Ko fɔlɔfɔlɛ 46
46
Yaguba la taga Misira
1Yaguba tagata, a ka a sɔtɔfeŋɛnu bɛ doni a fɛ. A la kereŋɛ Bɛri-Seba, a ka sarikanu bɔɔ a baaba Isiyaka Marigi Ala ye ɲɔ. 2Wo sue tɔ, Ala kumata Yaguba ye kiboe tɔ, a ka a fɔ: «Yaguba, Yaguba!» A ka a labita, a ko: «Naamu!» 3Ala ka a fɔ a ye: «Nde le mu Ala la, i baaba Marigi Ala. Hali i ma kilan tagala Misira, bayi n si i bɔnsɛ lasiya ɲɔ le koola. 4Nde le be i kantala tagala Misira, nde le mɛn si naa i talasaagi. I tini faga, Yusufu le be i ɲanu matagunna.»
5Wo kɔma Yaguba bɔɔta Bɛri-Seba. Yaguba la deŋɛnu ka anu baaba nun anu la deŋɛnu, anun anu la musenu bakki sarɛtinu tɔ, Misira mansa ka minnu lasanba a ma a doni koe la. 6Anu ka anu la kolofeŋɛnu tugun jigan, anun anu ka bolofeŋɛ min bɛ sɔtɔ Kanana duge tɔ. Yaguba keta wondelen fɛ Misira anun a la denbayanu bɛ la. 7A ka a la deŋɛnu doni a fɛ Misira, anun a mamareŋɛ kayimanu, anun a la den musereŋɛnu, anun a mamareŋɛ musumanu, anun a la denbayanu bɛ.
Yaguba la denbayanu
8Yaguba la deŋɛnu tɔgɛ le ka, minnu tagata Misira:
Yaguba la den kayiren fɔlɛ be tabɛnden Rubɛn de ma. 9Rubɛn na den kayireŋɛnu mu Hanoki, Palu, Heseron, anun Karami la.
10Simeyɔn na den kayireŋɛnu le ka: Yemuyeli, Yamin, Ohadi, Yakin, Soyara, anun Sayulu, Sayulu mata Kanana muse la deŋɛ le la.
11Lewi la den kayireŋɛnu le ka: Gerison, Kehata, anun Merari.
12Juda la den kayireŋɛnu le ka: Eri, Onan, Sela, Perɛsi, Sera. Kɔnɔ Eri nun Onan fagata Kanana duge tɔ le. Perɛsi la den kayireŋɛnu mata Heturɔn nun Hamuli le la.
13Isakari la den kayireŋɛnu le ka: Tola, Puwa, Yowi, anun Simiron.
14Sabulɔn na den kayireŋɛnu le ka: Seredi, Elɔn, Yalele.
15Deŋɛnu le ka, Leya ka minnu sɔtɔ Yaguba ye Padan-Arami. A la den kayireŋɛnu anun den musereŋɛnu, a bɛ kɔnte labɛndeŋɛ mɔgɔ bi saba nun saba. A ka a la den musereŋɛ Dina tugun sɔtɔ wo kunma.
16Gadi tɛn deŋɛnu: Sifɔn, Hagi, Suni, Ebon, Eri, Arodi nun Areli.
17Aseri tɛn deŋɛnu: Yimina, Yisiwa, Yisiwi, Beriya, anun anu dɔgɔ musuma, Sera. Beriya la deŋɛnu mata Hebɛri nun Malikili la.
18Laban ka Silipa min dii nun a la den musereŋɛ Leya ma jon muse la, wo ka deŋɛnu minnu sɔtɔ Yaguba ye, a bɛ kɔnte labɛndeŋɛ mɔgɔ tan nun wɔɔrɔ.
19Yaguba la musu Rakeli tɛn deŋɛnu le ka: Yusufu nun Bunyamin. 20Potifari sarika lakelá min be On saa banba tɔ, a la den musereŋɛ Asanati ka den kayiren fila sɔtɔ Yusufu ye Misira duge tɔ: Manasi nun Efirayimu.
21Bunyamin tɛn den kayireŋɛnu le ka: Bela, Bekeri, Asibeli, Gera, Nayaman, Eyi, Rosi, Mupin, Hupimu, anun Aradi.
22Rakeli ka den kayireŋɛnu minnu sɔtɔ Yaguba ye, sa a mamareŋɛnu la, a bɛ labɛndeŋɛ mɔgɔ tan nun naani.
23Dan ka Husimu sɔtɔ.
24Nafutali tɛn deŋɛnu le ka: Yatiseli, Guni, Yeseri, anun Selemi.
25Laban ka Bila min dii nun a la den musereŋɛ Rakeli ma jon muse la, wo ka deŋɛnu minnu sɔtɔ Yaguba ye, a bɛ kɔnte labɛndeŋɛ mɔgɔ wɔrɔwila.
26Yaguba nun mɔgɛnu min bere kɔnte tagata, a bɔnsɛ kunama bɛ labɛndeŋɛ, mɔgɔ bi wɔɔrɔ nun wɔɔrɔ, bɔɔ a la deŋɛnu la musenu la. 27Yusufu ka den kayiren fila le sɔtɔ Misira. Yaguba la jama minnu tagata Misira duge tɔ, a bɛ kɔnte labɛndeŋɛ, anu mɔgɔ bi wɔrɔwila le mu.
Yaguba la kereŋɛ Misira duge tɔ
28Awa, Yaguba ka Juda lasanba a ɲatɔ Yusufu dula, alako a ni a masɔ tagala Gosɛn. Yaguba nun a la jama to donta Gosɛn duge tɔ, 29Yusufu ka a la sarɛti tabɛn a tagata Gosɛn a baaba Yaguba labɛndula. A la kereŋɛ a ma, a milinta a kaŋɛ la, a tota dila ɲɔ han. 30Yaguba ka a fɔ a la den Yusufu ye, a ko: «Hali n fagata kɔtɛ, bayi n bata i ɲa kɔtɔ yen, i be baluren han bi.» 31Yusufu ka a fɔ a baaba dɔndɛnu nun a baaba la denbayanu ye, a ko: «N ni taga a lasaagi Misira mansa ma ka a fɔla n baaba dɔndɛnu anun n baaba la denbaya minnu be sabatiren nun Kanana duge tɔ, anu bɛ bata na n bata. 32Kɛ mɔgɛnu, wɔɔrɔ tige le mu anu la. Anu si kolofeŋɛnu daɲini. Anu bata na anu la wɔɔrɛ fɛ, baanu, saakanu, ningenu, anun anu sɔtɔfeŋɛ bɛ. 33Ka Misira mansa ka wo makele, a ka wo maɲininka: ‹Wo la wale mu fen de la?›, 34wo be a jaabila le: ‹I la joŋɛnu, mɔ mu kolofen kolola le la bɔɔla mɔ dendeŋɛ la han kɔtɛ, iko mɔ baabanu ka a ma ki min na nun.› Wo butɔ wo be naala tola Gosɛn duge le tɔ, bayi kolofen daɲinilanu bɛ tana le Misira kaanu la.»
Currently Selected:
Ko fɔlɔfɔlɛ 46: MOG
Highlight
Share
Copy
Want to have your highlights saved across all your devices? Sign up or sign in
