Hɔrɔya 33

Ala la Musa yamɔrila kila bita koe la

1Alatala kumata Musa ye, a ko: «Taga, ile nun jama i ka min nabɔɔ Misira duge tɔ, wo ni bɔɔ yan wo ni taga duge tɔ, n ka n nakali ka min lahire jigan koe la Iburahima nun Isiyaka anun Yaguba ye, ka a fɔla n si a dii anu bɔnsɛ ma. 2N si maleka do sɔ le wo ɲatɔ. N mɛn si Kanana kaanu anun Amɔri kaanu, anun Hɛti kaanu, anun Feresi kaanu, anun Hiwi kaanu, anun Jebusi kaanu bee le ɲɔ. 3Nɔnɛ nun kumɛ te ban wo duge tɔ. Kɔnɔ wo mu kanbɛlɛŋɛnu le la, wolo mu nde nun wole te taga wo duge tɔ, alako n kana naala wo la ko banna kila tɔ.» 4Jama to ka wo kuma bɛlɛŋɛ mɔɛ, anu suunuta. Mɔgɔ yo ma a la yangufeŋɛnu don. 5Wo ka a taran, Alatala ka a fɔ Musa ye, a ni a fɔ bani Isirayila kaanu ye, aa kanbɛlɛŋɛnu le mu anu la, aa ka Ala nun anu tagata tun, a si anu la ko ban de. Aa wolo mu anu ni anu la yangufeŋɛ bɛ bɔɔ anu ma, a ni a fɛlɛ a be anu la ko bitala ki min na. 6Wo butɔ, bɔɔla anu bɔɔta Turisinina kɔnkɛ tɔ, bani Isirayila kaanu ka anu la yangufeŋɛnu don koe boloka.

Bɛndula boŋɛ

7Bani Isirayila kaanu tini be anu la daaka tola ka min na, Musa si kɛnɛ tantaa do jiganna, a ni a layanfaya daaka la a ni a sɔ. A ka wo tɔgɔ sa bɛndula boŋɛ. Min tini di Alatala maɲininkala fɔ a ni bɔɔ daaka kɔma, a ni taga bɛndula boŋɛ tɔ. 8Musa tini be bɔɔla tagala wo Boŋɛ tɔ, jama bɛ be wulila le, anu ni sɔ anu la tantaa bonda tɔ, anu ni anu ɲa sɔ Musa la han a ni don ɲɔ butɔ. 9Musa tini be donna Boŋɛ butɔ, luuture madɛndeŋɛ ni naa jigi, a ni to Boŋɛ dondula tɔ, Alatala nun Musa ni to sumunna. 10Bani Isirayila kaanu tini wo luuture madɛndeŋɛ yen Boŋɛ dondula tɔ, jama bɛ be wulila le, anu bɛ ni sujudu anu la bondanu tɔ. 11Alatala ni kɛnɛ kumala Musa ye kɛnɛ kɛnɛ, iko mɔgɛ be kumala a filaɲɔgɛ ye ki min na. Wo kɔma, Musa ni saagi daaka tɔ. Kɔnɔ Nunu la den kayireŋɛ Yosuwe, Musa dɛmanna kamareŋɛ, wo kan bele bɔɔla wo Boŋɛ butɔ.

Alatala la nɔɔra

12Musa ka a fɔ Alatala ye, a ko: «Aa Marige! i bata n yamɔri n ni sɔ kɛ jama ɲatɔ, kɔnɔ i bele a yitaren n na mɔ nun min si taga. Adun ile yati bata a fɔ i be nde le masubɛren, n na ko bata i hɛnɛ. 13Kɔtɛ, n na ko to bata i hɛnɛ, yandi, i la natá yita n na, alako n ni i lɔn, n na ko mɛn ni i hɛnɛ yati. I mɛn ni a lɔn kɛ jama mu i la jama le la.» 14Alatala ka a jaabi, a ko: «Nde yɛtɛ wunde le be tagamanna i fɛ, alako i juse ni sa.» 15Musa ka a fɔ a ye, a ko: «Ka ile yɛtɛ wunde le bele tagamanna mɔ fɛ, i kana mɔ bɔɔ yan de! 16Ka i bele tagamanna mɔ fɛ, a be lɔnna kama le nde nun i la jama la ko bata i hɛnɛ? Ka i be tagamanna mɔ fɛ, wolo be a yitaren i bata i la jama masubɛ sii gbɛtɛnu ɲaama duge kunma.» 17Alatala ka Musa jaabi, a ko: «I be bɔɔren kuma min fɔla ka, n si a bɛ ma le nɛti, bayi i la ko bata n hɛnɛ, n mɛn ka i masubɛ le.»

18Wo butɔ, Musa ka a fɔ, a ko: «N bata i táran, i la nɔɔra yita n na!» 19Ala ka a jaabi, a ko: «N si naa tanbi le i la n ni n na kaɲinya nɔɔrareŋɛ yita i la, n mɛn si naa n tɔgɛ ‹Alatala› yɛtɛ lake le i ma n kulɛ mayɛlɛreŋɛ la. N be hinnɛnteya mala mɔgɔ le ye, n tini di a mala min ye; n mɛn be kinikinila mɔgɔ le ma, n tini di kinikinila min ma. 20Kɔnɔ, i te nɔ n ɲakɔtɔ yenna, bayi Adamaden yo te nɔ n ɲakɔtɔ yenna a ni to a ma faga.» 21Alatala mɛn ka a fɔ: «Todula do le ka n kɛnna fata tɔ, na sɔ kɛ kunma. 22N na nɔɔra tini tanbi, n be i dogonna fata fole do le tɔ, n ni i hijabu n bole la han n tini ban tanbila wagate min tɔ. 23N ni naa n bole bɔɔ i ɲaama, wo tɛmuɛ i si nɔ le n kɔma yenna, bayi n ɲakɔtɔ te nɔ yenna.»

Currently Selected:

Hɔrɔya 33: MOG

Highlight

Compare

Copy