Jabura 115
115
Alatala biliya tige tantu beete
1Alatala, biliya kana dii mɔle ma, a kana dii mɔle ma feu,
fɔ a ni dii ile len tɔgɛ ma,
i la fonisireya nun i la kuma dɔndɔ tigiya sabu la!
2Fende sii gbɛtɛnu be mɔ maɲininkala, anu ko: «Wo la Ala be mina le?»
3Kɔnɔ mɔ ka a lɔn, mɔ la Ala be saŋɛ tɔ le.
A dita min bɛ ye, a be a bɛ mala le.
4Anu la kuyenu kan, sanuɛ nun kaalise tun de mu anu la,
mɔgɛnu be minnu ɲiɲaren anu bole la.
5Da be anu ye, kɔnɔ anu te kuma.
Ɲa be anu ye, kɔnɔ anu te ɲɔ tayen.
6Tole be anu ye, kɔnɔ anu te fenfen mɔɛ.
Anu suŋɛ be, kɔnɔ anu te fenfen kuɲɛ mɔɛ.
7Anu bolenu be, kɔnɔ anu te fenfen maga.
Anu kɛŋɛnu be, kɔnɔ anu te tagaman.
Anu te kulɛ yo labɔɔ anu kan butɔ.
8Minnu be anu ɲiɲala,
minnu be anu kuŋɛ taakula anu la,
wonu tugun si to le iko ande.
9Isirayila kaanu, wo kuŋɛ taaku Alatala la!
Ale le mu anu dɛmanná nun anu kantalá la.
10Harona bɔnsɛ, wo kuŋɛ taaku Alatala la!
Ale le mu anu dɛmanná nun anu kantalá la.
11Wole minnu bata ma Ala ɲalakilannanu la, wo kuŋɛ taaku Alatala la!
Ale le mu anu bɛ dɛmanna nun anu kantala la.
12Alatala be a hakkile latagaren de wo mɔ ma,
a si barikɛ sa wo mɔ la ko tɔ.
A si barikɛ sa bani Isirayila bɔnsɛ la ko tɔ.
A si barikɛ sa Harona bɔnsɛ la ko tɔ.
13A si barikɛ sa Ala ɲalakilannanu la ko tɔ,
mɔgɔ lanmanu anun kayiba kendenu.
14Alatala si wo layiriwa le, wo nun wo la deŋɛnu.
15Alatala ni barikɛ sa wo la ko tɔ, ale min ka saŋɛ nun duge da!
16Saŋɛ, Alatala le tɛŋɛ mu a la,
kɔnɔ a ka duge le kan dii adamadeŋɛnu ma.
17Mɔgɔ fagareŋɛnu le bele Alatala tantula,
aligiyama tagalanu le tugun bele Alatala tantula.
18Wo mɔle le mu, wo mɔle le be Alatala matɔgɔla,
bɔɔla kɔtɛ ma han kudai.
Wo Alatala tantu!
Currently Selected:
Jabura 115: MOG
Highlight
Share
Compare
Copy
Want to have your highlights saved across all your devices? Sign up or sign in
