Psalmyn 19
19
MORNING PRAYER.
PSAL. 19.
Cœli enarrant.
1Ta ny niaughyn fockley magh gloyr Yee:
as ta’n aer soilshaghey obbyr e laueyn.
2Laa lurg laa te er ny hoilshaghey:
as ta oie lurg oie cur toiggal jeh.
3Cha vel eddyr goan ny glaare:
raad nagh vel ny coraaghyn oc er nyn glashtyn.
4Ta’n sheean oc er gholl magh gys dy-chooilley cheer:
as ny goan oc gys ny ardjyn sodjey magh jeh’n theihll.
5Ayndoo t’eh er hoiaghey cabbane son y ghrian:
ta cheet magh myr dooinney-poosee ass e hiamyr, as goaill boggey myr dooinney lajer dy roih e choorse.
6T’eh goll magh veih’n ayrn sodjey jeh’n aer, as roih mygeayrt gys y chione echey reesht: as cha vel nhee erbee follit veih’n chiass echey.
7Ta leigh yn Chiarn ny leigh gyn-foill, niartaghey yn annym:
ta recortyssyn y Chiarn shickyr, as coyrt creenaght da’n vee-hushtagh.
8Ta slattyssyn y Chiarn jeeragh, as coyrt boggey da’n chree:
ta saarey yn Chiarn ynrick, as coyrt soilshey da ny sooillyn.
9Ta aggle y Chiarn glen, as farraghtyn son dy-bragh:
ta briwnyssyn y Chiarn firrinagh as cairagh ooilley dy-cheïley.
10Ny smoo t’ad dy v’er nyn yeearree na airh, dy-jarroo, na mooarane airh ghlen:
ny s’miljey neesht na mill, as y khere-volley.
11Lioroosyn myrgeddin ta dty harvaant ynsit:
as ayns freaylley ad ta leagh vooar.
12Quoi oddys ginsh earroo e loghtyn?
O glen mee veih my pheccaghyn follit.
13Freill dty harvaant myrgeddin veih peccaghyn dy ghaanys, nagh vowe ad barriaght harrym:
myr shen bee’m seyr, as gyn loght veih’n peccah trome.
14Lhig da goan my veeal, as smooinaghtyn my chree:
ve dy-kinjagh booisal ayns dty hilley,
15O Hiarn:
my niart as my Er-kionnee.
Currently Selected:
Psalmyn 19: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society