YouVersion Logo
Search Icon

Madiu 10

10
Yasuhanda abosolo homberiali (12) dabenego ogo
(Maga 3.13-19; Lugu 6.12-16)
1Yasuhanda ibunaga talima piaga homberiali (12) biaru olalu, Ibidaba, lowa dama daragahe karu wara tagi helobi dongone ko hagabi warago tara tara bo ngarubi bibahende mo dabi helobi ibugua tihondo hongo holene mini.#Md 9.35; Mg 3.13-15; 6.7; Lg 9.1 2Abosolo homberia (12) uruni tinaga mini uru, Saimono mini mende Pida ibubi ibu hamene Andurubi Yamese ibu hamene Yonebi libu Sebedi igini henego 3Pilibibi Badolomiubi Tomasabi dagisi muni miaga Madiubi Alibiasa igini Yamesebi Tadiasabi 4Saimono ibu ka̱i̱ mini mende Paidoro ibubi Yudasa Isagariodo ibu Yasu nde lenego ibubi uruni ti Yasuhanda dabene.
Homberiali (12) biarume biabe bule purogo lenego ogo
(Maga 6.7-13; Lugu 9.1-6)
5Yasuhanda agali homberiali (12) uruni ani dabowa ti pelonaga bi ogodagua lamini. Tá puwa Yuali ndo wali agali tara tara karuhabi Samaria tano karuhabi napilimu.#Ab 13.46 6Ogoniha poradagua tágua Isaraele wali agali ti nogo sibi pu ereba ho kagobi kagoria pilimu.#Yar 50.6; Md 15.24 7Puwa, Ngode Datagaliwabenaga Handame Ho Holene horo ha para holene kaware nga, lalu bi mana lamilimu.#Md 3.2; 4.17; Lg 10.9-11#Lg 10.4-12 8Ani buwa warago bo ngaru mo dabi halubi tongolo mini ngaru mo heya halubi ge hamuabi karu mo dabi halubi dama daragahe karu wara tagi halubi bialu halimu. Tágua áyu yu kamigoni yolome mini ndo yu kamigo ogoni bialu howa yolo ngi nalalimu.#Ab 20.33 9Tágua pialu howa ngolobi silibabi muni emene toea ale ngarubi mbira nayi pilimu.#Lg 10.4 10Ani buwa harigani pialu howa muni ngi lowa mo hanagane nubi tingiliya hunianebi ge subi halimbubi nayiore pilimu. Biabe biaga kagohondo mbirale mbira ibu buru pale kago ale mulene nga.#Dag 18.31; Lg 10.7; 1 Ko 9.14; 1 Ti 5.18
11Tágua tano mbiranibi mabu andaga mbirahabi anda puwa mbiralime, Tá palimi̱ya ibidaba, larabe hondole pilimu. Poramigola palima larago baba paliaabo halu polene tu haragola pilimu. 12Tágua anda mbiraha anda pialu howa, Mo palia holene tá heba helo, lalu anda pilimu.#Lg 10.5-6 13Wali agali anda ogoniha padarume, Tá palimi̱ya ibidaba, layagua tágua mo palia holene tá heba helo larimigo ti yu helo milimu. Tigua tá palimi̱ya ibidaba nalayagua tágua mo palia holene helo larimigo táni yamilimu. 14Anda mbiraha karumebi tano mbirani karumebi tá palimi̱ya ibidaba nale tágua bi laramigobi hale nahayagua nde tánaga geni abalu para kago taulo wahalu pilimu.#Ab 18.6 15I̱na tá langerogo Daba Ki Bulene Horo harangi Ngode Datagaliwabehanda dara howa Sodomo wali agalihondobi Gomora wali agalihondobi dabaradagua ndo wali agali tano ogoniha karu hongo howaore dabolebira, lene.#Pig 19.24-28; Md 11.24
Mo tandaga holene tagira ibulebira, lenego ogo
(Maga 13.9-13; Lugu 21.12-17)
16Yasuhanda lalu, Hale hadaba. Nogo sibi aleore kamigo tá biango gabua ale bu karuha i̱na pudaba larogoni. Tágua pialu howa bayuwa tendore nogombime yolo hinalu piagadagua pialu ega malibu aleme baya hangu hau howaore piagadagua pilimu.#Lg 10.3; Yo 10.12; Ab 20.29; Lm 16.19; 1 Ko 14.20; Eb 5.15 17Agali karume tá minuwa godi lole haru polebiragobi ngoai hagane andaha howa tá bolebiragobi ogoniore bayuwa mamage ho halimu.#Md 24.9#Mg 13.9-11; Lg 12.11-12; 21.12-15 18Tá i̱naga minini kamigo hondowa kini karubi gabumane haru haga karubi ti karia godi lama lalu minu yalu poragola tágua Bi Mana Debene tihondobi Yuali ndo wali agali tara tara karuhondobi lamilimulo haru polebira.#Ab 25.23; 27.24 19Tigua tá godi lama lalu haru poragola agi lole harudabe lowabi aguaore lolego harube lowabi mini dege dindi ho nahalimu. Lolene tu haragola lolene wiragobi loleberami. 20Ogoninaga bi loleberamigo táninaga bi ndo loleberami. Tá Aba Ngode Datagaliwabe Dinini ibugua tánaga miniha howa la lalu langirago loleberami.#Yo 14.26; 1 Ko 2.4
21Agalime tini hameneore homelo belo minu mulebira. Waneigini aba karume ti waneiginihondo ogonidagua dege bulebira. Waneiginime ti ai̱ya aba baba hoba migimigi bialu homelo belo minu mulebira.#Mai 7.6; Md 10.35; 13.12; Lg 21.16 22Ani buwa i̱naga minini kamigo hondowa bibahendeoreme tá handabe manga holebira. Anigo mbiralime hongo howa ho ununu lo haabo hayagua hamaro birangi Ngode Datagaliwabehanda ogoni ibu pele mulebira.#Md 24.9; 24.13; Mg 13.13; Lg 21.17; Yo 15.18-21 23Tá tano mbirani kamigola mo tandaga hayagua tano mendeni hole gerai lalu pilimu. I̱na táhondo larogo Agali Hole Ibiyago ibu naibida tagi howa tágua Isaraelenaga tano bibahendeni biabe bulene ngaru biai naholeberami.#Md 16.28
24Bu manda biaga kagome ibunaga biawai haga kago bolangua nahaga. Ani biagago garabaya biabe ale bia haga kagome ibunaga anduane kago bolangua nahaga.#Lg 6.40; Yo 13.16; 15.20 25Anigo bu manda biagame ibunaga biawai haga kagobi holene karulape mitangi bulene nga. Garabaya biabe ale bia haga kagomebi ibunaga anduane kagobi holene karulape mitangi bulene nga. Ani buwa tigua waneigini aba kago ibu mini Heyolabe laga kayagua ibunaga waneigini karubi ti mini koorene ko lolobada, lene.#Md 9.34; Mg 3.22; Lg 11.15
Ngode Datagaliwabehondo hangu gi ho holene ngago ogo
(Lugu 12.2-7)
26Anigo tágua wali agali hondowa gi nahalimu. Mbirale áyu do ho ngaru mani mo pani hai halu ohowa biniru manda biaihe lalu bulebira.#Mg 4.22; Lg 8.17 27I̱na arumaha howa langigi berogoni tágua horombe wá haragoria howa larodagua loyane bialu halimu. Táni hangu howa layane hale harimigo tágua anda dangini howa awa lalu lope halimu. 28Dinini heba ndo tingini hangu homelo baga karu hondowa gi nahalimu. Ai dinini tinginila kirabali heli dindiha mo bape habehe Ngode Datagaliwabe kago ibuhondo hangu gi ho halimu.#Ais 8.12-13; Lg 12.4; Ya 4.12; 1 Pi 3.14 29Ogoninaga tágua muni emene toea ale mbirame ega pimbi ale kira yolo bibehe kami. Anigo ega pimbi ale homane mbira tánaga Aba kagome dindiha pu ereba henalaga ka hendeni. 30Ai tánaga haguaneni mandari kamigo bibahendeore daga lai howa heleda hendeni.#Lg 21.18; Ab 27.34 31Anigo ega pimbi ale biru ngaru goyane lowa tá duniniore kamigo gi nahalimu, lene.#Md 6.26; 12.12
Kerisonaga kogoni lalu latagi holenebi Kerisohondo erembira mulenebi ogo
(Lugu 12.8-9)
32Mbiralime wali agali bu karu wanakuini howa i̱ mini lalu, I̱ Kerisonaga kogoni, lalu latagi hayagua i̱na nde i̱ Aba dahuliya andagani kagonaga wanakuini howa o biagonaga mini lalu ani dege lolebero.#Lg 12.8; Lm 10.9-10; Mo 3.5 33Anigo mbiralime wali agali bu karunaga wanakuini howa i̱ mini nale erembira ngiyagua i̱na nde i̱ Aba dahuliya andagani kagonaga wanakuini howa o biagonaga mini nale erembira mulebero, lene.#Mg 8.38; Lg 9.26; 2 Ti 2.12
I̱na mo palia holene yalu ndo mo wai bia holene yalu ibiru, lenego ogo
(Lugu 12.51-53; 14.26-27)
34I̱na dindi bibahendeni mo palia holene wule yalu ibiyada manda nabilimu. I̱na mo palia holene yalu ndo mo wai bia holene yalu ibiru.#Lg 12.49-53 35I̱ ibirugo iginime ti aba baba hoba migi migi bu halu waneme ti ai̱ya baba hoba migi migi bu biralu igiri oneme igiri ai̱ya baba hoba migi migi bu biralu bilo ani mo bia hole ibiru.#Mai 7.6 36Agalinaga waitigi hiriribiore ibuninaga onene waneiginibi ti holebira.#Iba 41.9; 55.13
37Mbiralime i̱ gubalini harago goyane lowa ibu ai̱ya abala gubalini timbuniore hayagua ibu i̱naga talima piaga habe nahe holebira. Ani buwa mbiralime i̱ gubalini harago goyane lowa ibu waneigini gubalini timbuniore hayagua ibubi nde i̱naga talima piaga habe nahe dege holebira.#Man 33.9; Lg 14.26 38Ani buwa mbiralime ibuninaga ira banga yalu i̱ porodagua talima naibiyagua i̱naga talima piaga habe nahe dege holebira.#Md 16.24; Mg 8.34; Lg 9.23; 17.33; Yo 12.25 39Mbiralime ibuninaga holene ngago mo tene hayagua holene ogoni ereba holebira. Ai mbiralime i̱ mo tene howa ibuni holene hado wahayagua holene gahenge yu holebira, lene.#Md 16.25; Mg 8.35; Lg 9.24; 17.33; Yo 12.25
Emena mulene ngago ogo
(Maga 9.41)
40Mbiralime táhondo, Ina hami̱ya ibidaba, layagua i̱bi ibula habiya i̱bu lara. Ani buwa mbiralime i̱hondo, Iya habiya ábu, layagua mbirali i̱ pu layagobi ibula habiya ábu laragoni.#Mg 9.37; Lg 9.48; 10.16; Yo 13.20 41Mbiralime Ngode Datagaliwabenaga bi latagi haga kago hondowa ibuhondo, Habiya ábu, layagua mani ibubi Ngode Datagaliwabenaga bi latagi haga kagobi libu harume ogoninaga emena yu holeberabi. Ani buwa mbiralime agali mini tigabiwi kago hondowa ibuhondo, Habiya ábu, layagua mani ibubi agali mini tigabiwi kagobi libu harume ogoninaga emena yu holeberabi.#1 Kin 17.10; 2 Kin 4.8 42Mbiralime i̱naga talima piaga mbira nira kago ibunaga talima piaga kagodago hondowa ibuhondo iba libule nelo hambu miyagua ogoni ibuhondo Ngode Datagaliwabehanda emena mulebiraore laro, lalu Yasuhanda lene.#Md 18.5-6; 25.40; Mg 9.41; Hi 6.10

Currently Selected:

Madiu 10: HUI

Highlight

Share

Copy

None

Want to have your highlights saved across all your devices? Sign up or sign in