Iba Gana 2
2
Ngode Datagaliwabehanda Kini Dabo helenego ogo
1Hameigini tara tara palu ngarume#Iba 46.6#Ab 4.25-26
handabe manga hami̱ya lalu lo manda bialu kago aginagabe.
Wali agali urunime aguaore bami̱ya lalu ndi nde lalu karu irane aginagabe.
2Anduane Homogohondobi mbirali kini helo ibugua dabayagohondobi
wali agali tinaga kinirume wai bule manda bu ka.
Haru hagarumebi mandagi mo mogobu biruwa handabe manga halu ti hoba mialu kagoni.
3Wali agali o biarume lalu,
Libugua ina haru hole dariba hayago hado wahami̱ya, lalu ka.
Libugua ina haru nahelo yu wahami̱ya, lalu ka.
4Anidagua lalu kagoni.#Iba 37.13; 59.8; Min 1.26
Anduane Homogo ibu dahuliya andaga ibuninaga dagiani handadaliho biruwa
ti hondo oba halu ka.
Tigua ni lo manda biraruni
bame de gangabi henene halu buluba ndodagola
ibugua mo yo hondo ka.
5Ani bialu ti bayale bidabani keba holeneme
ti mini wilo mo gi halu ka.
6Ibugua keba howa lalu,
I̱naga Hari Saiono loma bini ngagoria
i̱naga kini ibu ogoriani tagira íbu heledo, lene.
7Kini ogoni ibugua agua lolebira.#Ab 13.33; Hi 1.5; 5.5
Anduane Homogohanda ledadagua latagi halu larogo.
Ibugua i̱hondo lalu, Í̱ i̱ igini kegoni.
Áyu i̱ í̱ aba harogoni.
8Wali agali hameigini tara tara palu ngaru bibahende#Iba 72.8; Dan 7.13-14; Yo 17.4-5
i̱na haru hoabe lariyagua ani bia lolebero.
Dindi bibahendebi mbirale bibahende ngarunibi
í̱naga dege holebira.
9Uruni bibahende í̱na kangome bo podolebere.#Iba 89.23; Mo 2.26-27; 12.5; 19.15
Mbodoli be gingiru laradagua
bibahende bo gingirulo paya paya bulebere.
10Bi hiriribi urunibi lene ngago manda buwa
dindini kini harimidaru tíni tiga bialu halimu.
Haru haga bibahende harimidaru tíbi hale halu bayuwa manda bilimu.
11-12Gi howa Anduane Homogonaga biabe bialu halimu.#Pb 2.12; Hi 12.28#Yo 5.23; 1 Pi 2.6
Duru lalu ma podope halu ibu igini mitangi bialu lotu lalimu.
Ibu abale keba haragola tí homo tongolodaga holigo
tí mini wialu ogonidagua bilimu.
Ibuha mo humbi howa ha do ho karu ti turubioreni ka.
Huli Bible © Bible Society of Papua New Guinea, 2002.