Ko fɔlɔfɔlɛ 3
3
Adamadeŋɛ la junubu fɔlɛ
1Alatala ka burun butɔ feŋɛnu min bɛ dali, kaa le keu. A ka muse maɲininka, a ko: «Kɔnɔ tɔɲa le Ala ka a fɔ le wo ye, lɔgɔ wole minnu bɛ be laakɔɛ butɔ aa wo kana fenfen dɔmɔ?» 2Muse ka kaa jaabi, a ko: «Ade, mɔ si laakɔɛ butɔ lɔgɔ wole bɛ dɔmɔ le. 3Kɔnɔ, lɔgɛ min be sɔren laakɔɛ tɛma, Ala ko aa mɔ te a wole dɔmɔ, mɔ te maga a la, ka wo ma mɔ si naa faga.» 4Kaa mɛn ka a fɔ muse ye: «Ade, wo te faga feu! 5Kɔnɔ Ala ka a lɔn, ka wo ka a dɔmɔ lun min na wo si hakkile sɔtɔ le, wo ni to iko Ala min ka ko ɲinma nun ko koroŋɛ lɔn.»
6Muse to ka lɔgɔ wole yen, a majabuta, a kaɲin dɔmɔnɛŋɛ la, a kaɲin hakkile sɔtɔfeŋɛ la, a ka a jigan, a ka a dɔmɔ. A ka do jigan, a ka a don a la kaye bolo anun min be ɲɔgɔn na, wo tugun ka a dɔmɔ. 7Anu fila bɛ ɲa lakata kisanna, anu ka lɔn sɔtɔ a ma, anu be anu bali makoloŋɛ le la. Anu ka figiye#3:7 Figiye nun toore yanbanu mulunta. yanbanu makara ɲɔgɔn fɛ, anu ka a milin anu tɛ la.
8Wo kɔma, wura la fɔɲɛ to be bɔɔla, anu ka Marigi Alatala na kulɛ mɔɛ, a be a matagamanna laakɔɛ tɔ. Anu borita Marigi Alatala la anu tagata dogon laakɔ lɔgɛnu tɛma. 9Marigi Alatala ka a kulɛ labɔɔ Adama ma, a ka a kele, a ko: «I be mina?» 10Adama ka a labita, a ko: «N ka i na kulɛ le mɔɛ laakɔɛ tɔ. N kilanta, bayi n bali makoloŋɛ le mu. Wolo mu n dogonta.» 11Marigi Alatala ko: «Ɲɔmɔ ka a fɔ i ye ko i bali makoloŋɛ le mu? N ka tɔŋɛ sigi lɔgɛ min na, i bata a wole dɔmɔ ba?» 12Adama ko: «I ka muse min dii n ma, wolo ka wo lɔgɔ wole dii n ma, n ka a dɔmɔ.»
13Marigi Alatala ka a fɔ muse ye: «I ka wo ma fenna?» Muse ka a jaabi, a ko: «Kaa le ka n natantan han n ka kɛ lɔgɔ wole dɔmɔ.»
14Marigi Alatala ka a fɔ kaa ye, a ko:
«Ile to bata wo ma,
kɔtɛ dalifeŋɛ bɛ tɛma, ile bata danka.
I si buubu i bue ma,
i ni buguta dɔmɔ
i la simaya bɛ butɔ.
15N si jaguya to i nun muse tɛma,
n si jaguya to i bɔnsɛ nun a bɔnsɛ tɛma.
A bɔnsɛ si i kuŋɛ te,
ile tugun si a tingiliŋɛ kin.»
16Ala ka a fɔ muse tugun ye, a ko:
«N si a banba sa i la bu dumɛ kunma;
i si tiŋɛ doni le han, jɔnɔn i ni deŋɛ sɔtɔ.
I la mira si to i la kaye ma tɛmu bɛ,
ale si i yamɔri.»
17Ala ka a fɔ Adama tugun ye, a ko: «I to bata i la muse kulɛ bita han i ka lɔgɔ wole dɔmɔ, n ka tɔŋɛ sigi min na n ko i kana a dɔmɔ,
wo butɔ, duge si ladanka le ile la ko la.
18Duge si ŋaniŋɛ nun baage lafɛtɛn i ye,
i be i balue sɔtɔla sɛnɛ tɔ le.
19I si wale ma,
i ni woosi i balue sɔtɔ koe la.
I si to wo tɔ han i be saagila tɛmuɛ min tɔ duge tɔ,
bayi i bɔɔta duge le tɔ.
I mu bangue le la,
i mɛn be saagila wo bangue le tɔ.»
20Adama ka a la muse tɔgɔ sa Hawa, bayi ale le mata adamadeŋɛ bɛ nɛɛnɛ la. 21Marigi Alatala ka bole donu tabɛn a ka a ma doroki banbanu la, a ka wo lajigi Adama nun a la muse ma.
22Marigi Alatala ko: «Kɔtɛ, mɔgɛ bata to iko mɔle, a ka ko ɲinma nun ko koroŋɛ lɔn. Kɔtɛ, mɔ kana sɔn a ni a bole lafonti a ni malakise lɔgɛ wole do bɔɔ, a ni a dɔmɔ. Ka a ka wo dɔmɔ a la simaya si to dan bele a la.» 23Wo butɔ, Marigi Alatala ka a labɔɔ Edɛn laakɔ ɲinma butɔ. A ko anu ni taga duge lawali, Ala ka anu bɔɔ duge min tɔ.
24Awa, Ala ka Adama bee ɲɔgɔnna le. A ka malekanu sɔ Edɛn laakɔɛ tele yɛlɛ mafanna anu ni a kanta. Ta be bɔɔla anu bole tɔ iko faŋɛ. Tɛmuɛ bɛ wo ta be lindanna. A ka anu sɔ le ɲɔ alako mɔgɔ yo kana tanbi a ni taga ke malakisi lɔgɛ ma.
Currently Selected:
Ko fɔlɔfɔlɛ 3: MOG
Highlight
Share
Copy
Want to have your highlights saved across all your devices? Sign up or sign in