Psalmyn 116
116
MORNING PRAYER.
PSAL. 116.
Dilexi quoniam.
1Ta mee feer wooiagh:
dy vel y Chiarn er chlashtyn coraa my phadjer;
2Dy vel eh er chrommey e chleaysh hym:
shen-y-fa nee’m geamagh er choud as vee’m bio.
3Ren ribbaghyn y vaaish mee y chombaasal mygeayrt:
as hooar pianyn niurin greme orrym.
4Hooar mee seaghyn as trimshey, as ren mee geamagh er Ennym y Chiarn:
O Hiarn, ta mee guee ort, livrey m’annym.
5Ta’n Chiarn graysoil as cairal:
dy-jarroo, ta’n Jee ainyn myghinagh.
6Ta’n Chiarn coadey adsyn ta gyn loght:
va mish ayns seaghyn, as chooin eh lhiam.
7Chyndaa reesht eisht gys dt’ea, O my annym:
son ta’n Chiarn er choyrt leagh dhyt.
8As cre’n-fa? t’ow er livrey m’annym veih baase:
my hooillyn veih jeïr, as my chassyn veih tuittym.
9Nee’ms gimmeeaght kiongoyrt rish y Chiarn:
ayns cheer y sleih bio.
10Ren mee credjal, as shen-y-fa nee’m loayrt; agh va mee dy-mooar seaghnit:
dooyrt mee ayns my hiyr, Ta dy-chooilley ghooinney ny vreagerey.
11Cre’n cooilleeney ver-ym da’n Chiarn:
son ooilley ny bannaghtyn t’eh er hoilshaghey dou?
12Nee’ms goaill cappan y taualtys:
as nee’m geamagh er Ennym y Chiarn.
13Nee’m my vreearaghyn y eeck nish kionfenish ooilley e phobble:
feer deyr ayns shilley’n Chiarn ta baase e nooghyn.
14Cur-my-ner, O Hiarn, kys dy vel mish dty harvaant:
ta mish dty harvaant, as mac dt’inney-veyl; t’ow er vrishey my chianglaghyn veih my-chielley.
15Chebb-ym hoods yn oural dy hoyrt-booise:
as nee’m geamagh er Ennym y Chiarn.
16Eeck-ym my vreearaghyn gys y Chiarn, ayns fenish ooilley e phobble:
ayns cooyrtyn thie yn Chiarn, dy-jarroo, ayns y vean ayds, O Yerusalem. Moylley-jee yn Chiarn.
Currently Selected:
Psalmyn 116: PS1765
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society