Psalmyn 86
86
MORNING PRAYER.
PSAL. 86.
Inclina, Domine.
1Cromm dty chleaysh, O Hiarn, as clasht rhym:
son ta mee boght, as ayns treihys.
2Freill uss m’annym, son ta mee ynrick:
my Yee, saue dty harvaant ta coyrt e hreishteil ayn-yds.
3Bee trokroil dooys, O Hiarn:
son nee’m geamagh orts gagh-laa.
4Gerjee annym dty harvaant:
son hoods, O Hiarn, ta mee troggal seose m’annym.
5Son t’ow uss, Hiarn, mie as graysoil:
as jeh myghin vooar dauesyn ooilley ta geamagh ort.
6Cur clashtyn, Hiarn, da my phadjer:
as smooinee er coraa my aghin’s imlee.
7Ayns earish my heaghyn nee’m geamagh ort:
son t’ow dy my chlashtyn.
8Mastey ny Jee'ghyn cha vel unnane erbee casley rhyts, O Hiarn:
cha vel unnane oddys jannoo myr t’ow uss dy yannoo.
9Hig ooilley ny ashoonyn t’ow er yannoo, as ver ad ooashley dhyts, O Hiarn:
as nee ad dt’Ennym y ghloyraghey.
10Son t’ow uss ard, as jannoo reddyn yindyssagh:
uss yn ynrycan Jee.
11Ynsee dooys dty raad, O Hiarn, as nee’m gimmeeaght ayns dt’irriney:
O jean my chree y sniemmey hood, dy voddym aggle y ghoaill roish dt’Ennym.
12Ver-ym booise dhyts, O Hiarn my Yee, lesh ooilley my chree:
as nee’m dt’Ennym y voylley son dy-bragh.
13Son s’mooar ta dty vyghin hym’s:
as t’ow er livrey m’annym veih diunid ny hoaie.
14O Yee, ta ny mooaralee er n’irree magh m’oï:
as ta sheshaght dy ghrogh ’leih er hirrey lurg m’annym, as cha vel ad er hoiaghey uss kiongoyrt rish ny sooillyn oc.
15Agh t’ow uss, O Hiarn Yee, laane dy hymmey as dy vyghin:
surranse-foddey, feoylt ayns mieys as firrinys.
16O chyndaa uss eisht hym’s, as jean myghin orrym:
cur dty niart da dty harvaant, as cooin lesh mac dt’inney-veyl.
17Soilshee orrym cowrey ennagh jeh dt’oayr, dy vod adsyn ta feoh oc orrym shen y akin, as goaill nearey:
er-y-fa dy vel uss, Hiarn, er chooney lhiam, as er my gherjaghey.
Currently Selected:
Psalmyn 86: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society