Jabura 22
22
Ala, i be yanfayala n na fenna?
1Dauda la beete do le ka, min be donden beeti bɔɔlanu la kuntige bolo. Beete le mu min be bɔɔla iko beete min tɔgɔ: «Minaŋɛ min be sorila.»
2N na Ala, n na Ala, i ka n boloka fenna?
I yanfayata n dɛman koe la fenna? I mɛn bele n diri kulɛ lamɔɛla?
3Ee n na Ala, n be n kulɛ mayɛlɛla tele tɔ, kɔnɔ i bele n jaabila.
N be wo mala sue wagati bɛ; sulen yo bele n ɲɛ.
4Adun ile le saniyanta;
ile min be majigiren bani Isirayila la tantue tɛma.
5Mɔ benbanu dɛnkɛnɛyata ile le ma;
anu la dɛnkɛnɛyareŋɛ i ma, i nata anu lakisi.
6Anu to ka anu kulɛ labɔɔ i ma, anu hɔrɔyata;
anu to dɛnkɛnɛyata i ma, anu ma to maluya tɔ.
7Kɔnɔ nde kan be toren iko dendele, iko mɔgɔ ma n na.
Kɔnɔ adamadeŋɛnu be n namalula, jama be n majelela.
8Min bɛ be n yenna anu be yola n na;
anu be girinbala anu da tɔ, anu be anu kuŋɛ ladinbila.
9Anu ko: «A ma a ɲa sɔ Alatala le la ba?
Awa, a ni a lakisi;
a ni a bɔɔ a la ɲagankata tɔ, bayi a di a ye.»
10Ee Alatala, ile bata n nabɔɔ n nɛɛnɛ bue tɔ;
i ka n sa a jusu kuŋɛ kunma n mɛnni koe la.
11Bɔɔla n sɔtɔ wagate n be kɛrɛkɛrɛren i ye;
bɔɔla n be n nɛɛnɛ bue tɔ, i mu n Marige Ala le la.
12I kana yanfaya n na, bayi kɔntɔfile bata sutuya;
adun, mɔgɔ yo bele min si n dɛman.
13N jaguenu be n na miliŋɛ tɔ iko tuura siyamanu.
Anu bata n namilin iko Baasan duge tɔ tuura sɛnbɛmanu.
14Iko jata tini be ŋurɛla subu fara koe la,
anu ka anu da laka n ma ɲɔgɔnna le.
15N sɛnbɛ bata to iko je min be woyila,
n kolenu bɛ bata ɲɔgɔn boloka;
n juse bata faga n ma,
a ɲan bata to iko tule min bata kunɛn.
16N jɔkɔlɛ be balaren iko lɔndɔ bintandeŋɛ.
N nɛŋɛ be naralen n da butɔ.
Ee Ala, donden de be toren n ni gaburu tasa sɔtɔ.
17Mɔgɔ koroŋɛ jama bata n namilin,
anu be n na miliŋɛ tɔ iko wulu kuruŋɛ,
anu bata n bolenu anun n kɛŋɛnu sɔgɔ.
18N bata bara, n kolenu bɛ si nɔ kɔntila kɛnɛ ma.
N jaguenu be anu ɲa banbanden n ma.
19Anu be n na kutanu fatanna ɲɔgɔn tɛma,
anu be tonbola mala, a bɛnta n na doroke ni to min ye.
20Kɔnɔ ile Alatala, i kana yanfaya n na,
ile min mu n sɛnbɛ la, na n dɛman teriya la.
21I ni n nɛɛ lakisi faŋɛ ma,
i ni n natanga kɛ wulenu ma.
22I ni n nakisi jatanu da ma,
anun tuuranu bina ma.
Ee, kɔnɔ i ɲan bata n jaabi!
23N si i tɔgɛ la ko fɔ le n na mɔgɛnu ye,
n si i matɔgɔ le jama madɛndeŋɛ tɛma.
24Wole min be kilanden Alatala la, wo a tantu;
wole Yaguba Isirayila kaa bɔnsɛ bɛ, wo a matɔgɔ;
wole bani Isirayila bɔnsɛ bɛ, wo kilan a la.
25Bayi Alatala ma yo tɔɔrɔbaganu la tɔɔrɛ ma;
a ma a yɛtɛ dogon a la.
Kɔnɔ ka tɔɔrɔbaga ka tarile ma, a si a jigan de.
26Alatala, ile le la ko be a mala, n ni i matɔgɔ jama banba madɛndeŋɛ tɛma.
N si n na lahirenu lakamali le mɔgɛnu ɲala, minnu be kilanden i la.
27Fugarenu si dɔmɔre ma han anu ni fa;
minnu be Alatala ɲinila, anu si naa a matɔgɔ le.
Ala mu simaya yanfama diila wonu ma.
28Dunuya mɔgɛ bɛ si naa Alatala la ko talɔn de,
anu ni naa anu yɛtɛ lasaagi a ma;
seenu bɛ si naa sujudu le a ye.
29Bayi a bɛ be Alatala la mansaya le kɔtɔ,
ale le be seenu bɛ yamɔrila.
30Dunuya sɛnbɛmanu bɛ be naren dɔmɔre madula,
ka naa anu majigi Alatala ye.
Iyon, minnu bɛ si naa ma bangue la,
anu te nɔ anu yɛtɛ nɛɛ latangala,
wonu bɛ si naa anu kunsin a ye.
31Anu bɔnsɛnu si naa Alatala batu le;
anu si to anu Marige Ala la ko fɔla ɲɔgɔn ye.
32Anu si naa a la teleŋɛ ɲamakaran mɔgɛ bɛ ye minnu be nala sɔtɔla,
anu ni a fɔ ale Ala ka min nagiri.
Currently Selected:
Jabura 22: MOG
Highlight
Copy
Compare
Share
Want to have your highlights saved across all your devices? Sign up or sign in
