Lewi bɔnsɛnu la sariya 6
6
Sariya sarika lakelanu ye
Sarika bintannɛŋɛ la ko sariya
1Alatala kumata Musa ye, a ko: 2«Kɛ yamɔre don Harona nun a la deŋɛnu bolo. Sarika bintannɛŋɛ la ko sariya le ka. Sarika bintannɛŋɛ ni to sarika bintandula kunma sue tɔ, a ni bintan han saguma. 3Sarika lakelá ni kurutu kɔtɔnɛŋɛ beema don, a ni kuta beema tugun najigi a ma. Ta min ka sarika bintannɛŋɛ bintan, sarika lakelá ni naa a buguta jigan sarika bintandula kɔtɔ, a ni a sa sarika bintandula kɛnna. 4A tini wo wale ban, a ni a la kuta bɔɔ a ma, a ni kuta do tugun najigi a ma, alako a ni wo ta buguta doni daaka kɔma dula kɛrɛkɛrɛreŋɛ tɔ. 5Ta min be bitaren sarika bintandula kɔtɔ a te dufen. Saguma yo saguma sarika lakelá ni lɔgɛnu kunbɛn a ni ta labita, a ni sarika bintannɛŋɛ sa ɲɔ kunma. A be kanunteya sarikanu kɛ́ŋɛ tugun bintanna ɲɔ le. 6Wo ta ni to bitaren tɛmuɛ bɛ tɔ sarika bintandula kɔtɔ, a te dufen.»
Sugu kolo sarika la ko sariya
7«Sariya le ka sugu kolo sarika la ko tɔ. Harona la deŋɛnu ni wo sarika nati sarika bintandula ɲakɔtɔ nde Alatala ɲala. 8Sarika lakelá ni bolo ɲa dɔndɔ kɔɔ anun tule nun sorayi min be sala a kunma, a ni wo bɛ bintan sarika bintandula kunma. A kuɲɛ di nde Alatala ye, a be maren tɔnkuma le la n ɲɛ sarika bɛ la ko tɔ. 9Sarika tɔɛ min ma bintan, Harona nun a la deŋɛnu ni wo dɔmɔ a lɛbini bɔnɛ la dula saniyandeŋɛ do tɔ hɔrɔma dingira tatta butɔ. 10A te bɛn a ni taba lɛbinɛ fɛ, bayi n be min diila anu ma ɲɔgɔnna, wo be fatanden n na sarika bintannɛŋɛnu le la, minnu be saniyanden koola iko junubu kafari sarika nun fan nasaagi sarika. 11Harona la den kayireŋɛnu si nɔ wo dɔmɔla. Yamɔre le mu wo nun wo bɔnsɛ bɛ ye min te tiɲa abada. Mɔgɛ min bɛ be a madonna wo sarika bintannɛŋɛnu la minnu be bɔɔla nde Alatala ye, wo tigi bata kɛrɛkɛrɛ n ɲɛ.»
12Alatala kumata Musa ye a ko: 13«Harona yo, a la deŋɛnu yo minnu be nala sɔla a faga kɔma, ka anu be sɔla lun min na, a bɛnta anu ni sugu kolo munge bɔɔ sarika la nde Alatala ye, borondeŋɛ ɲa dɔndɔ. A tɛma ni bɔɔ saguma, wo tɛma doe wura la.
14Kɛ sugu kolo munge ni basan tule fɛ a ɲinma la, a ni yilan daga tɔ. Ka i ka a ɲiɲa dɛgɛ la, i ni taga a dantɛgɛ nde Alatala ye, a kuntenu ni sa ta tɔ, a ni ma kuɲɛ diyama la n ɲɛ.
15Sarika lakelá min be nala mala Harona faliŋɛ la a la deŋɛnu tɛma, a ni wo sarika mɔɔle bɔɔ. A ni ma ɲɔgɔnna le tɛmuɛ bɛ tɔ nde Alatala ɲala. Wo sarika bɛ ni bintan. 16Sarika lakelá sɔ sarika bɛ ni bintan, fenfen kana dɔmɔ a la.»
Junubu kafari sarika la ko sariya
17Alatala kumata Musa ye, a ko: 18«Kɛ yamɔre don Harona nun a la deŋɛnu bolo: ‹Sariya le ka junubu kafari sarika la ko tɔ. Junubu kafare sarika ni kannatɛgɛ sarika bintannɛŋɛ be kannatɛgɛla ka min na le nde Alatala ɲala, bayi fondo le mu min saniyanden han a tanbita a tɔ. 19Sarika lakelá min be junubu kafari sarika lakela, wolo si nɔ a sube dɔmɔla dula saniyandeŋɛ do tɔ Ala la hɔrɔma dingira tatta butɔ. 20Min yo be magala wo sarika la, wo tigi bata kɛrɛkɛrɛ nde Alatala ye. Ka a base sulenta kuta do ma, wo kuta ni ko dula saniyandeŋɛ do tɔ. 21Ka wo sube be tabala benge daga le tɔ, a tini ban a tabala, a ni daga te. Ka a be tabala daga tɔ min be ɲiɲaren taasa la, wo daga ni ko je la a ɲinma la. 22Kɛ sarika, kaye sarika lakelanu tun de be a dɔmɔla, bayi sarika le mu min be saniyanden koola. 23Kɔnɔ ka a taranta sarika do base donta hɔrɔma dingira butɔ kunka la ko la, mɔgɔ yo kana wo junubu kafari sarika kan dɔmɔ. Wo sarika mɔɔle bɛnta a ni bintan ta la.›»
Currently Selected:
Lewi bɔnsɛnu la sariya 6: MOG
Highlight
Share
Compare
Copy
Want to have your highlights saved across all your devices? Sign up or sign in
