Hɔrɔya 31
31
Hɔrɔma dingira walilanu
1Alatala ka a fɔ Musa ye, a ko: 2«I tolomasɔ: n bata Uri la den Besaleli masubɛ, Huru mamareŋɛ, Juda bɔnsɛ. 3N bata hakkili ɲinma dii a ma, ko do lɔn koe la nun bolo lawali koe la, alako a ni nɔ wali siyama mala: 4a ni nɔ wale mirala, a ni sanuɛ lawali, anun kaalise nun taasa, 5a ni nɔ kuru sɔn bɛlɛŋɛ malasɛla, alako a ni kun a safeŋɛ butɔ, a ni nɔ lɔgɛ malasɛla, fayida a ni nɔ wale mɔɔle bɛ mala. 6A dɔrɔn te wali; n bata Ayisamaki la den Oholiyabi don a bolo a ni a dɛman, a be fatanden Dan bɔnsɛ le la. Mɔgɛnu minnu kusan walila, n bata fondo lɔn hakkile sa wonu tugun bɛ juse tɔ, alako anu ni wale bɛ ma iko n ka i yamɔri ki min na: 7bɛndula boŋɛ ba, seedeɲɔgɔya kankira ba, a junubu kafari dataguraŋɛ ba min be a kunma, anun hɔrɔma dingira miraŋɛ bɛ, 8teebile nun a la miraŋɛnu ba, lanpu sigifeŋɛ sanunɛŋɛ nun a la miraŋɛnu bɛ, sorayi saniyandeŋɛ bintandula ba, 9sarika bintandula nun a la miraŋɛnu bɛ, ji madɛnfeŋɛ nun a sigifeŋɛ ba; 10donfen masubɛreŋɛnu minnu be tabɛnden Harona sarika lakelá la donfen saniyandeŋɛnu ma, anun a la den kayireŋɛnu la donfeŋɛnu, sarika lake wali koe la; 11tule min si mɔgɛ yita Ala la anun sorayi saniyandeŋɛ kuɲɛ diyama min be bintanna dula saniyandeŋɛ butɔ. Anu be a bɛ mala le, iko n be i yamɔriren ki min na.»
Sulen lɔ́gɛ́ makanta koe
12Alatala ka a fɔ Musa ye, a ko: 13«A fɔ bani Isirayila kaanu ye, i ko: ‹Wo ni nde Alatala la sulen lɔ́gɛ́ makanta de, bayi wolo be maren tɔnkuma la wole nun nde Alatala tɛma, bɔɔla bɔnsɛ ma han bɔnsɛ, alako wo ni a lɔn ka a fɔla nde le mu Alatala la, min be wo lasaniyanna. 14Wo si kɛ sulen lɔ́gɛ́ makanta le, bayi a saniyanta wo ye. Ka min ma kɛ sulen lɔ́gɛ́ biliya, a ka wale do ma kɛ lɔ́gɛ́ tɔ, wo tigi si naa bɔɔ le a la jama ɲaama, a ni faga. 15Wo be walila le tele wɔɔrɔ, kɔnɔ a tele wɔrɔwila luŋɛ be mala sulen lɔ́gɛ́ le la, lɔgɔ masubɛreŋɛ le min be kɛrɛkɛrɛla nde Alatala ye. Min yo ka wale do ma wo sulen lɔ́gɛ́ tɔ, wo tigi si naa faga le. 16Bani Isirayila kaanu si sulen lɔ́gɛ́ makanta, anu ni a labatu, bɔɔla bɔnsɛ ma han bɔnsɛ. Lahiri lakotireŋɛ le mu min te tiɲa abada. 17Tɛmuɛ bɛ a be mala tɔnkuma le la nde nun bani Isirayila kaanu tɛma, bayi nde Alatala, n ka saŋɛ nun duge da tele wɔɔrɔ le kɔtɔ, a tele wɔrɔwila luŋɛ, n ka wale lasɔ n ka n sulen.› »
18Alatala to banta kuma fɔla Musa ye Turisinina kɔnkɛ kunma feu, a ka wo kuru wala fila don a bolo seedeɲɔgɔya la, Ala yati ka minnu sɛbɛ a bolo soliŋɛ la.
Currently Selected:
Hɔrɔya 31: MOG
Highlight
Share
Compare
Copy
Want to have your highlights saved across all your devices? Sign up or sign in
