Hɔrɔya 9

Jihadi looluɲɔgɛ: kolofeŋɛnu la bande

1Awa, Alatala ka a fɔ Musa ye, a ko: «Taga don Firauna bata, i ni a fɔ a ye: ‹Alatala, Heburenu la Ala la kuma le ka, a ko: aa i ni a la jama boloka, alako anu ni taga a batu. 2Ka i mɛn balanta anu bolokala anu ni taga, fɔ i mɛn ka anu makankan ɲɔ, 3awa, Alatala si a bolo sa i la kolofeŋɛnu ma minnu be wɔɔrɛ tɔ, soeenu, sofalenu, ɲɔgɔmɛnu, kolofen lanmanu anun a banbanu. A si naa manta bandiya makilandeŋɛ latugu le anu la. 4Alatala si naa bani Isirayila kaanu la kolofeŋɛnu nun Misira kaanu la kolofeŋɛnu tɛtɛgɛbɔɛ sa le, wo butɔ fenfen te faga bani Isirayila kaanu la kolofeŋɛnu tɔ.› » 5Alatala mɛn ka a ma tɛmuɛ fɔ, a ko: «Sinan de n be naala wo mala.»

6Wo tabantaka, Alatala ka a ma ɲɔgɔnna le. Misira kolofeŋɛnu bɛ fagata wɔɔrɛ tɔ, kɔnɔ hali kolofeŋɛ dɔndɔ ma faga bani Isirayila kaanu la wɔɔrɛ tɔ. 7Firauna ka kiila lasanba. A ka a yen, kolofeŋɛ hali dɔndɔ bele fagaren bani Isirayila kaanu la wɔɔrɛ tɔ. Kɔnɔ wo bɛ butɔ Firauna hakkile bɛlɛyata, a ma sɔn jama bolokala anu ni taga feu.

Jihadi wɔrɔɲɔgɛ: yitenu

8Wo kɔma, Alatala ka a fɔ Musa nun Harona ye, a ko: «Wo bolenu lafa ta buguta fiŋɛ la furu tɔ, Musa ni a lafili kantɔ Firauna ɲala. 9A si ma banbaŋɛ la Misira duge bɛ tɔ. A si naa yiti fogireŋɛnu labɔɔ mɔgɛnu nun kolofeŋɛnu ma minnu si ma tɛlɛ la Misira duge bɛ tɔ.»

10Musa nun Harona ka ta buguta fiŋɛ jigan furu tɔ, anu tagata sɔ Firauna dula. Musa ka buguta lafili kantɔ, buguta ka yiti fogireŋɛnu labɔɔ mɔgɛnu nun kolofeŋɛnu ma minnu si ma tɛlɛ la. 11Yitenu la ko ka a ma durenu ɲan ma nɔ sɔla Musa ɲakɔtɔ bitugun, bayi yitenu be durenu tugun ma iko Misira kaa tɔma bɛ. 12Kɔnɔ Alatala ka Firauna hakkile labɛlɛya, a ma sɔn Musa nun Harona kulɛ bitala; Alatala ka a fɔ Musa ye ɲɔgɔnna le nun.

Jihadi wɔrɔwilaɲɔgɛ: sangi kure

13Wo kɔma, Alatala ka a fɔ Musa ye, a ko: «Wuli sinan saguma piri, i ni taga ke Firauna ma i ni a fɔ a ye, i ko: ‹Alatala la kuma le ka, Heburenu la Ala, a ko: aa i ni a la jama boloka anu ni taga a batu. 14I ni a lɔn kɛ biyase kan a be naala jihade mɔɔle bɛ le lasanbala ile nun i la walilanu anun i la jama ma, alako i ni a lɔn, ale Ala nun fenfen ma mulun kɛ dunuya. 15Ka a ka a bole lafonti le nun, a ka kaaka bandiya latugu ile nun i la jama la, kɔtɛ nun wo la ko bata mɔdɛ dunuya. 16Kɔnɔ a ka i to baluren wolo la, alako a ni a sɛnbɛ yita i la. Wo butɔ, dunuya bɛ si a tɔgɔ fɔ. 17Kɔnɔ han bi i be ko do le kitila a la jama la, i bele sɔnden a bolokala anu ni taga. 18Awa a kɔnɔn, a si naa sangi kure makilandeŋɛ layɛlɛn de sinan kɛ tɛmuɛ, bɔɔla Misira sɔta han bi, anu ma min ɲɔgɔn yen. 19Kɔtɛ, i la wɔɔrɛ anun i bolofeŋɛ min bɛ be ɲagama butɔ, anu ká to dula makantareŋɛ tɔ. Sangi kure si boe le mɔgɛnu nun kolofeŋɛnu bɛ ma a ka minnu taran ɲagama butɔ; minnu ma don boŋɛnu butɔ, wonu bɛ si faga le.› »

20Wonu fɔ kɔma Firauna ye, a la walila donu minnu kilanta Alatala la kuma la, wonu ka anu la joŋɛnu anun anu la kolofeŋɛnu ladon teriya la boŋɛnu butɔ. 21Kɔnɔ minnu ma laa Alatala la kuma la anu juse tɔ, wonu ka anu la joŋɛnu nun anu la kolofeŋɛnu to ɲagama butɔ.

22Wo tɛmuɛ, Alatala ka a fɔ Musa ye, a ko: «I bole lafonti saŋɛ ma, sangi kure ni boe Misira duge bɛ tɔ, mɔgɛnu nun kolofeŋɛnu ma anun kifeŋɛnu minnu be Misira jamanɛ butɔ.» 23Wo butɔ, Musa ka a la tungare sɔ saŋɛ la ki min na, Alatala ka sangi bula nun sangi kure lasanba kisanna, balamantaŋɛ jigita duge tɔ. Alatala ka sangi kure laboe Misira duge tɔ. 24Sangi kure nun balamantaŋɛ basanta ɲɔgɔn na a ɲinma la, anu jigita anu ma. A la gbaloenu kolo, min siila ma ma betunna Misira duge bɛ tɔ bɔɔla Misira jamanɛ sɔta. 25Sangi kure ka mamabuŋɛ ma Misira duge bɛ tɔ, min bɛ be ɲagama butɔ, bɔɔla mɔgɛnu ma han ka ke kolofeŋɛnu ma. Sangi kure ka kifeŋɛnu tugun bɛ tiɲa, a mɛn ka lɔgɛnu makati. 26Fɔ Gosɛn duge dɔrɔn, bani Isirayila kaanu be ka min na, sangi kure ma jigi ɲɔ le.

27Wo butɔ, Firauna ka kiila lasanba Musa nun Harona ma, a ka anu kele, a ka a fɔ anu ye, a ko: «N bata junube ma kɛ biyase. Alatala le tɔɲa, nde nun n na jama bata koe tiɲa. 28Wo taga Alatala mataran alako kɛ sangi bula makilandeŋɛ nun sangi kure ni dan. N si naa wo boloka le wo ni taga, n te wo makankan bitugun.» 29Musa ka a fɔ a ye, a ko: «N tini bɔɔ saa butɔ, n si n bolenu sɔ Alatala ye, n ni a mataran. Sangi bula nun sangi kure si dan de, alako i ni a lɔn Alatala le tan mu dunuya la. 30Kɔnɔ n bata a lɔn ile nun i la walilanu, han bi wo ɲan bele kilanden Marigi Alatala la.»

31Wo ka a taran, sangi kure ka gesepute nun fondi bɔɔreŋɛ le tiɲa, bayi fonde bata kolo sa, gesepute tugun bata a feere labɔɔ. 32Kɔrɛ nun saɲɔŋɛ kan ma tiɲa, bayi anu wagate bele keren.

33Awa, Musa bɔɔta Firauna kunma, a tagata Misira saa kɔma. A ka a bolenu sɔ Alatala ye, sangi bula nun sangi kure danta, sange tugun ma na duge tɔ bitugun. 34Firauna to ka a yen sange nun sangi kure nun sangi bula bata dan, a mɛn tasaagita a la junubu koe ma tugun. Ale nun a la walilanu mɛn hakkile tabɛlɛyata. 35Wo bɛ butɔ, Firauna hakkile be bɛlɛyaren tun, a ma sɔn bani Isirayila kaanu bolokala feu, anu ni taga; Alatala ka a fɔ ɲɔgɔnna le nun Musa sabu la.

Currently Selected:

Hɔrɔya 9: MOG

Highlight

Compare

Copy