Jabura 5
5
Yɛtɛ taaku koe Ala la mɔgɔ telenbalenu la ko la
1Dauda la beete do le ka, min be donden beeti bɔɔlanu la kuntige bolo. Beete le mu min be bɔɔla anun seredenu la
2Alatala, i tolomasɔ n na mamataraŋɛ la,
i ni n na tɔɔrɛ lɔn.
3N Marige Ala, i tolomasɔ n na dɛmare kelerenu la;
mansabaya be ile min bolo, n bɛnta n na mamataraŋɛ fɔla ile le ye.
4Alatala, ɲɔ tini be kɛnɛla, i be n kulɛ mɔɛren,
saguma n ni n yɛtɛ tabɛn, n ni taga i kɔnɔn.
5Ale Ala ma i la, min si ɲagalin ko koroŋɛ la.
Ko koroŋɛ te nɔ madonna i kɛnna.
6Fan nakoloyalanu te sɔ i ɲakɔtɔ.
I be ko koron malanu bɛ kɔnden.
7I si foniyante halagi le.
Alatala, i tana le mu faga malanu nun janfantenu la.
8Kɔnɔ nde kan be donna i batu boŋɛ tɔ i la fonisireya banba le sabu la;
n ni sujudu i la hɔrɔma bon saniyandeŋɛ tɔ, i la ɲalakilaŋɛ la.
9Alatala, n jaguenu la ko la, n kun sɔ i la kila telendeŋɛ tɔ,
i ni kila ɲiɲa n ɲatɔ.
10Bayi anu be fenfen min fɔla, lannanteya yo bele a tɔ.
Anu juse be faren tiɲare la.
Anu da be toren iko gaburu lakareŋɛ,
fenfen min be bɔɔla a tɔ, a be mɔgɛnu la ko tiɲala le.
11Yandi Ala, wo ɲagankata bɛ le sa anu kunma.
Anu yɛtɛ la wale ni anu la ko tiɲa.
Anu bata ko koroŋɛ siyama ma, awa anu bee,
bayi anu murutɛta i ma.
12Kɔnɔ minnu bɛ taakuta i la, anu bɛ ni sɛɛwa,
anu ni to beete bɔɔla ɲagaliŋɛ la kudai.
I tɔgɛ be diyaren minnu ye, anu makanta,
anu ni sɛɛwa i la ko la.
13Awa, ile Alatala, i si barikɛ sa telenbaga la ko tɔ.
I la hinnɛ min be a lamilinden, a bata ma a ye tangare la.
Currently Selected:
Jabura 5: MOG
Highlight
Copy
Compare
Share
Want to have your highlights saved across all your devices? Sign up or sign in
