Lewi bɔnsɛnu la sariya 11
11
Dalifen haramureŋɛ nun a ladagɛreŋɛ la ko sariya
1Alatala kumata Musa nun Harona ye a ko anu ma: 2«Wo ni a fɔ Isirayila kaanu ye, dalifeŋɛnu minnu be duge kunma, minnu sube be ladagɛren wo ye, wondelen mu ka: 3Sube toro tigenu bɛ minnu tore be tafatanden fila la, a mɛn be ɲagama dɔmɔla, a mɛn ni a layɛlɛ a kaŋɛ tɔ. Wo si nɔ le wonu sube dɔmɔla.
4Kɔnɔ wo kana dalifeŋɛ sube dɔmɔ min be ɲagama dɔmɔla, a mɛn ni tasaagi a layɛlɛla a kaŋɛ tɔ, kɔnɔ a tore bele tafatanden fila la, ka wo ma dalifeŋɛ min tore be tafatanden fila la, kɔnɔ a te tasaagi dɔmɛ layɛlɛla a kaŋɛ tɔ. Wo butɔ, wo kana kɛ dalifeŋɛnu sube dɔmɔ. Ɲɔgɔmɛ be haramuren de wo ma, bayi a be ɲagama le dɔmɔla, a mɛn ni tasaagi a layɛlɛla a kaŋɛ tɔ, kɔnɔ a tore bele tafatanden fila la. 5Dalifeŋɛ donu tugun be, anu be ɲagama le dɔmɔla, anu mɛn ni tasaagi a layɛlɛla anu kaŋɛ tɔ, kɔnɔ anu tore bele tafatanden fila la. Anu be haramuren de wo ma. 6Tayore tugun be ɲagama le dɔmɔla, a mɛn ni tasaagi a layɛlɛla a kaŋɛ tɔ, kɔnɔ a tore bele tafatanden fila la. A be haramuren de wo ma. 7Kɔsɛ kan, a tore tafataŋɛ kolo, kɔnɔ a be min dɔmɔla a te tasaagi wo layɛlɛla a kaŋɛ tɔ. A be haramuren de wo ma. 8Wo kana wonu sube dɔmɔ, wo kana maga anu binde la. Anu be haramuren de wo ma.
9Dalifeŋɛnu minnu be je tɔ, minnu dɔmɔ koe ladagɛren wo ma, wondelen mu ka: minnu bala be, anun kobole be minnu ma. Wo si nɔ wo yɛgɛnu kan dɔmɔla le, minnu be ba tɔ, ka wo ma ji sɛɛma tɔ. 10Kɔnɔ dalifeŋɛnu minnu be ba tɔ, ka wo ma kɔɛɛ tɔ, bala bele minnu ma, ka wo ma kobole bele minnu ma, wonu be haramuren de wo ma. 11Iyon, anu mu fondo manɛfireŋɛ le la wo ye, wo kana anu sube dɔmɔ. Anu fagareŋɛ tugun be haramuren de wo ma. 12Bala nun kobole bele je tɔ dalifeŋɛ minnu bɛ ma, wonu be haramuren de wo ma.
13Konden manɛfireŋɛnu le ka, wo ma bɛn wo ni minnu dɔmɔ: silale, jiga, jiga bɔnsɛ bɛ, 14segelepenpe, sinbiŋɛ anun wo bɔnsɛnu, 15Wo kana kaaka tugun dɔmɔ, anun a bɔnsɛ bɛ. 16Siyankole, jurujuke, bɛrɔtu anun wo bɔnsɛ bɛ, 17subaga kondeŋɛ, tintinsole, mamadabe, 18tayore kondeŋɛ, gbengbe, kilanjaŋɛ, 19simpoe, laaba a bɔnsɔ bɛ, kumaaré, anun libilibe, wo kana wonu tugun dɔmɔ.
20Nilama mɛsɛŋɛnu, gabataŋɛ nun kɛŋɛ be minnu ye, anu be haramuren de wo ma. 21Kɔnɔ wo nilamanu bɛ tɛma, minnu kɛŋɛnu be anu ni tun, wo si nɔ wonu kan dɔmɔla. 22Iko babatenu, tugumɛnu, anun wo bɔnsɛ bɛ. 23Nilama mɛsɛŋɛnu gabatan tigenu kɛŋɛ be minnu ye, kɔnɔ anu te tun, wonu be haramuren de wo ma.
24Ka wo be magala subu saniyanbale binde la, wo si ma le mɔgɔ saniyanbale la han wura la. 25Min be anu binde donila, a si ma le mɔgɔ saniyanbale la han wura la. Fɔ a ni a la kutanu ko. 26Sube min bɛ tore bele tafatanden fila la, anun sube min bɛ be ɲagama dɔmɔla, kɔnɔ a te tasaagi a layɛlɛla a kaŋɛ tɔ, wonu be haramuren de wo ma. Min tini maga wo la a si ma le mɔgɔ saniyanbale la. 27Toro bele sube min bɛ ye, a be tagamanna kɛn naanɛ kunma, anu be haramuren de wo ma. Min tini maga anu binde la a si ma le mɔgɔ saniyanbale la han wura la. 28Anu be haramuren de wo ma. Min tini anu binde doni, a si ma le mɔgɔ saniyanbale la han wura la. Fɔ a ni a la kutanu ko.
29Nilama mɛsɛŋɛnu min be buubula, ka wo ma minnu be tola dinkanu butɔ, anu be haramuren de wo ma. Anu tɔgɛnu le ka: salendeŋɛ, tula, sagare, anun wonu bɔnsɛnu, 30sogoronkanbe, kasa, bunburuka, danke nun koole. 31Wo nilama mɛsɛŋɛ mɔɔlenu be haramuren de wo ma. Ka min yo magata anu fagareŋɛ la, wo si ma le mɔgɔ saniyanbale la han wura la. 32Ka a taranta, anu fagareŋɛ boeta fondo kunma, wo tugun si ma le fondo saniyanbale la, iko fondo safeŋɛ lɔgɔnɛŋɛ, kuta, kolofeŋɛ bole, bɛkke, ka wo ma wali miraŋɛ do. A bɛnta wo fondo tigi ni sa je tɔ a ni to saniyanbaliya tɔ han wura la jɔ a ni saniyan. 33Ka wo nilama mɔɔle boeta fondo safeŋɛ bangunɛŋɛ do tɔ, wo safeŋɛ nun a butɔfeŋɛ bɛ si ma le saniyanbale la. A bɛnta wo ni wo safeŋɛ te. 34Kɛ safeŋɛ mɔɔle bɛ, je min be a butɔ, a tini sa dɔmɔ ladagɛreŋɛ do ma, wo dɔmɛ tugun si ma le saniyanbale la. Minfeŋɛ mɔɔle yo be nun wo safeŋɛ butɔ, wo tugun si ma le saniyanbale la. 35Ka wo nilama mɔɔle fagareŋɛ boeta fondo do tɔ, wo si ma le fondo saniyanbale la, iko dɛgɛ bintandula, ka wo ma daga. Anu to mata fondo saniyanbalenu la wo ye, a bɛnta wo ni anu tiɲa. 36Kɔnɔ ka a taranta anu fagareŋɛ boeta tenge tɔ, ka wo ma ji mandidula, wonu te ma saniyanbale la. Kɔnɔ mɔgɔ min tini a bole maga a fagareŋɛ la, wo si ma le mɔgɔ saniyanbale la. 37Ka a fagareŋɛ boeta sugu kole tɔ min be sɛnɛla, wo te ma saniyanbale la. 38Kɔnɔ ka a fagareŋɛ boeta sugu kole tɔ min be je tɔ, wo sugu kole si ma le saniyanbale la wo ye.
39Ka kolofen nadagɛreŋɛ do fagata, mɔgɛ magata a binde la, wo tigi si ma le saniyanbale la han wura la. 40Min tini a sube dɔmɔ, a si ma le saniyanbale la han wura la. Fɔ a ni a la kutanu ko. Min tini wo subu binde doni, wo tigi ni a la kutanu ko, a si ma saniyanbale la han wura la.
41Kɛ nilamanu minnu be buubula duge tɔ, anun minnu be tola dinkanu butɔ, anu bɛ be haramuren de wo ma. Wo ma bɛn anu dɔmɔla. 42Bubufeŋɛnu nun nilama mɛsɛŋɛnu, minnu be buubula anu bue ma, anun minnu be tagamanna anu kɛn naanɛ la ka wo ma anu kɛn siyama la, anu hali dɔndɔ bele ladagɛren. Wo kana anu dɔmɔ. 43Wo kana wo yɛtɛ manɛfi wo nilama mɛsɛŋɛnu mɔɔle la ko la. Wo kana anu dɔmɔ. 44Bayi, nde le mu Alatala la, wo Marige Ala. Wo ni wo yɛtɛ kɛrɛkɛrɛ nde le ye. Wo ni saniyan, bayi nde saniyanta. Wo kana wo yɛtɛ ma saniyanbale la wo nilama mɛsɛŋɛnu la ko la, minnu be tola tagamanna duge tɔ.
45Nde le mu Alatala la min ka wo labɔɔ Misira duge tɔ, alako n ni ma wo Marige Ala la. Wo butɔ, wo ni saniyan, bayi nde saniyanta. 46Sariya le mu wo la nilama bɛ la ko tɔ: kondeŋɛnu, ji tɔ feŋɛnu bɛ, anun min bɛ be kɛnɛ tɔ. 47Wo butɔ, wo si nɔ subu saniyandeŋɛ nun subu saniyanbale tɛtɛgɛbɔɛ lɔnna le, subu ladagɛreŋɛ nun subu haramureŋɛ.»
Currently Selected:
Lewi bɔnsɛnu la sariya 11: MOG
Highlight
Share
Compare
Copy
Want to have your highlights saved across all your devices? Sign up or sign in
