Jabura 44
44
Marige, i kana mɔ lafili kudai!
1Kora la deŋɛnu la mɔgɔ lakaran beete do le ka, min be donden beeti bɔɔlanu la kuntige bolo.
2Ee Ala; i ka koe minnu ma nun mɔ benbanu ye wagati tanbireŋɛ tɔ,
mɔ bata wo koenu mɔɛ yati;
mɔ benbanu bata wo fɔ mɔ ye nun,
3anu ko aa i ka sii gbɛtɛnu bee i sɛnbɛ la,
alako i ni mɔ benbanu lasabati kɛ duge tɔ.
I ka ɲɔ kaanu botege, i ka i la mɔgɛnu ladaha.
4Anu ma wo sabati dula sɔtɔ anu la faŋɛ le sabu la.
Anu ma wo kise sɔtɔ anu yɛtɛ sɛnbɛ le la.
Kɔnɔ i bolo sɛnbɛma anun i la ɲa lakɛnɛ anu ye,
wolo ka wonu dii anu ma,
bayi anu di i ye.
5Ee Ala, n na Mansa mu ile le la,
ile min be kunnawule diila Yaguba bɔnsɛ ma.
6Mɔ be mɔ jaguenu mutukunna ile le sabu la,
ka mɔ kɛlɛɲɔgɛnu danpɛ i tɔgɛ la.
7Bayi n te laa n na ndaka nun n na faŋɛ le la, n na kisi koe la.
8Kɔnɔ ile le ka mɔ lakisi mɔ jaguenu ma,
i ka mɔ kɔnnanu lamalu.
9Wagate bɛ mɔ be ile Ala tantula,
mɔ ni i matɔgɔ kudai.
Beeti bɔɔlá la suleŋɛ donden.
10Kɔnɔ kɔtɛ, i bata mɔ lafili,
i bata mɔ lamalu,
ka mɔ la kɛlɛ malanu be bɔɔla wagate min tɔ, i bele tola anu fɛ bitugun.
11I bata mɔ labori mɔ jaguenu la;
mɔ kɔnnanu be fɛrɛ ɲinila anu ni mɔ bolofeŋɛ bɛ jigan.
12I bata mɔ ma iko saaka dɔmɔnɛŋɛnu,
i ka a ma mɔ bata malansan sii gbɛtɛnu tɔ.
13I bata mɔ mayita sɔn dɔgɔmaŋɛ la,
i ɲan ma tɔnɔ yo sɔtɔ mɔle i la jama mayita koe la.
14I ka koe minnu ma mɔ la,
mɔ sigiɲɔgɔ sii gbɛtɛnu minnu be mɔ lamilinden,
anu be mɔ mayola, anu be mɔ majelela wo la.
15I ka a ma sii gbɛtɛnu be yola mɔ ma anu la finare kumanu tɔ.
Anu bata mɔ ma anu la mamajelefeŋɛ la.
16Wagati bɛ n juse be ɲatadonden;
maluya bata n kun majigi.
17Bayi n bata mɔ kɛlɛlá la mɔnɛ kuma
anun a la narili kulɛ mɔɛ.
18Hali wo bɛ to mata mɔ la, kɔnɔ mɔle kan ma ɲina i ma,
mɔ ma i la lahire tiɲa.
19Mɔ juse ma saagi ile kɔma,
mɔ ma i la kila boloka.
20Hali i to bata mɔ muɲunkun,
i ka mɔ boloka wula butɔ wulenu tɛma, ka mɔ to saya dibe tɔ.
21Ka mɔ ɲinata mɔ Marige Ala tɔgɛ ma nun,
mɔ ka mɔ bole lafonti ala do gbɛtɛnu batu koe la nun,
22Ala te wo lɔn ba?
Bayi a ka mɔgɛ jusu butɔ gundoenu bɛ lɔn.
23Kɔnɔ mɔ be gbaloe sɔtɔla ile len na ko la wagati bɛ,
anu be mɔ fɛlɛla iko saakanu minnu be nala kannatɛgɛla.
24Ee Marige, kunɛn; i be i yɛtɛ lakinnɔgɔla fenna?
Wuli; i kana mɔ lafili kudai!
25I be i ɲakɔtɔ dogonna mɔ la fenna?
I kana i yɛtɛ laɲina mɔ la bɛlɛya nun mɔ la ɲagankata la.
26Bayi mɔ bata boe duge tɔ;
mɔ bue bata nara duge la.
27Yandi, i la fonisireya banbale sabu la,
wuli i ni mɔ dɛman, i ni mɔ kunka.
Currently Selected:
Jabura 44: MOG
Highlight
Share
Compare
Copy
Want to have your highlights saved across all your devices? Sign up or sign in
