Psalmyn 88
88
PSAL. 88.
Domine Deus.
1O Hiarn Yee dy my haualtys, ta mee er n’eamagh laa as oie kiongoyrt rhyts:
O lhig da my phadjer cheet stiagh ayns yn enish ayds, cromm dty chleaysh gys m’eam;
2Son ta m’annym laane dy heaghyn:
as ta my vioys tayrn er-gerrey gys yn oaie.
3Ta mee coontit myr fer jeusyn ta goll sheese ’syn ooig:
as ta mee er ve dy-jarroo myr dooinney nagh vel veg y vree ayn.
4Er my scarrey mastey ny merriu, goll roosyn ta gooint dy baase, as ta nyn lhie ’syn oaie:
ta ass cooinaghtyn, as ta giarit ersooyl veih dty laue.
5T’ow er my choyrt ’sy lagg s’inshilley:
ayns boayl dy ghorraghys, as ayns y diunid.
6Ta dty yymmoose lhie dy-trome orrym:
as t’ow er my heaghney lesh ooilley dty ster'myn.
7T’ow er choyrt m’ainjys foddey voym:
as er chur orrym dy ve feohdoil daue.
8Ta mee cha shickyr ayns pryssoon:
nagh voddym geddyn ass.
9Ta my hoilshey gaase moal lesh eer seaghyn:
Hiarn, ta mee er eamagh orts gagh-laa, ta mee er heeyney magh my laueyn hoods.
10Vel uss soilshaghey yindyssyn mastey ny merriu:
ny jean ny merriu girree seose reesht, as uss y voylley?
11Bee dty chenjallys-ghraihagh er ny hoilshaghey ’syn oaie:
ny dty irrinys ayns toyrt-mow?
12Bee dt’obbraghyn yindyssagh er nyn gronnaghey ’sy dorraghys:
as dty chairys ’sy cheer raad ta dy-chooilley nhee er ny yarrood?
13Hoods ta mee er eamagh, O Hiarn:
as dy-moghey hig my phadjer kiongoyrt rhyt.
14Hiarn, cre’n-fa t’ow treigeil m’annym:
as follaghey dt’eddin voym?
15Ta mee ayns treihys, as goll rishyn ta raad y vaaish:
dy-jarroo veih m’aegid derrey nish dt’atchimyn ta mee er hurranse lesh aigney seaghnit.
16Ta dty yymmoose lhie dy-trome orrym:
as ta’n aggle t’orrym royds er my chraghey.
17Haink ad cruinn mygeayrt-y-moo'm gagh-laa myr thooilley:
as ren ad m'y chionney cooidjagh er dy-chooilley cheu.
18My chaarjyn graihagh as my gheiney mooinjerey t’ow er goyrt ersooyl voym:
as er vollaghey m’ainjys ass my hilley.
Currently Selected:
Psalmyn 88: PS1765
Highlight
Copy
Compare
Share
Want to have your highlights saved across all your devices? Sign up or sign in
maintained by the British and Foreign Bible Society
