè dao ntarè laphia, dèdè mpana, Laphia Mbaibé lo Juifdjé.
19Dèdè dounda dè ke kòbou, dèdè ntiwëré kèmè té, dèdè dongou mekedjé gòldè nange nwalè.
20Tokou dèdè nkoukè mbä nga, dèdè dòrou koubou ndörè rè té. Dèdè ntél doula koubou la ndja rè té. Dèdè dao sa daka ta tòlè dò kake dèse té.
21Doou kada, Simon ke Cyrène, to bò Alexandre ke Rufus, nè nï ndòò nao ntél ke béh, dèdè dwèè ta karè noto kake dèse lo Jésus.
22Dèdè ndé sa loou té ke ria na Golgotha, yèn pana, Loou singa dò.
23Dèdè ndiki ta karè vin ke dèdè mpolè ke botè myrrhe, nè ntaa ang.
24Dèdè ntòlè dò kake dèse té, dèdè nkaina koubou la horodè té. Dèdè ndòò né mbadi ta ko sè doou di baa a bou wa.
25Kade ï dél ase mouta, dèdè ntòlè dò kake dèse té.
26Maketourou ke dèdè ntò dò kake té pana mbata di a dounè dè wa, maketourou nèn pana, Mbaibé Lo Juifdjé.
27Dèdè ntòl ndjè boukoudjé djo sa deo kadaba, kada ke dò dji kolè té ke marè ke dò dji gèlè té.
28Tokou ban tar maketourou lo Allah dé to tar ke tokoro, Dèdè ntourè to doou ke ndjè mbeté tar ndedji.
29Dèdè ke dao ndai, dèdè ntadjè, dèdè ntouka dòdè, dèdè mpana, Héh, i ke pana a toudjou tòkou kei Allah a tél da ndò mouta,
30Adji ròi ndja, edisi ïya dò kake dèsen lé.
31Tokou ban tokou ndjè kòrdjé koukè to horodè té, dèdè mbòna ke ndjè da maketourou ndedjidjé, dèdè mpana, Nè nadji mare dooudjé, nè nase kadji rè ang.
32Are Christ Mbaibé lo Juifdjé disi ïya dò kake dèse loshénè, aredjè djo baa dja ko mèdjè té. Dèdè ke déh dò kake dèse té mbòrè té, dèdè ntadjè tò.
33Tokou kade arr dana ase misä, loou ndoul dò nange té toï nderèng kade tél djikada.
34Ke kade tén Jésus pa ke tarr, pana, Éloï, éloï lama sabachthani? yèn pana, Allah lom, Allah lom, mbata di a i ïyam nga wa?
35Maredjé ke horodè té ke isi mbòrè té, tokou do tar nèn, dèdè mpana, Woidjé, nè nao mmar Élie.
36Doou kada aïngorou, tokou ban nongou vin ke mase kougal té dousou, ntò ke kòbou narè Jésus ta karè naih, nè mpana, Ïyaidjé, djo tokou Élie a dé ta kòrè.
37Jésus ourouki nya, nè nouwa rè mbä.
38Tòkou koubou ke mè tòkou kei Allah té tir djo, ï tarr tir nderèng òrou nange.
39Tokou ndjè ngem ndjè pouroudjé ke arr no Jésus té wo Jésus ouwa rè ban mbä, nè mpana, Tokoro, doou nèn to ngon lo Allah.
40Dènèdjé éh kendé to, dèdè darr dèbè eo ta ko tar, horodè té Marie Magdala ke Marie kö Jacques ke ngadji ke Joses, ke Salomé déh kendé.
41Dèdè nèn, tokou Jésus éh Galilée té, dèdè dao ndja gè té ke dèdè dao nda sa, ke mare dènèdjé baya ke ao sa Jérusalem leo.
42Tokou kade woei mbä, mbata to to ndò da né ke dongor ndò sabbat,
43Joseph ke Arimathée dé, nè nto ndjè kemkarè ke madji horo ndjè gange sariadjé té, nè ndja ngebe mè béh kö lo Allah to. Nè nao rò Pilate té ke bel ang, ndoudjè mbata nin Jésus.
44Pilate edji tokou nè no Jésus woei mbä loshénè tokou ban. Pilate bar ndjè ngem ndjè pouroudjé, ndoudjè tokou Jésus woei loshénè mbä wa.
45Tokou nè no ndjè ngem ndjè pouroudjé pa tokoro, nè nïya nin Jésus nare Joseph.
46Joseph ndoko koubou lin, nòrou nin Jésus, nè nkè ke koubou lin lé. Nè ndoubè mè bwa yo té ke dourou mè tokou err té. Nè nila err ta bwa yo tén.
47Marie Magdala ke Marie ko Joses, dèdè do bwa ke dilè kendé.
Currently Selected:
Marc 15: KL1960
Highlight
Copy
Compare
Share
Want to have your highlights saved across all your devices? Sign up or sign in
© 1960, 2018.
To learn more or sign up for email updates about the mission of BFBS, click here:
