Psalmyn 27
27
EVENING PRAYER.
PSAL. 27.
Dominus illuminatio.
1Yn Chiarn my hoilshey as my haualtys; quoi roish eisht ghoym aggle:
yn Chiarn niart my vea; quoi roish eisht vee’m agglagh?
2Tra haink ny olkyssee, dy-jarroo my noidyn as my hranlaasee orrym dy my stroie:
ren ad snapperal as tuittym.
3Ga dy beagh sheshaght-caggee dy gheiney soit m’oï, foast cha bee my chree agglagh:
as ga dy jinnagh caggey girree seose m’oï, foast ver-ym my varrant ersyn.
4Un red ta mish er hirrey er y Chiarn, shen nee’m y yeearree:
dy-jarroo dy voddym vaghey ayns thie yn Chiarn ooilley laghyn my vea, dy akin aalid eunyssagh y Chiarn, as dy haaghey e hiamble.
5Son ayns traa my heaghyn follee eh mee ayns e chabbane:
dy-jarroo ayns boayl kellit e ynnyd-vaghee nee eh m'y ollaghey, as m'y hoiaghey seose er creg chloie.
6As nish troggee eh seose my chione:
er-skyn my noidyn mygeayrt-y-moom.
7Shen-y-fa nee’ms oural y hebbal ayns e ynnyd casherick lesh ard ghennallys:
nee’m arrane y ghoaill, as soilshaghey magh moylley yn Chiarn.
8Eaisht rish my choraa, O Hiarn, tra ta mee geamagh hoods:
jean myghin orrym, as clasht rhym.
9Ta my chree er yannoo imraa jeed’s; Shirr-jee my eddin:
Dt’eddin, Hiarn, nee’ms y hirrey.
10O ny follee dty eddin voym:
cha-moo jean dty harvaant y hyndaa ersooyl ayns jymmoose.
11T’ow er ny ve my chemmyrk:
ny faag mee, cha-moo jean m'y hreigeil, O Yee my haualtys.
12Tra ta my ayr as my voir dy my hreigeil:
ta’n Chiarn dy my ghoaill seose.
13Ynsee dooys dty raad, O Hiarn:
as leeid mee ayns y raad cair, kyndagh rish my noidyn.
14Ny livrey mee seose gys aigney my noidyn:
son ta feanishyn foalsey er n’irree seose m’oï, as lheid as ta loayrt aggair.
15Va mee dy-bollagh er choayll my chree:
agh dy vel mee dy-shickyr credjal dy akin kenjallys y Chiarn ayns cheer ny bio.
16O jean uss farkiaght er caa yn Chiarn:
bee dunnal, as nee eh gerjaghey dty chree, as cur uss dty hreishteil ayns y Chiarn.
Currently Selected:
Psalmyn 27: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society