Yaguba 3

Nɛŋɛ la ko gbaloe

1N nɛɛnɛdɔndɛnu, a ma bɛn mɔgɔ siyama ni ma diina karamɔgɛ la wo ɲaama, bayi wo ni a lɔn mɔle diina karamɔgɛnu si naa makiiti le a bɛlɛma la tanbi mɔgɔ gbɛtɛnu la. 2Wo mɔ bɛ be tantanna ko siyama tɔ. Ka mɔgɔ do bele tantan kuma yo fɔla, wo tigi si nɔ a yɛtɛ tabitala koe bɛ butɔ, mɔgɔ kamalireŋɛ le mu a la. 3Misali la, mɔgɛ tini di soee ni a diyanankoe ma, a be karafue le ladonna a da tɔ. Wolo si nɔ a bale bɛ latagamanna. 4Kuluŋɛ la koloya mata kiyoki, fɔɲɛ tugun sɛnbɛ koloyata kiyoki, kɔnɔ mɔgɛ kan si a latagaman fɛɛyaa lanmandeŋɛ le la; kepinɛ be diren a kun sɔla ka min na, a be tagala ɲɔla le. 5Nɛŋɛ tugun be ɲɔgɔnna le: a mu fondo lanmandeŋɛ le la bale dulanu tɛma, kɔnɔ a be wasunteya kuma minnu fɔla, wonu si koe lakoloya.

Wo ka a lɔn, ta lanmandeŋɛ si nɔ janfu belebele bintanna le. 6Nɛŋɛ tugun mu ta le la, dunuya ko koroŋɛ bɛ be bɔɔla min tɔ. A la wale sabu le be bale bɛ manɔgɔla ko koroŋɛ la. Mɔgɛ nɛŋɛ si nɔ le ta sala a la dunuya takunte butɔ, bayi nɛŋɛ mu ta le la, ta min be bɔɔla jahannama. 7Adamadeŋɛ si nɔ le dalifeŋɛ mɔɔle bɛ kolola: subu fatimanu, kondeŋɛnu, bubufeŋɛnu, anun ba tɔ feŋɛnu, adamadeŋɛ bata anu bɛ kolo. 8Kɔnɔ adamadeŋɛ nɛŋɛ kan, mɔgɔ yo te nɔ a kolola. A koron, a te lakara abada. Mara tun de mu a la min na kasara te ban. 9Wo mɔ Baaba, mɔ be tantue latagala Marige ⸂Ala⸃ ma nɛn dɔndɛ min na, mɔ mɛn be adamadeŋɛ dankala ale le la, Ala be adamadeŋɛ min daren a yɛtɛ misale la. 10Wo butɔ, tantue nun dankare si bɔɔ da dɔndɔ le tɔ! N nɛɛnɛdɔndɛnu, a ma bɛn a ni ma ɲɔgɔnna. 11Kaa, ji kunama nun ji sɛɛma si nɔ bɔɔla tenge dɔndɔ tɔ ba? 12N nɛɛnɛdɔndɛnu, toori lɔgɛ si nɔ oliwiye deŋɛ wolola ba? Kaa, rɛsɛn lɔgɛ si nɔ toori deŋɛ wolola ba? Kɔɔkɔ je tugun nun ji sɛɛma te nɔ bɔɔla tenge dɔndɔ tɔ.

Hakkilimaya min be fatanden Ala la

13Ɲɔmɔ le mu fahamulá nun hakkilima la wo tɛma? Awa, wo tigi ni a tagamanɲa ɲinma yita ka koe bɛ ma jusu sɛɛya butɔ. Wo jusu sɛɛya le be fatanden hakkilimaya yati la. 14Kɔnɔ ka bɛsɛnkɔnnɛya koroŋɛ nun ɲɔgɔn siinaya be wo juse tɔ, wo kana wo yɛtɛ lakoloya wo koenu tɔ. Wo ɲan kana tɔɲa masara foniya la! 15Wo hakkile mɔɔle bele fatanden Ala le la, saŋɛ da Mansa. Dunuya tɛn hakkile le mu wo la, a be fatanden adamadeŋɛ juse tun de la, wo hakkile mɔɔle nun Sentanɛ hakkile bɛ mu dɔndɔ le la. 16Awa, bɛsɛnkɔnnɛya nun ɲɔgɔn siinaya be ka min na, ɲatadoŋɛ nun ko koroŋɛ mɔɔle bɛ be yenna ɲɔ le. 17Kɔnɔ fahamuɛ min be bɔɔren saŋɛ tɔ, wo saniyanta. A be mɔgɛ min bolo, wo tigi be bɛnɲɔgɔya anun diɲa le ɲinila, a la ko ma bɛlɛ. A juse be faren kinikinɛ nun wali ɲinma tun de la. A te mɔgɛ lafisaya mɔgɛ ko, filankafuya te to a bolo. 18Minnu be bɛnɲɔgɔya lasabatila anu la miliŋɛ tɔ, wonu bata bɛnɲɔgɔya ki, min wole si ma teleŋɛ la.

Currently Selected:

Yaguba 3: MOG

Highlight

Copy